Ombudsman - Successioun Lydie ErrPresidentekonferenz huet 6 Kandidate gesinn, Vote am Mäerz

Et war eng Première am Kader vun der Prozedur fir en neien Ombudsman ze fannen.

D'Presidentekonferenz huet déi 6 Kandidate gesinn, déi sech fir d'Successioun vun der Lydie Err gemellt hunn.

D'Entretien mat de Kandidate waren net public, mee et sollt sech e bessert Bild iwwert d'Motivatioune vun dëse Leit gemaach ginn. Net manner ewéi 15 Minutten haten déi 6 Kandidaten Zäit, fir sech virun der Presidentekonferenz virzestellen an hier Ambitiounen ze verroden. Esou och de Generalsekretär vum Centre de médiation civile et commerciale, Jan Kayser.

Ombudsman-Kandidat Jan Kayser / Reportage Frank Elsen

Zënter Joren ass hien als Mediateur aktiv an interesséiert sech fir Konfliktléisungen ze sichen. De neien Ombudsman misst virun allem Kommunikatiounskompetenzen hunn, ënnersträicht de Jan Kayser.             

De Jan Kayser huet laangzäit als Mediateur a verschiddene Strukture geschafft a war President vun der Associatioun des Mediateurs agrées, wou hien ëmmer erëm mat neien Iddien iwwerzeegt huet, fir Konflikter ze léisen.  

De Jan Kayser wëllt sech awer net ze wäit aus der Fënster leeën, well de Choix vun der Chamber misst kommen.

Hien hätt dann och gëschter déi Saachen ugeschwat, déi him wichteg sinn, esou nach de Jan Kayser.

An der Course ëm d’Successioun vum Lydie Err, sinn jo nach 5 aner Kandidaten. Den Daniel Miltgen, d’Claudia Monti, d’Catherine Thomé, d'Christiane Weidenhaupt an de Luc Aniset. Beschte Chancen dierft wuel d'Affekotin Claudia Monti hunn.

No dësen Auditiounen ass de geheime Vote iwwert de neien Ombudsman am Mäerz an der Chamber. Den aktuelle Mediateur bleift "en place" bis den 23. Abrëll - u sech wier d'Mandat vun der Lydie Err bis 2019 gaangen.

Eenzege Konkurrent fir d'Wahl vun der Lydie Err war 2011 de Roy Reding, bei der Designatioun vum éischten Ombudsman, dem Marc Fischbach, hat dësen am Joer 2003 fënnef aner Konkurrenten, dorënner d'Lydie Err, déi et also am zweeten Ulaf sollt op dee Poste packen.