VIDEO: DNA-Prouf soll Gewëssheet bréngenHuet e Wollef am Raum Holzem-Garnech 8 Schof gerass?

Ass de Wollef zeréck zu Lëtzebuerg oder net? Op alle Fall gëtt et ëmmer méi Indicen, datt dat kéint esou sinn. - Fotoen a Video.

Et ass deen éischte konkrete Verdachtsfall hei am Land an de leschte Joren, datt e Wollef méiglecherweis Déieren hei zu Lëtzebuerg gerass huet. De leschte Samschdeg huet e Bauer vun Holzem den zoustännegen Instanzen 8 doudeg Schof bei sech an der Wiss, net wäit ewech vun Holzem, gemellt. En Déier - war et e Wollef oder net? - hat dee ganzen Trapp agresséiert an attackéiert. Nach ass et ze fréi fir eng definitiv Konklusioun ze zéien. Duerfir mussen d'Resultater vun den DNA-Prouwen ofgewaart ginn. Ma et gëtt näischt, heescht et vun der Naturverwaltung, dat et erlabe géif e Wollef auszeschléissen.

Wollef am Raum Holzem-Garnech? Rep. Claude Zeimetz



Et muss wierklech kee schéint Bild gewiescht sinn, wéi de Bauer Robert Ruden e Samschdeg bei seng Schof komm ass, déi e schonn zanter enger Dose Joren do hält. Normalerweis kommen déi 14 Schof scho gelaf, wann de Mann mat sengem gielen Auto gefuer kënnt. E Samschdeg war dat net de Fall - et waren nach just 4 Schof do an déi hunn net bougéiert ... Eent louch an enger Heck, et war stramm blesséiert. Een anert hat d'Strass duerchgerappt, dat huet de Veterinär, dee geruff gi war, festgestallt.

Alles an allem goufen 8 vun de 14 Schof gerass. 4 sinn der blesséiert. Zwee wäerten d'Attack wuel net iwwerliewen an nach zwee anerer si bis haut net erëmfonnt ginn. De betraffene Bauer huet samschdes nieft dem Veterinär direkt och d'Naturverwaltung kontaktéiert an déi koumen nach owes mat enger Equipe vu 6 Leit op Plaz. Ënnert hinnen den Directeur-adjoint Laurent Schley. Si hunn déi ganz Wiss bis e Sonndeg no Spuren, Hoer oder soss Indicen duerchsicht ... a si hunn näischt fonnt, wouduerch een de Wollef als "Täter" ausschléisse kéint. An deenen allermeeschte Fäll vun esou Rëss géif een Elementer fannen, déi weise géifen, dat eppes net typesch fir e Wollef wier - an dësem Fall wier dat anescht, et hätt een näischt Atypesches fir de Wollef fonnt, dofir wier d'Probabilitéit, datt et wierklech e Wollef war, relativ grouss. Dofir goufe Prouwe geholl.

De Laurent Schley bleift also virsiichteg, wier awer u sech weider net iwwerrascht, sollt de Wollef wierklech zréck zu Lëtzebuerg sinn. Vill aner Hypotheese wéi e Wollef gëtt et nämlech net. A Fro kéime just nach grouss Hënn. D'DNA-Analys soll dat elo klären ... wann dat gesammelt Material net schonn ze al war. D'Resultater vun den Analysen dierfte wuel e Mount op sech waarde loossen.

De Laurent Schley iwwert de Wollef zu Lëtzebuerg
De Laurent Schley ass Directeur-adjoint vun der Natur- a Bëschverwaltung.



D'Experte vun der Naturverwaltung tippen éischter op en Eenzeldéier, dat d'Schof attackéiert huet. Ma Gewëssheet gëtt et och op deem Punkt net.

Un d'Baueren, respektiv d'Schofsziichter an der Géigend ass et nach de gudde Rot, vläicht hiren Drot an de Wisen nozebesseren. Sollt sech de konkrete Verdachtsfall vum Wollef confirméieren, géifen déi Betraffen hir Preventiounsmesuren zu 75% vum Staat subventionéiert kréien.

Dem Bauer Ruden geet et, wéi e seet, net ëm d'Suen. Hie géif fir, bei engem Wollef, komplett fir de Schued entschiedegt ginn, mä hien hofft elo mol, datt d'Analys e konkret Resultat bréngt, datt een also gewuer gëtt, wien d'Schof gerass huet, well: "Ech sinn net méi esou king, Schof hei an dëser Wiss lafen ze loossen."

E Wollef bei am Raum Holzem-Garnech? (17.07.2017)
D'Unzeechen, datt e Wollef op Lëtzebuerger Territoire ass, ginn ëmmer méi kloer.

