VIDEO: Jean Asselborn mécht de PointIrakesch Dossiere gi prioritär behandelt

Déi meescht Demandeurs de Protection sinn aus Syrien a Serbien, mä d'Leit aus dem Irak ginn am Ament virgezunn.

Irakesch Dossiere gi prioritär behandelt (20.04.2017)
Déi meescht Demandeurs de Protection sinn aus Syrien a Serbien, mä d'Leit aus dem Irak ginn am Ament virgezunn.

D'Majoritéit vun den Demandeurs de Protection Internationale, déi zënter dem 1. Januar op Lëtzebuerg koumen, huet déi syresch Nationalitéit. Europawäit gouf d'Decisioun geholl, datt dës Leit de Flüchtlingsstatut kréien.

Net grad esou evident ass et, bei Mënschen aus dem Afghanistan oder dem Irak. Virun allem Leit aus dem Irak hate sech driwwer beschwéiert, datt hir Prozedur esou laang dauert, do ginn et awer elo Progrèsen.

Rasque: Band Asselborn



Vum 1. Januar 2015 bis haut hu 722 Iraker hei am Land Asyl gefrot. 133 Persoune kruten de Statut accordéiert, 94 Mol gouf e refuséiert. Et sinn och Leit, déi hir Demande zeréckgezunn hunn an et ginn 338 Fäll, wou nach eng Decisioun geholl gi muss.
Et geet hei ëm 53 Familljen an ëm 135 Männer, déi eleng op Lëtzebuerg koumen an hiert Waarden huet geschwënn en Enn.

"Mir sinn am Ministère elo drun, vrun allem mat den Iraker gutt virunzekommen, well mer massiv um irakeschen Dossier geschafft hunn. Fënnef vun zéng Decideure schaffe permanent un deenen Dossieren, sou dass mer September/Oktober 2017 misste bäi si mat de Leit aus dem Irak."

Dat ass allerdéngs net de Fall bei de Leit, déi aus dem Afghanistan kommen.

Et ginn den Ament 277 Demande vun Afghanen, 12 vun hinnen hunn de Statut kritt an 28 mol waren et sougenannten Dublin-Fäll.
Den Ament sinn nach 31 Familljen an der Prozedur an 113 Männer, déi eleng hei sinn. Mir mussen Efforte maachen, wat déi afghanesch Populatioun ugeet, seet den Ausseminister Jean Asselborn.

E gëtt awer och eng Explikatioun, firwat et dauert. Et goufen zwar 10 Leit agestallt, mä vun deene sinn der 4-6 am Ausland detachéiert. Am allgemengen ass de Jean Asselborn awer optimistesch, datt de Grand-Duché déi Situatioun meeschtert.

Op enger Pressekonferenz iwwert verschidden Aspekter vun der Immigratiounspolitik huet den Ausseminister Jean Asselborn den Donneschdeg de Moien eng Rei Chiffere genannt.

Et sinn 155 Leit, déi aus Syrien an d'Land koumen. Wann een dann déi 52 vun der Relocalisatioun ofzielt, ass awer Serbien vir, dat sinn 107 Leit. Dono kéim de Marokko mat 80 Leit, Algerien mat 67, Albanien mat 54 an da Georgien direkt hannendrun, dat wier e ganz neie Phänomen, mat 48. Wann een awer elo kuckt, wou déi Leit hierkommen, gesäit een, datt aus Serbien zum Beispill 92 Prozent vun de Leit Dublin-Fäll sinn. Och Marokko, Algerien a Georgien leien iwwer 90 Prozent. Aus Albanien dogéint si just 37 Prozent Dublin-Fäll.

Extrait Jean Asselborn



En Dublin-Fall bedeit, datt dës Leit schonn an aneren EU-Memberlänner deboutéiert sinn, respektiv an engem anere Memberland schonn an enger Prozedur sinn, an net am Grand Duché kënne bleiwen.