Eis Sprooch mam Lex RothSchlecht iwwersatent Däitsch !

Et ass ëmmer an ëmmer erëm déiselwecht Turlatäin, wa Leit eppes op Lëtzebuergesch wëlle schreiwen an net aus deer houdäitscher Schinn erauskommen. Dat kënnt net nëmmen ‚um Radio‘ vir, mä och an neien ‚elektroneschen‘ Zeitungen, z.B. am ‚Moien.lu‘.

Hei dann emol en zesummegepechtent Beispill: Nom Ofschloss vun der Veranstaltung hu mir den Opzuch geholl, fir den Heemwee unzetrieden…da stellt iech emol vir, dir sollt dat op Franséisch soen; do fält jo emol déi ‚Veranstaltung‘ direkt ewech, well et an dëser Sprooch ‚organisation‘ heescht…an eng Organisatioun hu mir och zënter Joer an Dag, an deemno ‚veranstalte‘ jo ower net, mä organiséieren eppes, oder?

Den ‚Ofschloss‘ passt an d’Lëtzebuergescht ongeféier esou era wéi e Suedel op e Mu-Bäizi; och ‚ofschléissen‘ ass muttwëlles op Däitsch gequëtscht. Do hu mir jo ganz einfach en ‚Enn‘…deemno giff et op éierbarem Lëtzebuergesch heeschen, oder et kënnt en anere Sazbau a Fro kommen: Wéi d’Organisatioun eriwwer war, si mir heemgaang. Vläicht ass dat dësem oder deem ower zevill ‚einfach‘…eng vun de Kränkten,  , déi der leider esou vill net lassginn. Fir eng Kroun drop misst bei esou ‚Eriwwerbruedereien‘ aus dem ‚Lift‘ virum Mikro oder der Klabbermaschinn och nach en ‚Opzuch‘ ginn; ower duer komme mir vläicht nach, wann et esou weidergeet mam Verlouderen a Verladdere vum Lëtzebuergeschen an de Medien.

Natierlech kenne mir all déi Ursaachen, déi erbäigezu ginn, wann et ëm dës Zoustänn geet. Keng Zäit; mir hunn dat ni geléiert…a wat soll dee PURISMUS?! Dat éischt Gemëffers kann ee gleewen…oder net; d’meescht ass et just eng zimlech fuddeleg Ursaach. Déi Saach mam Léieren ass e laangt Gespréich wert: Mir hunn haut esouvill dees éierbar geschriwwene Lëtzebuergesch, datt een sech z.B. dem Pol Greisch,  dem Pier Kremer, dem Henri Losch an aneren hirer Texter emol kann op de Schouss huelen, fir sech eng zerguttst Nues dees ‚normale‘ Lëtzebuergesch ze ‚bekucken‘. Hei an dëser Rubrik vun RTL.LU huet jidfereen ewell d’Méiglechkeet, wäit iwwer 400 grousser ‚Blieder‘ an eiser Sprooch erauszezéien, wou d’Sprooch selwer an och dat Bannescht vun den Artikele méi ewéi engem eppes kënnten ze ‚knaë‘ ginn.

Et wier vläicht och net iwwel, wann emol een deem anere säi Lëtzebuergesch-Geschreifs emol giff op Prouf ze liese ginn, fir eng kleng ‚Kritik‘ ze kréien. Dat ass ower vläicht zevill dees Gudde gefrot…well mir si jo all zimlech vun äis selwer iwwerzeegt, gelldir…soulaang, wéi keen der Saach ‚op den Zannt‘ fillt.

Nach en anere Knuet an deer Saach: Wann eng Sprooch-Kueberei e puermol op/an engem ‚soziale Medium‘ un d’Wibbele komm ass, da maachen der vill sech et einfach, a soen, dat giff ‚bei de Leit‘ esou gebraucht ginn…do kann een dann net méi e sëlleche soen, well esou Behaaptungen net brauche bewisen ze ginn, ower och näischt dogéint ze maachen ass. Eng nei Ursaach: Am ‚Dictionnaire‘ steet dat och esou. D’meescht ass domat de LOD gemengt, well do och mam ‚Gebrauch bei de Leit‘ rondrëm gewéitscht gëtt…wat fir d’Erhale vun eiser Sprooch riicht erof an déi bekannte ‚Baach‘ féiert. De LOD ass op d’mannst an 10% vu senge ‚Saache‘ keng Referenz…an et wäerd sech an deer nächster Zäit do och eppes ‚maachen‘.



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.