De Weekend iwwer sinn 8 Schof bei Garnech gerass ginn, e puer Kilometer vun där Plaz ewech, wou ee Bauer virun zwou Wochen een Deier fotographéiert hat, wat der Naturverwaltung no praktesch sécher ee Wollef war. D'DNA-Analyse vun de Bësswonne vun de Schof solle lo Kloerheet bréngen



Zanter der Foto, déi e Bauer vu Leideleng déi virlescht Woch wahrscheinlech vun engem Wollef gemaach huet, huet d'Naturverwaltung iwwregens nach eng 7, 8 aner Observatioune gemellt kritt. Ma just eng, déi vu Biissen aus dem Bësch, war vun deene plausibel.

RTL NEWS: Naturverwaltung: Konkret Preuve vu Wollef net 100%-eg

All Verdachtsfäll kënnen op enger Hotline gemellt ginn, déi un all d'Baueren, Jeeër an Ziichter am Kader vum Wollef-Aktiounsplang verdeelt gouf.

De Grand-Duché huet sech jo déi lescht Jore schonn op de Retour vum Wollef hei am Land preparéiert. Am Februar gouf en Aktiouns- a Managementsplang virgestallt, an deem den Ëmgang mam Wollef gereegelt gëtt. An deem Plang sinn ënnert anerem och finanziell Entschiedegungen fir betraffe Baueren, déi Béischte vun engem Wollef gerass kréien, virgesinn.

Sollt sech erausstellen, datt et sech am Fall vun Holzem effektiv ëm e Wollef handelt, géif de Concernéierten zu 100% entschiedegt ginn.

RTL NEWS: De Wollef ka kommen! Aktiounsplang ass do

Wat e méigleche Wollef zu Biissen ugeet, ass et eisen Informatiounen esou, datt et sech beim Déier op de Fotoen, déi publizéiert goufen, effektiv ëm en Hond, e Berger malinois fir genee ze sinn, handelt. Den Hobbyfotograf, dee sech bei der Naturverwaltung gemellt hat, bleift awer derbäi, datt hien am Bësch e Wollef gesinn hätt. Eng Foto vun deem Déier gëtt et allerdéngs net. Sou datt d'Autoritéiten déi Ausso weder dementéieren, nach confirméiere kënnen.

D'Naturverwaltung erkläert an engem Communiqué, datt de Wollef zanter 25 Joer lo schonn nees zréck an Europa ass. Wëllef goufe schonn an der rezenter Vergaangenheet an der franséischer Grenzregioun an an Däitschland a Polen gemellt. Dohier wier et just eng Fro vun der Zäit gewiescht, bis sech d'Wëllef och nees zu Lëtzebuerg néierzeloossen.

Dee leschte Wollef zu Lëtzebuerg war iwwregens 1893 zu Ouljen erschoss ginn ... vun engem Här Wolff.



COMMUNIQUÉ

Schafsrisse bei Garnich – DNA-Proben sollen Aufschluss über den Verursacher liefern (17.07.2017)

Communiqué par: ministère du Développement durable et des Infrastructures / Département de l'environnement

Am vergangenen Samstag fand ein Landwirt im Raum Garnich auf einer Weide acht gerissene Schafe. Die Weide ist nur wenige Kilometer von dem Ort nahe Leudelingen entfernt, wo vor zwei Wochen ein wolfsähnliches Tier fotografiert worden war. Der Landwirt verständigte daher sofort die Naturverwaltung, die am späten Samstagabend mit einigen Experten mehrere Stunden vor Ort war.

Die Experten der Naturverwaltung untersuchten die Umgebung sowie die gerissenen Schafe eingehend, und nahmen DNA-Proben an den Bisswunden. Die Proben werden in den nächsten Wochen am Senckenberg-Institut Gelnhausen (Deutschland) untersucht.

Auch ein Wolf als Verursacher auf Grund der Untersuchungen im Feld nicht ausgeschlossen werden kann, so darf nicht vergessen werden, dass auch Haushunde regelmäßig Schafe reißen. Eine definitive Schlussfolgerung kann daher im Falle Garnich erst dann getroffen werden, wenn die Resultate der DNA-Proben vorliegen. Diese Untersuchung kann mehrere Wochen dauern.

Der Aktions- und Managementplan für den Umgang mit Wölfen in Luxemburg, der unter anderem zusammen mit Akteuren aus dem landwirtschaftlichen Sektor erstellt wurde, sieht im Falle von Wolfsrissen eine finanzielle Entschädigung der betroffenen Landwirte vor.

Seit etwa 25 Jahren besiedelt der Wolf wieder Europa. Auf Grund seiner Anwesenheit im französischen Grenzgebiet seit einigen Jahren, sowie auch der Ausbreitung der deutsch-polnischen Population nach Westen, war es nur eine Frage der Zeit, bis auch in Luxemburg wieder Wölfe heimisch werden würden.

Wölfe sind scheue Tiere und meiden in der Regel den direkten Kontakt zum Menschen. Begegnungen zwischen Mensch und Wolf sind daher äußerst selten, aber nicht unmöglich. In der Regel ziehen sich Wölfe zurück, sobald sie einen Menschen bemerken.