Chauffeur hat ze vill gedronkA 4 Autoe gerannt an eng Trap beschiedegt

Zu Péiteng war e Freideg den Owend géint 23 Auer en Automobilist op zwou verschiddene Plazen direkt a 4 Autoe gerannt an och eng Trap hat Schued gelidden.

De Chauffeur, deen net stoe bliwwen ass, konnt méi spéit lokaliséiert ginn. Hie war staark alkoholiséiert.

Wéi d'Police hie mat op de Büro wollt huelen, huet hien d'Gläichgewiicht verluer, ass gefall, huet sech blesséiert an huet missten an d'Klinik bruecht ginn. De Permis ass natierlech fort.

En ähnleche Virfall gouf et um Samschdeg Muere géint 2.40 Auer zu Diddeleng. An der rue du commerce war en alkoholiséierte Chauffeur an zwee geparkte Ween gerannt. Och dësen Automobilist huet de Führerschäin missten ofginn.

Accident um Samschdeg de Moie géint 10.15 Auer tëscht 2 Gefierer um Val des Bon-Malades vum Pafendall a Richtung Kierchbierg.

Um Samschdeg den Owend géint 18 Auer koum et zu engem Accident op der Areler Strooss zu Stroossen. Een Auto an een Moto sinn do op enger Kräizung net laanschtenee komm. Et gouf eng Persoun blesséiert.

Zu Steebrécken huet kuerz no 19 Auer ee Kamäin an der Grand-Rue gebrannt, hei gouf kee blesséiert.

An um 4.10 an der Nuecht op e Sonndeg huet een Auto an der Avenue du 10 Septembre an der Stad gebrannt, do blouf et just beim Materialschued.