VIDEO: Nom Inferno zu LondonSi mir op de Brand an engem Héichhaus virbereet?

Gefaang an engem Héichhaus dat brennt. En Albdram, deen d'Awunner vum Grenfell Tower d'lescht Woch duerchgemaach hunn.

Si mir op de Brand an engem Héichhaus virbereet? (19.06.2017)
Gefaang an engem Héichhaus dat brennt. En Albdram, deen d'Awunner vum Grenfell Tower lescht Woch duerchgemaach hunn.
Den Damp war esou déck, an huet de Leit d'Vue geholl, si hunn näischt méi gesinn, goufe vun hire Léifste getrennt.

48 Stonnen hunn d'Pompjeeë gebraucht fir d'Feier ze läschen. D'Autoritéite ginn aktuell vun ëm déi 80 Doudesaffer aus. Vill Blesséierter leien nach am Spidol.

Hei zu Lëtzebuerg hu mer der zwar esou net vill, mä wéi sinn eis Leit op Asätz an Héichhaiser virbereet?

D’Stater Beruffspompjeeë hu sech bereet erkläert, eis dat an der RTL City, dem neie 64 Meter héije Gebai um Kierchbierg, ze weisen.

An d’Kategorie Héichhaus falen all d’Gebaier vun 22 Meter Héicht a méi. Si mussen agebaute Steigleitungen hunn, wou d’Pompjeeën hir Schläich kënnen drun uschléissen, fir d'Läschwaasser séier op dee Stack ze leeden, wou et gebraucht gëtt.

Ausserdeem mussen et zwee Trapenhaiser ginn. Am Glenfell Tower dogéint gouf et just een eenzegt Trapenhaus, dofir koume vill Leit guer net aus dem brennende Gebai eraus. Hei zu Lëtzebuerg ass et och obligatoresch, datt all Héichhaus e Pompjeeslift huet.

Och am Adress-Hotel zu Dubai, dee Silvester 2015 a Flamen opgaangen ass, war d’Fassade eng vun den Ursaachen, firwat d’Feier esou séier virugaangen ass. Esou d’Conclusioun vum Lëtzebuerger Gilles Kleins, deen zu Dubai als Expert fir Brandschutz schafft an de Site nom Brand ënnersicht hat.



Fir esou fatal Bränn ze verhënneren, huet de Lëtzebuerger ee  spezielle System entwéckelt, deen an de Baussemauere vun de Wollekekrazer kann integréiert ginn.

Mat der Entwécklung vun neien Technologië ginn also och d'Brandschutzssystemer an d'Läschmethode permanent verbessert.

Den Awunner vum Glenfell Tower sollt dat näischt hëllefen. Och wann d'Héichhaus mat den 120 soziale Wunnengen eréischt virun e puer Joer renovéiert gouf, schéngt et, wéi wann déi Responsabel déi elementäerst Sécherheetsvirschrëften net respektéiert hätten.

E Reportage vum Raphaëlle Dickes



Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.