VIDEO: PolvermillenAwunner schwätze mat Schäfferot

D'Awunner aus der Polvermillen hate sech rezent zesummegedoen, fir mam Schäfferot ze schwätzen.

Awunner schwätze mat Schäfferot (02.02.2018)
D'Awunner aus der Polvermillen hate sech rezent zesummegedoen, fir mam Schäfferot ze schwätzen.
D'Awunner aus dem klengste Stater Quartier, der Polvermillen hate sech rezent an engem Interesse-Veräin zesummegeschloss, fir op verschidde Mëssstänn an hirem Véierel opmierksam ze maachen. Zejoert haten d'Bierger och alleguerten hir Doleancë schrëftlech un den deemools nach blo-grénge Schäfferot eraginn. E Freideg sinn d'Leit vum Syndicat d'Initiative aus der Polvermillen op der Stater Gemeng empfaange ginn.

D'Leit, déi di knapp 400 Awunner aus dem klengste Stater Quartier vertrieden, waren de Freideg de Moie voller Hoffnung, dass si an der Stater Gemeng op en oppent Ouer stoussen, wat hier Fuerderungen uginn, virop och wat de fréieren Industrie-Site vun der Polvermillen ugeet, op deem Depollutiounsaarbechte lafen a wou spéider eng nei Cité mat 600 Awunner entstoe soll. Aner Suergen hu sech zum Beispill ëm de Bus-Horaire gedréit, grad wéi de Manktem u Parkplazen. No annerhallwer Stonn laangen Diskussioune war een op Säite vun de Bierger ganz positiv iwwerrascht.

Kléng Onzefriddenheet just wat de PAP Polvermillen ugeet, hei hätte sech d'Bierger gewënscht, dass de Schäfferot méi aktiv gëtt, fir Informatiounsaarbecht ze leeschten.

Ganz konkret huet een och op d'Suerg reagéiert, fir dass de Quartier nach besser un de Busreseau ugebonne gëtt.

D'Bierger aus der Polvermillen kruten deemno Satisfaktioun a kënnen also geschwënn zesumme mat der Gemeng hire Quartier ganz basisdemokratesch matgestalten.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.