VIDEO: No Juncker-KritikBettel: Mir hu fir esou Decisiounen net op Macron gewaart

"En historesche Feeler", esou nennt de Kommissiounspresident Juncker d'Positioun vun der Lëtzebuerger Regierung a Saache Besteierung vu Multinationalen.

Extrait Xavier Bettel (16.11.2017)
De Lëtzebuerger Premier reagéiert op d'Aussoe vum EU-Kommissiounspresident Jean-Claude Juncker.

Am RTL-Interview huet de Lëtzebuerger Premier Xavier Bettel op d'Aussoe vum Kommissiounspresident reagéiert. Hien huet sech iwwerrascht iwwer d'Ausso gewisen an dorobber verwisen, datt déi aktuell Regierung fir Transparenz gesuergt huet an Europa kompetitiv muss bleiwen, vis-à-vis vun den USA a gläich och Groussbritannien.

"Ech sinn iwwerrascht iwwer d'Aussoe vum Jean-Claude Juncker, well mir kréie virgeworf, mir géife verschidden Dossiere blockéieren. Mir si vun 2013 un op engem Wee vun Transparenz. Mir sinn déi, déi gesot hunn, dat et net normal ass, datt verschidde Betriber keng Steiere bezuelen. Mir sinn der Meenung, datt awer Europa och sech muss kënne verteidege vis-à-vis vun Amerika, vis-à-vis vu Groussbritannien muer, an net manner kompetitiv ginn, just fir ze mengen, et hätt een dann eppes Guddes gemaach.

Wéi gesot, mir hunn och net op den Här Macron gewaart, fir esou Decisiounen ze huelen an ech mengen, datt an deene ganze Froen, déi sech am Moment stellen, d'CSV-Fraktioun vu Bréissel éischter diskret soll optrieden. Dës Regierung huet eppes gemaach"

Besteierung vu Multinationalen: Juncker kritiséiert Lëtzebuerger Regierung



Gemengt si Firme wéi Google, Amazon oder Apple, déi am digitale Beräich aktiv sinn.

Lëtzebuerg géif d'Propositiounen vun der Kommissioun an deem Beräich blockéieren, bedauert de fréiere Lëtzebuerger Premier am Interview um Internetsite vum Paperjam a warnt säi Successeur: Sollt dee just ëmmer "Nee" soen, hätt e keen Afloss op d'Architekture vun der globaliséierter Welt.

De Jean-Claude Juncker versteet, eegenen Aussoen no, net firwat déi Lëtzebuerger Regierung et net dem franséische President Macron no mécht mat deem een eng intim Frëndschaft revendiquéiert.  Et wier wéi gesot en historesche Feeler fir d’Beneficer vu Multinationalen net appropriéiert besteieren ze wëllen, déi op der ganzer Welt aktiv sinn an net déi Steiere bezuelen déi se missten.



D'EU-Kommissioun wëll, dem Paperjam no, Uganks des Joers nei Propositioune fir méi eng gerecht Besteierung an der digitaler Wirtschaft maachen. De Jean-Claude Juncker strieft en internationalen Accord bis d'Fréijoer un. D'Europäesch Unioun misst prett sinn an dësem Beräich mam gudde Beispill virzegoen, sou de Kommissiounspresident am Interview.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.