NEI FOTOEN AN NEI VIDEOEN - De "Siggi" fiertTrotz Schnéi konnten Tram a Funiculaire wéi geplangt starten

Den 10. Dezember huet am Land quasi de komplette Bus- an Zuch-Reseau geännert: Doran integréiert elo den Tram, de Funiculaire an den neien Arrêt Pafendall.

1964 war e fir d'lescht hei am Land gefuer ... vun elo u fiert en dann nees: den Tram. Eng Never-Ending-Story, déi dann elo awer e Schluss fonnt huet - awer just ee virleefegen ...

Inauguratioun: Dee feierlechen Deel vum Tram-Optakt (10.12.2017)
D'Ouverture mat de Rieden am Resumé. Den 10. Dezember geet an d'Geschicht an, op d'mannst an déi vun der Lëtzebuerger Mobilitéit ...


E Sonndeg de Moien um 10 Auer hunn d'Festivitéiten ugefaangen, a Presenz vun ënnert anerem der groussherzoglecher Koppel, dem Premier Xavier Bettel an dem Minister François Bausch.



Et goung vun der neier Gare Houwald op den Arrêt am Pafendall, mam Funiculaire erop bei d'Rout Bréck an da mam Tram de Kierchbierg erop bis bei d'Luxexpo. Eent nom anere gouf um Sonndeg de Moien ageweit.

RTL-NEWS MAT VIDEO: Tram ageweit a Rouleau "entgleist" ... op d'Grande-Duchesse.

Band vum Funiculaire duerchgeschnidden. (10.12.2017)
.

Déi éischt Faart mam Funiculaire (10.12.2017)
.

Éischt Faart mam Siggi fir d'groussherzoglech Koppel (10.12.2017)
.

Déi éischt Faart mam Tram (10.12.2017)
.

1, 2, 3 ... a lass! (10.12.2017)
.


Am neien Tramsschapp war dunn deen offiziellen Deel: An de Riede gouf vill op d’Geschicht vum Tram gekuckt. Och op d’Alternativen, déi et zum Tram gouf. Do zum Beispill de BTB-Projet, deen an der Diskussioun war, deen awer ze vill controverséierte war, esou den Infrastrukturminister François Bausch. "Den Tram ass kee Selbstzweck, mä en Deel vun engem Konzept", sot de Premier Xavier Bettel.

Extrait Xavier Bettel.



Et gouf awer och op d’Zukunft gekuckt, wat den Tram fir Positives mat sech brénge wäert.

An hirer offizieller Ried huet d’Buergermeeschtesch Lydie Polfer vun enger neier Complementaritéit geschwat, déi tëscht de verschidden Transportmëttel geschaf goufen. Den Tram wäert eis d’Méiglechkeet ginn, d’Bild op ville Plaze vun der Stad méi schéin ze maachen

Um 13 Auer sinn déi verschidde Servicer a Betrib gaangen, dat heescht, d’Leit konnte sech vun deem Ament u jee no Zuchlinn bis op den Arrêt Pafendall-Kierchbierg fueren, an de Funiculaire klammen an um Kierchbierg mam Tram weider bis bei d’Luxexpo fueren. An dovun hunn nawell vill Leit profitéiert!

RTL-NEWS: Groussen Interessi um éischten Dag.

Et goufen och verschidden Animatiounen ugebueden, wéi e klenge Chrëschtmaart op der Plattform vum Funiculaire oder en Zelt mat Spiller bei der Tramstatioun Luxexpo. Op dësen a weidere Plaze waren och Informatiounsstänn, wou een all d’Detailer erkläert krut.

Den 10. Dezember war iwwregens och de ganzen ëffentlechen Transport am Land gratis. An dat war net vu Muttwëll, well moies huet et nawell vill geschneit, an am Nomëtteg a géint der Owend nawell kräfteg gereent ... trotzdeem konnt alles wéi geplangt ageweit, getest a kommentéiert ginn.

COMMENTAIRE: Datt den Tram elo fiert, ass e Wonner. Tëscheruff vum Luc Marteling.

RTL-Express Spezial Tram vum 10. Dezember 2017 (10.12.2017)
Dat Wichtegst vun de leschte Stonne kuerz zesummegefaasst.


RTL-NEWS: Selbstversuch: Mam Zuch-Funiculaire-Tram-Ze Fouss op d'Schaff

Changementer vum 10. Dezember un
D'CFL hunn hire ganzen Horaire iwwerschafft, dee spillt vum 10. Dezember un. Derbäi kommen eng sëllechen RGTR-Buslinnen, déi och an deem Kader adaptéiert goufen. An natierlech ginn et vun deem Dag un natierlech um Gebitt vun der Stad gréisser Changementer, duerch de Start vum Tram.

Startschoss dann och vun den neie Garen um Houwald an ënnert der Rouder Bréck, grad wéi dem Funiculaire aus dem Pafendall erop op de Kierchbierg. Genee do fiert dann eben den Tram, elo mol bis erop bei d'Foireshalen, iwwer 8 Arrête mat 9 Rammen.

Den Tram fiert 7 Deeg an der Woch. An der Woch fiert deen Éischte moies bei der Luxexpo um 4.42 Auer fort. Dee leschten Tram fiert géint Hallefnuecht bei der Rouder Bréck zréck an de Schapp.

An der Woch kënnt tëscht 6.30 an 19.30 Auer all 6 Minutten en Tram, baussent deenen Auerzäiten all 10 bis 15 Minutten. Jidderee ka 420 Leit mathuelen.



PDF: All d'Informatiounen iwwer den neie Bus- Zuch- an Tram-Reseau.

Bis den 31. Januar 2018 kënnen d'Leit gratis mam Tram fueren.

Och de städtesche Bus-Reseau huet sech un déi nei Arrêten ugepasst. Ganz nei ass och, dass um Kierchbierg quasi keng Busse méi um Boulevard John F. Kennedy wäerten hale bleiwen, mä dass haaptsächlech de Boulevard Konrad Adenauer ugefuer gëtt.

E kengen Historique

Charlie, Jangli an elo de Siggi, esou ass den Tram iwwer RTL gedeeft ginn. Schonn 1875 ass et een Tram an der Stad ginn, deemools nach mat engem PS. Vun 1908 un ass en elektresch ginn, éier 1964 den Tram vun de Stroosse verschwonnen ass.

Enn den 90er ass d'Iddi vum BTB opkomm, de Bus-Tram-Bunn-Projet. En éischt multimodaalt Konzept, wou verschidde Verkéiersmëttel vernetzt funktionéieren. Eng Iddi, déi net nëmmen op Zousproch gestouss ass. Iwwerierdesch, ënnerierdesch - alles konnt een sech Enn den 90er virstellen, ëmgesat gouf awer näischt.

Vun e Sonndeg u kann een dann no 53 Joer déi éischte Kéier nees zu Lëtzebuerg mam Tram fueren ...

Modernen Tram: No 25 Joer elo Realitéit (08.12.2017)
Mam leschten alen Tram aus dem Joer 1964 kann een am Musée an der Rue de Bouillon e puer Meter fueren. Vum 10. Dezember u kann een da mam neien Tram fueren.


RTL-News: Den Nico Graf huet mam Romain Rech, Responsabel vum Tram-Musée, geschwat.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.