VIDEO - Déifferdeng a RëmelengBuergermeeschtere wonnere sech, Servior erkläert sech

Bal 20 Joer waarde Rëmeleng an Déifferdeng elo schonn op nei Alters- a Fleegeheemer, déi si vum Staat proposéiert a versprach kruten ...

© RTL Télé Lëtzebuerg
Et ware Projeten, déi net nëmmen néideg waren a sinn, mä un deenen och jorelaang gedoktert gouf - bis haut, ouni konkret Resultat! Net emol iwwer d'Pläng wéisste si Bescheed a wa se géingen nofroen, kréiche si vu Servior, dem responsabelen Acteur op Regierungssäit, keng richteg Äntwerten, kloen d'Buergermeeschteren Haine vu Rëmeleng an Traversini vun Déifferdeng.

Waarden op Altersheemer: Resumé vum Monique Kater



De Rëmelenger Buergermeeschter Henri Haine fënnt et op alle Fall net ganz seriö, wann d'Gemengen net richteg informéiert ginn. Ëmmerhin hätt Rëmeleng dem Staat Terraine fir en Altersheem zur Verfügung gestallt, elo géifen déi Terraine Servior gehéieren. Déifferdeng hat 2016 Servior en Terrain verkaaft, ma de Buergermeeschter Roberto Traversini seet, datt een ni gesot kritt hätt, wou de Problem konkret läit, well et wier am Fong alles fäerdeg gewiescht ...

Verspéidung bei Altersheemer Rëmeleng an Déifferdeng (09.02.2018)
Wéi gesinn d'Gemengen d'Situatioun? Interview mam Rëmelenger Buergermeeschter Henri Haine a mam Déifferdenger Roberto Traversini.


Net eleng d'Buergermeeschteren aus de betraffene Gemenge wonnere sech iwwer dës enorm Retarden, mä och aus der CSV-Fraktioun koum elo eng parlamentaresch Fro. D'Deputéiert Roth a Mosar wëlle vun der Familljeministesch wëssen, firwat d'Projete fir Alters- a Fleegeheemer schleefen.

PDF: Question parlementaire vun den CSV-Deputéierte Mosar a Roth.

De Laurent Mosar fënnt et op alle Fall net normal, datt d'Chamber schonn 2004, 2005 an 2006 an de jeeweilege Budgete virgesäit, datt zu Rëmeleng an Déifferdeng sollen Altersheemer gebaut ginn an elo wiere mer 2018 an et wier mol nach kee Spuedestéch geschitt. Elo misst ee kucken, ob eng politesch oder eng administrativ Verantwortung virléich, Servior als Établissement public misst elo Ried an Äntwert stoen.

Politesch Verantwortung oder administrativ Verantwortung? (09.02.2018)
Fir den CSV-Deputéierten ass et alles anescht ewéi normal, datt nach näischt a Saachen Altersheemer zu Rëmeleng an Déifferdeng geschitt ass ...


Servior, de Bedreiwer vun den Altersheemer a Bauhär vun de Projeten, huet e Freideg dann och reagéiert: Et wier schonn aussergewéinlech, dass et esou laang dauert, bis een neit Gebai kéint realiséiert ginn, mä dacks wieren et och politesch Decisiounen, déi géife matspillen an ausbremsen.

De Generaldirekter Alain Dichter erënnert drun, datt de Projet Rëmeleng vu 54 op 28 Millioune reduzéiert gouf, wéi de Projet vu Bâtiments publics bei d'Famille eriwwergaangen ass. Ausserdeem wier de Budget e puer Joer drop, 2010, vun der Regierung no hanne verréckelt ginn. Servior hätt sech dowéinst emol op déi Projete konzentréiert, bei deenen ee gutt virukomm ass.

De Projet Déifferdeng wier ähnlech gelaf: 2006 wier de Budget quasi och hei halbéiert an 2010 wier e vun der deemoleger CSV/LSAP-Regierung zeréckgestallt ginn. An dunn, 2011, hätt d'Gemeng sech fir en neie Site decidéiert: Aus engem Ëmbau gouf e richtegen Neibau, wat natierlech eng ganz aner Envergure wier. Bei deem Projet wier een awer antëscht gutt ënnerwee, esou datt dee wuel deemnächst op den Instanzewee goe kéint - am Géigesaz zu Rëmeleng, wou et zu engem Litige mam Architektebüro komm wier ... an do wier keng Eenegung en Vue.

Projeten, déi schleefen: Net am Interêt vu Servior (09.02.2018)
De Projet Altersheem Rëmeleng wier retardéiert ginn, well de Budget gekierzt an no hanne verréckelt gouf. Zu Déifferdeng wier de Site gewiesselt ginn.

Zu Déifferdeng ass de Projet elo op der Schinn, zu Rëmeleng steet deem e Litige mam Architekte-Büro an de Féiss ...



RTL-Radio-Reportage vum Freideg de Moien

Zwou Gemengen, ee Problem! Déifferdeng a Rëmeleng krute viru Jore versprach, dass op hirem Territoire en neit Alters- a Fleegeheem gebaut géif, well d'Strukturen a béide Gemenge vereelzt sinn a well d'Land souwisou méi där Heemer brauch. Als Etablissement Public bekëmmert sech Servior ëm déi "nei" Projeten. Dobäi ass "nei" net onbedéngt dat richtegt Wuert, well de Staat nämlech déi prinzipiell Decisioun scho viru bal 2 Joerzéngte geholl huet, an dat ass de concernéierte Buergermeeschteren haut elo definitiv ze laang.

20 Joer waarden op Alters- a Fleegeheemer / Monique Kater



"En attendant Godot" ... Rëmeleng an Déifferdeng waarden a waarden a waarden, op eng Decisioun, op eng Realisatioun, op en 1. Spuedestéch. Genee un dëst Theaterstéck aus den Ugangs 50er denkt een, wann ee mat béide Buergermeeschtere schwätzt. Godot steet hei fir 2 Alters- a Fleegeheemer, déi einfach net wëlle kommen.

Dat Rëmelenger ass genee esou al wéi de Godot a kéint scho laang ofgerappt a nees frësch opgeriicht sinn, iergert sech den Henri Haine. D'Gemeng hätt dem Staat den Terrain esouguer geschenkt an zweemol hiren Okay ginn, zu neie Baue-Projeten. An elo? De Buergermeeschter vu Rëmeleng waart ëmmer nach. Anscheinend géif et Problemer tëscht Servior an dem Architekt, mä méi wéisste si och net! An dach! Dass, gekuckt op déi ronn 13.000 Leit am Käldall, 120 Better net wierklech vill sinn, wier et kloer, dass ee se géif brauchen.

Dat géing de Buergermeeschter vun Déifferdeng bestëmmt direkt mat ënnerschreiwen, well och d'Altersheim bei him an der Gemeng net méi de moderne Standarden entsprécht. Och Déifferdeng géif zënter 2006 waarden ... a waarden. Renovéiere mer, baue mer nei? De Roberto Traversini waart haut nach, dobäi hat een dem Staat ewell virun zwee Joer en Terrain verkaaft, d'Pläng wiere prett.

Wann Déifferdeng am Verglach mat Rëmeleng och d'Nues vir huet, wat de Bau vun engem Alters- a Fleegeheim ugeet, stellt sech fir béid Gemengen déi selwecht Fro: Firwat dauert dat do esou laang? Bal 20 Joer?! Wou d'Politik dach ëmmer nees betount, wéi grouss de Besoin ass un esou Strukturen.

© AFP-Archiv


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.