Buch vun der WochKent Haruf: Lied der Weite

D'Buch koum u sech schonn 2001 mam Titel "Flüchtiges Glück" eraus (Original: Plainsong), e Buch dat onscheinbar wierkt an awer flott ze liesen ass.

"Lied der Weite" ass engersäits d’Geschicht vum Schoulmeeschter Tom Gurthie senger depressiver Fra Ella an sengen zwee Kanner Bobby an Ike. Op der anerer Säit ass dann d’Victoria Robideaux, e 17 joer aalt Meedchen dat onerwaart schwanger gëtt, vu senger Mam doheem erausgehäit gëtt an als éischt vu senger Léierin Maggie Jones opgeholl gëtt. De Papp vum Kand huet sech duerch Bascht gemaach esou datt dat jonkt Meedchen op sech alleng gestalt ass. An och d’Maggie kann sech net längerfristeg ëm seng Schülerin këmmeren, well si hiren demente Papp versuerge muss. Si vertraut doropshin d’Meedchen den zwee Baueren a Jonggesellen Raymond an Harold Mc Pheron un. Di Zwee, déi sech bis elo nëmmen ëm hir Kéi gekëmmert hunn, sinn um Ufank mat der Situatioun iwwerfuerdert, huelen den Challenge awer gären un a wuessen och no an no an hir Roll eran. Um Ufank schéngt et, wéi wann zwou parallel Geschichten erzielt géife ginn, déi näischt mateneen ze dinn hunn. Ee Kapitel iwwer dat anert gëtt nees weidergezielt wéi et dem Tom mat senger Famill ergeet an dann nees wéi d’Viktoria den Challenge vu senger Schwangerschaft meeschtert. A wéi all aner Erzielung vum Kent Haruf spillt och dës Geschicht nees an der fiktiver Stad Holt am Bundesstaat Colorado.
 
An der Mëtt vu Buch gëtt et dann konkret an den Lieser gëtt méi iwwert déi verschidde Verbindungen ënnert de Protagonisten gewuer. Alles huet mateneen ze dinn a gëtt zu engem groussen Ganzen, wat sech schonns duerch den original amerikaneschen Titel vum Buch "Plainsong", wat esou vill heescht wei Choueresang, erahnen léisst. 
De Kent Haruf erzielt vun Amerika,  senger Landschaft a senge Leit. Wien allerdéngs vill Aktioun erwaart, gëtt hei enttäuscht. Et sinn déi detailräich Erzielungen aus dem Alldag, d’Empathie fir seng Figuren, déi schnell entsteet an déi authentesch Abléck, déi säi Buch ausmaachen. Mä awer och grouss emotional Momenter ob déi een zwar waarde muss, mä déi am Buch awer duerchaus  virkommen, maachen de Charme vum Buch aus.
Et mierkt een séier an de Bicher, datt de Kent Haruf vill gereest ass, vill kennegeléiert huet a sech fir villes interesséiert huet. Et ass dem 2014 verstuerwenen Auteur  säin drëtt Wierk vun insgesamt 6 Bicher déi hie geschriwwen huet. An Europa war hie bis elo net sou bekannt bis d'lescht Joer säi Wierk "Unsere Seelen bei Nacht" mam Jane Fonda an dem Robert Redford verfilmt gouf.
"Lied der Weite" ass dann och kee ganz neit Buch. Schonn 2001 gouf et eng däitsch Iwwersetzung  mam Titel "Flüchtiges Glück". Ma deemools hat de Roman awer net wierklech Succès.  Di nei Editioun dréit dann den Numm "Lied der Weite", a mécht déi Atmosphäre, déi am Buch opkënnt, vill besser däitlech.
Et ass e Buch wat mir ganz gutt gefall huet, well et duerch seng Einfachheet iwwerzeegt. Awer och e Buch, dat duerchaus fesselt an de Lieser dozou invitéiert, weiderzeliesen.  Vu mir dofir eng Recommandatioun.

13/02/2018 Buch Lied der Weite Kent Haruf