Nei AvenuePlatanen a Kiischtebeem solle fort, awer ersat ginn

De Chantier vum Tram an d'Sanéierungsaarbechten um Kanalisatiouns-, a Stroumreseau vun der Stad wieren d'Ursaach heifir, sou RTL-Informatiounen.

D’Informatiounen, vun deene mer Iech schonn en Dënschdeg gezielt haten, konkretiséiere sech ëmmer méi. Effektiv mussen d’Beem an der Neier Avenue also d’Platanen an déi japanesch Kiischtebeem, déi den Ament op béide Säite vun der Strooss stinn,  ewechgemaach ginn.

Eisen Informatiounen no huet dat virun allem eppes mat de Kanalisatiouns- a Câblageaarbechten ze dinn, déi do parallel zum Tramschantier gemaach ginn. D’Stad Lëtzebuerg huet extra mat dësen Aarbechte gewaart, bis de Chantier vum Tram an Ugrëff geholl gëtt, well den Impakt op de Verkéier an d’Awunner op där Plaz dach substantiell ass.

Et heescht, datt d’Aarbechten awer batter néideg sinn.

Wéi een héiert, wieren d’Kabelen, déi ersat musse ginn, deels mat de Wuerzele vun de Beem verbonnen, sou datt et ganz schwéier wier, d’Beem mat der Wuerzel erauszehuelen.

Sécher ass, et kommen definitiv nei Beem an d’Nei Avenue, déi och sou grouss solle sinn, wéi déi di haut do stinn.

Den 23. Februar stellt den Infrastrukturministère zesumme mat der Stater Buergermeeschtesch op enger Pressekonferenz d'Detailer vir, wéi et mam Tramschantier an der Stad weidergeet a wat genee um nächsten Deel vum Tracé bis erof op d'Gare geplangt ass.

Sämtlech Beem an der Neier Avenue musse fort (13.02.2018)
De Chantier vum Tram an d'Sanéierungsaarbechten um Kanalisatiouns-, a Stroumreseau vun der Stad wieren d'Ursaach heifir.


Ma d'Stater LSAP-Oppositioun vermësst Informatiounen aus éischter Hand vum Schäfferot. De Conseiller Marc Angel wëllt gäre wëssen, ob dat mat de Beem wouer ass, wat d'Ursaache sinn an ob et keng Alternative ginn hätt.    

Extrait Marc Angel



De Marc Angel huet um Dënschdeg eng ganz Partie Froen un d'Buergermeeschtesch Lydie Polfer adresséiert, iwwert de Raccordement tëscht der Rouder Bréck an dem Neien Theater, d'Organisatioun vum Chantier tëscht der Stäreplaz an der neier Avenue an den Amenagement an der Neier Avenue selwer.



An de soziale Medie gouf séier no enger Petitioun fir d'Rettung vun de Beem opgeruff an et huet net laang gedauert, bis een dee Ruff ëmgesat huet.

LINK: Petitioun

Tram, Schumann, Theater a rout Bréck: Komplex Situatiounen a keng technesch Problem
Vu komplexe Situatioune schwätzt den Direkter vun Luxtram André von der Marck net vun technesche Problemer, wat den Trajet vun der rouder Bréck bis op de Glacis ugeet. D'Iwwergäng vun der Bréck, d'Vibratiounen, déi een am Theater net spiere soll, an d'Stabilitéit vum Parking Schumann wären zanter Méint Sujet gewiescht an et wieren och eng ganz Partie Etüden dofir gemaach ginn. Hei stëllt sech natierlech d'Fro, ob déi Situatiounen net vun Ufank un berécksiichtegt gi sinn.

Dozou seet den André von der Marck, datt déi rout Bréck, de Parking Schumann an den Theater scho laang stoungen, éier den Tram gebaut goufen an dat déi net gestéiert dierfte ginn, duerch den Tram. Dowéinst huet ee responsabel gehandelt an an den Ae vum Direkter vu Luxtram ass och alles gutt weidergaangen.

Extrait André von der Marck (1)



300.000 Euro hunn déi Etüden kascht, d'Käschte géingen an en Deel vum Budget vum Tram falen, betount den Direkter vu Luxtram. Op d'Fro, wéini d'Aarbechten an der Avenue de la Liberté wäerten ufänken a wéi laang se daueren, gouf op d'Pressekonferenz e Freideg 8 Deeg verwisen. Genee wéi op d'Fro, ob d'Beem an der Neier Avenue fort mussen wéinst deem Chantier. Virdru wéilt hien dozou näischt soen.

Extrait André von der Marck (2)



Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.