Lëtzebuergerin a Lëtzebuerger vum Joer 2017Martine Kohl vun de Street Angels a Polizist André Bichel

De Verdikt vun den RTL.lu-User ass kloer: Honoréiert gi soziaalt Engagement am Déngscht vun de Sans-Abrien an eng Liewensrettung a leschter Sekonn.

Martine Kohl vun de Street Angels a Polizist André Bichel (01.01.2018)
Reportage iwwer d'Lëtzebuergerin an de Lëtzebuerger vum Joer 2017
D'Decisioun ass gefall: Ronn 2.500 Leit hunn op RTL.lu ofgestëmmt an hir Perséinlechkeete vum vergaangene Joer gewielt.

Fir d'éischt konnten d'User Nimm vu Kandidate proposéieren, doraus goufe 15 Kandidatinnen a 15 Kandidaten zeréckbehalen an an den zwou leschten Dezember-Woche konnten du Stëmme vergi ginn. Wien e Login op RTL.lu hat, konnt bei den Dammen a bei den Häre maximal 6 Stëmmer verginn, awer net méi wéi 3 pro Kandidatin/Kandidat. Doraus erauskomm ass ee klore Verdikt:

Den Éierentitel "Lëtzebuergerin vum Joer 2017" geet un d'Martine Kohl vun den "Street Angels". Si war mat dëser Begrënnung nominéiert ginn:

Well si sech fir Sans-Abrien asetzt. Si versuergt se mat Kleeder a Schlofsäck a verdeelt all Samschdeg waarmt Iessen a Gedrénks.

Lëtzebuergerin vum Joer 2017: Martine Kohl (31.12.2017)
Eng éischt Reaktioun


Den Éierentitel "Lëtzebuerger vum Joer 2017" ass fir de Polizist André Bichel. Hie war nominéiert gi well:

De Policebeamten huet am Januar groussen Zivilcourage bewisen, andeems en enger Fra d'Liewe gerett huet, déi op engem gefruere Weier agebrach war.

Lëtzebuerger vum Joer 2017: André Bichel (31.12.2017)
Wien ass de Laureat?


RTL felicitéiert dem Martine Kohl an dem André Bichel ganz häerzlech a seet och allen Utilisateuren, déi entweder e Kandidat proposéiert hunn an/oder duerno fir een ofgestëmmt hunn, en häerzleche Merci!

Op en Neits hunn d'Usere vun RTL.lu "Net-Promien" de Virzuch ginn a soziaalt Engagement an eng Liewensrettung honoréiert. Domat schéngt sech den Trend aus de leschte Joren, aussergewéinlech Leeschtungen oder dramatesch Schicksaler am Réckbléck ganz héich ze bewäerten, ze confirméieren. Déi zwee Laureaten 2017 ware richteg plebiscitéiert ginn.



Zanter e puer Joer ginn d'Lëtzebuergerin an de Lëtzebuerger vum Joer getrennt gewielt. Hei de Ranking vun den Top10 vun all de Stëmmen, wou dann effektiv 5 Hären a 5 Dammen dran opdauchen, och wann d'Männer méi wäit vir leien:

1) André Bichel
2) Martine Kohl
3) Gilles Muller
4) Yannis Bastian
5) Daniel Frères
6) Olivier Ferber
7) Sonja Do Santos
8) Line Didelot
9 )Carine Nickels
10) Anna Monzel

Hei d'Top 6 vun de getrennten Ofstëmmungen:

D'Top 6 vun den Dammen:

1) Martine Kohl
2) Sonja Do Santos
3) Line Didelot
4) Carine Nickels
5) Anna Monzel
6) Kimberly Nelting

D'Top 6 vun den Hären:


1) André Bichel
2) Gilles Muller
3) Yannis Bastian
4) Daniel Frères
5) Olivier Ferber
6) Pit Maas

Déi 2 Laureaten 2017 kruten iwwregens e Konschtwierk vum Sophie Dewalque iwwerreecht. D'Artistin hannert dem Moude-Label Sophi(e)stication (http://sophietication.wixsite.com/sophiestication) huet zwou wäiss Maus Kettye mat Lëtzebuerger Touch entworf.



Wéi ass de Vott ofgelaf?

Am Ufank konnten d'Leit op RTL.lu Kandidate proposéieren. Aus ronn 200 Proposen, déi eis Ufank Dezember erageschéckt goufen, hu mir allkéiers 15 Fraen an 15 Männer zeréckbehalen. Souwuel bei der Lëtzebuergerin wéi och beim Lëtzebuerger vum Joer hat duerno jidderee 6 Stëmmen. Eng Persoun konnt der maximal 3 kréien, dofir hate mir proposéiert, datt Äre Favorit der 3 kritt, Ären zweete Choix der zwou an Ären 3. Choix eng. Et huet een awer net mussen all seng Stëmme verginn an et huet een och net musse bei de Fraen an de Männer ofstëmmen.

