Speedmarathon187 Chaufferen ze séier, 1 Permis agezunn

Beim europäesche Blëtzmarathon e Mëttwoch goufen hei am Land 187 Chaufferen erwëscht, déi ze séier gefuer sinn.

24 Stonne Vitesskontrollen (19.04.2017)
Vun en Dënschdeg 6 Auer bis e Mëttwoch um 6 ginn a 24 europäesche Länner verschäerft Vitesskontrolle gemaach.

Et ass déi drëtten Editioun vum Speedmarathon. Am Grand-Duché soll all Patrull an deene 24 Stonnen op d'mannst eng Kontroll gemaach hunn.

Bei 56 anere waren zum Beispill d'Pabeieren net an der Rei oder se hunn telefonéiert. 

Ee Chauffer hat ze vill gedronk, Cannabis bei sech an keng korrekt Pabeieren.




24 Stonnen, 24 Länner

Ënnert dem Motto "Slow Down Europe" goufen e Mëttwoch vu 6 Auer u Vitessekontrollen uechter d'ganzt Land gemaach.

Et ass déi drëtt Editioun vum "Blëtzmarathon", bei deem dës Kéier 24 europäesch Länner dobäi sinn.

D'Police mécht präventiv an awer och repressiv Kontrollen, wou natierlech virop d'Vitess am Mëttelpunkt steet.

Vitess thematiséieren

E Mëttwoch de Moie gouf ënnert anerem an der Géigend vu Jonglënster kontrolléiert. D'Presse war och geruff an d'Police dierft zefridde sinn, well während där Stonn, wou d'Journalisten an d'Fotografen do waren, ass keen Automobilist wéinst ze héijer Vitess ugehal ginn.

Vitess ass geféierlech an dës Aktioun soll  jidderengem dat an d'Gewësse ruffe, seet den André Schaack vun der Police. D'Vitess bleift d'Haaptursaach vun déidlechen Autosaccidenter. A wat d'Vitess méi héich ass,  wann een en Accident huet, wat d'Suitte méi schlëmm sinn. All Chauffer weess wéi geféierlech et ass ze rennen an awer léisst nach laang net jidderee sech dovunner ofbréngen.

Nieft Kontrollen hëlleft et d'Vitess ze thematiséieren. Wat méi driwwer geschwat gëtt, wat d'Leit et sech natierlech och méi bewosst sinn. Dat hei ass dann e Moyen, fir Europawäit nach eng Kéier driwwer ze schwätzen.

Ëm 6 Auer en Donneschdeg de Moien geet d'Aktioun op en Enn an da gëtt Bilan gezunn. Bis dohinner muss all Patrull op d'mannst eng Kontroll gemaach hunn.

Vitesskontrollen / Reportage Dany Rasqué



ARTIKEL op 5minutes.rtl.lu mat allen Tweete vun der Police.

Organiséiert gëtt dës Initiativ vum europäesche Netzwierk vun der Stroosse-Police. Et ass schonn déi drëtt Editioun, bei där och Lëtzebuerg matmécht.



Während 24 Stonnen gëtt verstäerkt präventiv a repressiv kontrolléiert. Awer net nëmmen op de Stroossen hei am Land heescht et oppassen, och an der Grenzregioun. Well och eis Nopeschlänner, Däitschland, Frankräich an d'Belsch, si massiv am Asaz an hu verschäerfte Vitess-Kontrollen annoncéiert.