Op der A13 gestopptSuicide-Menace, Camionneur wollt an Haus vu Frëndin rennen

En Donneschdeg de Moien gouf e Camion op der Grenzbréck vun der A13 vun der Police gestoppt. De Chauffer hat e Mëttwoch annoncéiert sech ze suicidéieren.

© RTL Télé Lëtzebuerg / Domingos Oliveira

E Mëttwoch den Owend um 20.30 Auer hat en 33 Joer ale Camionschauffer sech bei der Police vu Lebach gemellt. De Mann, deen am Landkrees Saarlouis wunnt, huet de Beamte matgedeelt, dass hie mat engem eidelen Zetärscamion an der Belsch ënnerwee wier a sech wéilt d'Liewen huelen. Hien hätt d'Intentioun seng deemoleg Partnerin mat an den Doud ze rappen, andeems hie mam Camion an d'Haus zu Saarbrécken wéilt fueren, wou sech déi 35 Joer al Fra géing ophalen.

Eng Spezialunitéit huet de Camionneur kontaktéiert. Hinnen ass et gelongen de Chauffer, deen an engem psycheschen Ausnamezoustand war, dozou ze bewegen, mat sengem Camion um Parking "Moseltal" stoen ze bleiwen. Ma nach ier, d'Police do ukoum, ass de Mann nees weidergefuer.

D'Beamte vun der Spezialunitéit hunn de Camion op der Grenzbréck vun der A13 eriwwer op déi däitsch A8 mat Hëllef vun enger Ketten aus Neel gestoppt an de Chauffer festgeholl.

Bei der Aktioun gouf och en zweeten, onbedeelegten Auto beschiedegt. Béid Gefierer konnte net ofgeschleeft ginn, si hu misse sur place gefléckt ginn.

Géint 10 Auer war d'Streck tëscht Schengen a Pärel nees op.

Uganks hat et geheescht, dass d'Police op der däitsch-lëtzebuergescher Grenz am Asaz wier, well op der Grenzbréck zu Schengen e Camion eng Pann hätt. Béid Fuerbunnen an Direktioun Saarbrécken wieren dowéinst gespaart ginn.