Um Stater GeriichtHuet eng 38 Joer al Fra e 87 Joer ale Mann ausgenotzt?

Aus Léift wier Frëndschaft ginn an dunn Ofhängegkeet - an déi soll ausgenotzt gi sinn. Wéinst "Abus de faiblesse" muss sech elo eng Fra veräntwerten.

4 Joer Prisong, mat deelweisem Sursis probatoire, woubäi d'Oplo dora bestéing, d'Partie-civille bannent engem gewëssenen Zäitraum z'entschiedegen: Dat war d'Fuerderung vun der Vertriederin vum Parquet, en Donneschdeg den Owend, um Enn vun engem Prozess wéinst Abus de faiblesse.

Enger jonker Fra waren, tëscht 2008 an 2015, v.a. Ophiewunge mat de Kreditkaarte vun engem eelere Mann virgehäit ginn. D'Vertriederin vum Parquet huet vun enger onsäglecher Affär geschwat a vun enger Ugekloter, déi, ouni e Fanger kromm ze maachen, zu hirem komm wär ...

Et wär eng vun den éischten Affären an deem Sënn vu Leit, déi zesumme gelieft hunn. D'Beschëllegt, déi keng Aarbecht hat, hätt d'Kreditkaarten ëmmer zur Verfügung gehat, an et wär zu enger, Zitat, "desequilibréierter Relatioun mat finanzielle Fluxen, déi an eng Richtung goungen", komm, sot d'Vertriederin vum Parquet. D'Ugekloten hätt sech un d'Affer erugeschlach, dat vis-à-vis vu senge Kanner net konnt zouginn, dass net alles optimal wär; d'Affer wär an eng Ofhängegkeet geroden an de Liewensstil vun der jonker Fra net a sengem Interêt gewiescht. Op d'mannst e Prêt vu 6.000 €, fir Scholde vun der Fra bei der Krankekeess ze bezuelen, wär e formidabelen Abus de faiblesse, huet d'Vertriederin vum Parquet festgehalen.

Do virdrun hat den Affekot vun der Beschëllegter betount, den eelere Mann an déi jonk Fra wären no enger Relatioun an enger Partnerschaft gewiescht. Et wär kontestéiert, dass si iwwert d'Kreditkaarte vum Affer disposéiert hätt, dat wär net am Besoin gewiescht an déi meescht Ausgabe wäre fir de Stot gemaach ginn, wéi de Me Clemes sot. Seng Cliente hätt och de Kontakt vum Affer mat senger Famill net verhënnert, dat Ganzt wär wuel eng traureg Affär, mä kee Virworf géint d'Fra zréckzebehalen, déi de Mann net ënnerworf hätt. Dowéinst huet den Affekot vun der Ugekloten där hire Fräisproch gefuerdert.

Dogéint huet d'Affekotin vun ë.a. de Kanner vum Affer gemengt, d'Beschëllegt hätt ganz genee gewosst, wat se mat de Kaarte maache géif; si hätt dovu profitéiert, fir un d'Sue vum Affer ze kommen, sou d'Me Annick Wurth. Fir d'éischt wär tëscht deenen zwee Léift gewiescht, dono Frëndschaft an dunn Ofhängegkeet, an d'Fra, déi ze soen ni geschafft, mä sech zerwéiert hätt, hätt alles gemaach, fir den eelere Mann z'isoléieren. D'Affekotin huet um Enn eng Provisioun vun 100.000 € fir hir Mandante gefrot.

D'Uerteel gëtt den 8. Mäerz gesprach.