Eis Sprooch mam Lex RothEise "Branding"

An der Zäit an och nach haut fanne mir eng (zimlech barbaresch) Method, fir Déieren am Sënn vum Ausdrock, de Stempel vun hirem Propriétaire mat gliddegen Eisen anzeBRENNEN. Dofir ass den Ausdrock ‚Branding‘ jo och an eiser Sprooch (brennen, Brand, Brennes…) ganz liicht ze verstoen; also emol net esou schrecklech englesch, souguer wann deen typeschen –ing hannendrun hänkt; bei hinnen heescht ‚brennen‘ nun emol ‚to burn‘. Dat da fir unzefänken.

Natierlech ass et gutt, eisem Land mat deem ‚Luxembourg Branding‘ wëllen no baussen e gewëssent Gesiicht ze ginn. Et däerf een sech ower froen, ob dat nëmmen iwwer dat Materiellt soll goen. „Mir“ hu jo zënter 1054 Joer hei eng Vergaangenheet, déi nach laang net ‚vun der Heck gepléckt ass! ‚Kuckt hirer véier droen d‘ Kroun vum däitsche Räich a Keeserthroun‘ ass nun emol net nëmmen e Saz aus engem Lidd, mä historesch Realitéit! Datt ‚si‘ sech zënter dem spéide Mëttelalter d’Käpp fir „eis“ Festung bluddeg geschloen hunn, a Lëtzebuerg bis 1815/1867 e strategesch wichtegt Element an der europäescher ‚Wullerei‘ war, kënne mir roueg an d’Fenster stellen. Datt e Robert Schumann hei gebuer ass, seng Primär- a Secondaire-Ausbildung do kritt huet, wou herno an der ‚Märei‘ d’CECA entstan ass an deen alleréischte Bürosstull vun deem gestanen huet, wat haut EU heescht. Datt ‚eise‘  Jules Hoffmann deen 3. Nobelpräis-Laureat ass, dee mir kënne fir äis reklamméieren. Wou a vu wiem ass iwregens dat haut wichtegst Metall ‚gebraut’ginn, dat d’Welt haut huet, den Titanium? Datt mir am Sport, vrun allem dem Tour de France, e sëllechen ‚eiser‘ um ieweschten Träpplek stoen haten…an ‚äis‘ fir eis Fräiheet exemplaresch behol hunn… gehéiert dat bei eise ‚Branding‘ oder net? Déi Form vu ‚Branding‘ war uganks den 90er Joere mat der 3-sproocheger Zäitschrëft ‚VOILÀ Luxembourg‘ am Staatsministère gestart ginn; en immense Succès… deem säin Enn: e wierklech aremséilegt Trauerspill vun nabots de la culture.

Eent vun de markansten Zeeche vun eiser Eegenart – leider däerf ee jo bal net méi vun ‚Identitéit‘ schwätzen, ouni vun de ‚Correctness-Patréiner‘ op den Aarm gehol ze ginn – war a bleift ower eis Sproochsituatioun. De Fong dovun ass d’Lëtzebuergescht, eng Mëschsprooch aus dem fränkesche Raum, mat engem gewëssen Hank fir romanesch/ franséisch Elementer, deen et déi aner Säit vun Our-Sauer a Musel net gëtt… deen de jonke Lëtzebuerger et ower méiglech mécht, ouni deen allermannste Problem an engem däitsch- oder franséischsproochege Land ze stodéieren; och e Fong, op deem kee besser Englesch léieren.

Dat ganzt Gedankespill vun hei uewendru weist eeriicht op d’Wichtegkeet vun deer Sprooch, déi nun emol bei eise ‚Branding‘ gehéiert. Doraus kuckt och d’Wichtegkeet vun eisem typesch lëtzebuergeschen Idiom, de griecheschen Ausdrock fir egal watfir eng Sprooch, ob risegrouss oder kleng, souguer wann een se ‚nëmmen en Dialekt‘ vernennt. Wie joerelaang Lëtzebuergesch-Coursë fir auslännesch Leit gehal huet, dee kann iech bezeien, fir wéi  wichteg déi eis Sprooch an hir ‚Niewewierkungen‘ halen; dat net eréischt zënter haut. Bei hinnen war a bleift de ‚Branding‘ fir d‘Lëtzebuergescht eng absolut Normalitéit. Leider bei ville vun äis selwer net!


Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.