VIDEO: LSAP zitt positive Bilan vum leschte ChamberjoerSeele goufe sou vill Projeten ëmgesat wéi 2016/17

D'Schoulreform, d'Gesetz fir den Ofbau vu Weltraumressourcen,d'Omnibusgesetz, d'Nationalitéitegesetz, d'Neiuerdnung vum Sozialdialog an de Betriber etc.

Bilan LSAP: 100 Gesetzer duerch d'Chamber bruecht (17.07.2017)
D’LSAP-Fraktioun zitt, iwwer déi lescht 10 Méint gekuckt, e positive Bilan vun der Aarbecht an der Chamber.

Et wären ëmmer gutt gefëllte Sëtzunge gewiescht. Wäit iwwer 100 Gesetzer wären duerch d'Chamber gaangen, betount d'LSAP. Awer d'CSV stoung virun der Summervakanz nach eng Kéier besonnesch an der Kritik vun der LSAP.

D'Regierungskoalitioun huet sech nämlech och am schwieregen, zweetleschte Joer vun hirer Mandatsperiod drun ginn an och méi kriddeleg Dossieren solidaresch zesummen ugepaakt. Dat war de ganz positiven Constat vum LSAP Fraktiounschef Alex Bodry.

D'Zesummeliewen an enger Regierung mat 3 Parteie wär immens gutt, fënnt d'LSAP, souguer dacks besser wéi zu 2.

CSV ouni Iddien, ADR ze vill riets, déi Lénk net realistesch

A punkto Chamberwalen 2018 steet d'Fro vu méigleche Koalitiounspartner fir d'Sozialisten am Raum. Et wär wichteg, net nëmmen ze diskutéiere wien wéi eng Positioun kritt, ma dass ee virun allem diskutéiert wat ee maache wéilt an do wär mat der CSV, bis op Weideres, net mat neien Iddien ze rechnen.

Donieft géing d'ADR, ënnert dem Fernand Kartheiser, ëmmer méi an dat nationalkonservatiivt Lager ofrëtschen an sech ganz gewot riets vun der CSV positionéieren. D'ADR géing domat enger Softversioun vun der AFD (Alternative für Deutschland) gläichen an géing sech domat selwer fir all aner Partei hei am Land als Koalitiounspartner ecartéieren.

Déi Lénk anerersäits hätten zwar ganz sympathesch Iddien, ma wäre gefaangen an der Blos vun enger idealer Welt. Se géingen alles bekämpfe wat zum Wirtschaftsmodell vu Lëtzebuerg gehéiert a wéilten ëmmer weider ausdeelen an dat wär eng Rechnung déi sou net kéint opgoen, erkläert den Alex Bodry.

Wéi geet et weider?

2017/18 ass dat lescht Joer vun dëser Legislaturperiod an och do sinn nach eng Partie Projeten op der Lee. De leschte Volet vun der Trennung vu Kierch a Staat, d'Police-Reform, de Spidol-Plang an eventuell och d'Reform vum Scheedungsgesetz.

De komplette Reportage:

LSAP Bilan 16/17: Annick Goerens

 


Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.