Bilan Omega 90Et feelt un engem nationale Plang fir d'Soins palliatifs!

Dat huet Omega 90 um Méindeg op der Presentatioun vun hirem Joresrapport ënnerstrach.

© Jeannot Meyers / RTL Télé Lëtzebuerg
Omega 90/Reportage Carmen Michels



D'Aktivitéite vun der Associatioun sinn a 4 Servicer opgedeelt a beschäftege sech mat de Froe ronderëm d'Enn vum Liewe. Iwwer 5 Millioune goufen eleng dëst Joer fir d'Servicer ausginn,
wouvun 11% aus Done bestinn. Vill Geld, wat erkläert, wéi wichteg et ass, ee Plang fir d'Zukunft auszeschaffen.

Krank sinn, op d'Enn vum Liewen zougoen, stierwen, traueren, dëst sinn d'Themen, mat deenen Omega 90 sech auserneesetzt. Nieft dem Service de Consultatioun, deen 2016 eng ronn 1.000 Persoune begleet huet, goufen 109 Patienten „en fin de vie“ am Haus Omega betreit. D'Haus, wat de Patiente bis zum Enn eng gewësse Liewensqualitéit versprécht, gouf 2016 iwwregens mam Schwäizer Label „qualité palliative“ ausgezeechent an zielt domat elo zum éischten zertifiéierte Lëtzebuergeschen Center fir Soins palliatifs. Och wa sech eng ganz Rei Saachen iwwer déi lescht Jore verbessert hätten, esou zum Beispill um finanzielle Plang, wier et wichteg een Nationale Plang fir d'Zukunft auszeschaffen, esou den Henri Grün, Direkter vun Omega 90.

Den Henri Grün (19.06.2017)
.

¾ vun de Leit, déi an een Altersheem ginn, stierwen och hei. A verschidden Institutioune sinn et esou guer bis zu 40% vun de Patienten, déi am Laf vum Joer verscheeden. Dohier wier et wichteg, dass d'Institutiounen eng qualitativ héichwäerteg Betreiung garantéieren, also eng sougenannte Palliativ-Kultur entwéckelen, esou den Henri Grün. De Pilotprojet „palliative geratrie“, deen 2016 an d'Liewe geruff gouf, huet genee dëst zum Zil.

De Service de Formation, dee sech ëm dëse Projet këmmert, huet dëst Joer iwwerdeems 850 Persounen am Beräich „Soins palliatifs“ forméiert. An och am Service Benevolat, deen insgesamt 64 aktiv Benevollen zielt, hunn 13 nei Fräiwëlleger hir Formatioun ofgeschloss.



Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.