Wéi konnt ee matmaachen? A gewannen?

Ronn 2.500 Leit hu bei der Wiel vun der Lëtzebuergerin an dem Lëtzebuerger vum Joer matgemaach, domat bleift d'Ofstëmmung populär, och wa si net no statistesch-wëssenschaftleche Critèren duerchgefouert gouf an héchstens representativ fir d'Utilisateure vun RTL.lu kéint sinn.



Fir matzemaachen, huet een en Account op RTL.lu gebraucht an da konnt een och eppes gewannen: 2 Geschenkbongen am Wäert vu jeeweils 1.500 Euro pro Bong offréiert Voyages Emile Weber. Wien déi glécklech Gewënner sinn, deele mer am Laf vun der nächster Woch mat. Si ginn dann och direkt kontaktéiert. Da verspille mir och d'Tasen aus der RTL-Kollektioun ënnert all deenen, déi eis e Kandidat proposéiert hunn.

Wie krut bis elo den Titel "Lëtzebuergerin" a "Lëtzebuerger vum Joer"?

2016: Nathalie Scheer (ALS-Patientin) a Marcel Steffen (Polizist)
2015
: Yasmine Grisius (Polizistin, posthume Präis) a Jean Asselborn (Ausseminister)
2014: Noémie Siebenaller a Camille Arend (zweemol e posthume Präis, well déi 2 Mataarbechter vun "Le soleil dans la main" ware bei engem Fligeraccident an Afrika ëm d'Liewe komm)
2013: Sylvie Conter (Riichterin) a Gaston Vogel (Affekot)
2012: Eliane Leger (Infirmière) a Romain Hilbes (Buschauffer a Liewensretter)
2011: Xavier Bettel (Stater Buergermeeschter)
2010: Andy Schleck (Vëlosfuerer)
2009: Andy Schleck (Vëlosfuerer)
2008: Jean-Claude Juncker (Premier)

Eréischt zanter 2012 ginn d'Lëtzebuergerin an de Lëtzebuerger vum Joer an zwou getrennten Ofstëmmunge gesicht.

Am Réckbléck:

RTL-News: Lëtzebuerger vum Joer 2016: ALS-Patientin Nathalie Scheer a Polizist Marcel Steffen
http://www.rtl.lu/letzebuerg//990806.html

RTL-NEWS: Lëtzebuerger vum Joer 2015: Polizistin Yasmine Grisius an Ausseminister Jean Asselborn
http://www.rtl.lu/letzebuerg//749533.html

RTL-NEWS: Lëtzebuerger vum Joer 2014: Noémie Siebenaller a Camille Arend gewielt
http://www.rtl.lu/lifestyle/people//595450.html

RTL-NEWS: Lëtzebuerger vum Joer 2013: Sylvie Conter a Gaston Vogel sinn d'Lëtzebuerger vum Joer
http://www.rtl.lu/lifestyle/people/498429.html

RTL-NEWS: Lëtzebuerger vum Joer 2012: Eng Infirmière an e Buschauffer - Eliane Leger a Romain Hilbes
http://www.rtl.lu/letzebuerg/371125.html

RTL-NEWS: Xavier Bettel heescht de "Lëtzebuerger vum Joer 2011"
http://www.rtl.lu/letzebuerg/177199.html

RTL-NEWS: De "Lëtzebuerger vum Joer 2010" heescht Andy Schleck!
http://www.rtl.lu/letzebuerg/90553.html

RTL-NEWS: RTL.LU: Andy Schleck heescht de Lëtzebuerger vum Joer 2009
http://www.rtl.lu/letzebuerg/54111.html

RTL-NEWS: RTL.LU: De Jean-Claude Juncker ass de Lëtzebuerger vum Joer 2008
http://www.rtl.lu/letzebuerg/3758.html

- - - - -

Klengen Appell un eis Commentateuren:

Dat Neit Joer ass jo nach ganz frësch, dofir sech net direkt ewell bei der éischter Nouvelle 2018 d'Käpp aschloen, ma w.e.g. mat e bësse Respekt a Sensibilitéit op de Vote reagéieren - och wann ee vläicht aus iergendengem Grond selwer enttäuscht ass ... Natierlech dierf een eppes gutt oder schlecht fannen, ma d'User hu proposéiert an decidéiert, jidderee konnt do matmaachen ... Merci fir Är Kooperatioun an Är Contributioun, datt den Debat friddlech bleift.

Nach eemol all Guddes fir 2018 :-)


- - - - -

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.