VIDEO: Uerteel PechertenFGFC-ASAM: De Stater Schäfferot muss Konsequenzen zéien

Nom Uerteel géint de Chef a Sous-Chef vun de Stater Pecherten, misst de Schäfferot vun der Stad Lëtzebuerg reagéieren, seet d'FGFC-ASAM.

Stater Pecherten: 12 Méint Prisong mat Sursis (21.02.2018)
Esou war d'Uerteel e Mëttwoch op der Cour d'Appel an der Stad.

E Mëttwoch am Nomëtte sinn op der Cour d'appel an der Stad de Chef an de Sous-chef vun de Stater Pecherte wéinst falscher Zeienausso zu all Kéiers 12 Méint Prisong mat Sursis an enger Geldstrof vun 3.000 Euro veruerteelt ginn, donieft musse si allebéid engem Aarbechtskolleg de symboleschen Euro bezuelen.

De Me Schonckert, Affekot vun deem Mann, war nom Uerteelssproch vun e Mëttwoch de Mëtten natierlech zefridden.

De Me Schonckert war zefridden

Deem Mann seng Plainte goung op en Tëschefall am Abrëll 2013 zréck. Hie soll deemools, der Ausso vum Chef no, seng Kontrolltournée zu Bouneweg verlooss hunn, fir an eng Apdikt an op e Bancomat ze goen. Wuel hat de Pechert zouginn, an d’Apdikt gaangen ze sinn, net awer op de Bancomat.

Kritik vun FGFC-ASAM een Dag nom Uerteel

En Donneschdeg de Moien huet d'FGFC, der Gewerkschaft vun de Gemengebeamten, op d'Geriichtsuerteel, dat de Chef a Sous-Chef vun de Stater Pecherte betrëfft, reagéiert. Wéi et heescht, misst de Schäfferot vun der Stad Lëtzebuerg elo Konsequenzen zéien. De Chef vum Service Parking a säi Vertrieder goufe wéinst hire Falsch-Aussoen a Relatioun mat engem Agent Municipal, deen hinnen ënnerstallt war, zur
Rechenschaft gezunn ginn.

An engem Communiqué ass et d'Fuerderung, dass déi betraffe Persounen direkt vun hire Funktiounen entbonne ginn. Et wier och elo héich Zäit fir eng Restrukturatioun vun dësem Service. Et géif ee sech och der Positioun vum Staatsrot uschléissen, datt d’Agents municipaux, virun allem a Relatioun mat deenen ugeduechte Kompetenz-Erweiderungen, direkt dem Buergermeeschter ënnerstallt ginn.

Als FGFC-ASAM géif ee sech ubidden, fir mam Schäfferot vun der Stad Lëtzebuerg zesummenzeschaffen, an esou déi zanter laangem néideg Restrukturatioun vum Service Parking an Ugrëff ze huelen.

PDF: Schreiwes vun FGFC-ASAM