Déidlechen Accident op der N1219 Joer jonk Fra gestuerwen, klengt Kand net verwonnt

E Méindeg den Owend koum et op der N12, tëscht dem Léierhaff an Hierheck, zu engem ganz schroen Accident. Eng Automobilistin huet net iwwerlieft.

Éischten Informatiounen no hat eng Automobilistin kuerz no 21 Auer an enger Rietskéier, op der Héicht vum Léierhaff, d'Kontroll iwwert hire Won verluer a krut op där anerer Stroossesäit ee Bam ze paken. De Schock war hefteg.

D'Fra gouf an hirem Auto ageklemmt an uerg blesséiert. Si huet vun de Rettungsequippe missen aus dem Auto befreit ginn. Mat am Auto souz deen Ament e Kand vu 16 Méint. D'Kand gouf wéi duerch e Wonner net blesséiert.

En Dënschdeg de Moien dunn déi traureg Nouvelle, dass déi 19 Joer jonk Automobilistin vu Mäerzeg am Spidol un hiren schwéiere Verletzunge verscheet ass.

Op der Plaz waren 2 Ambulanze vu Réiden, de Samu vun Ettelbréck an aus der Stad, d'Pompjeeë vu Groussbus a Proz, sou wéi d'Police. D'Streck war bis 23.30 Auer fir den Trafic gespaart.

Eréischt de leschte Samschdeg haten an engem ganz uergen Accident op der N7 dräi Leit hiert Liewe gelooss.