Mir hu gefrot, Dir hutt geäntwert23 % si fir en Ausbau vun de Bus- an Zuchstrecken

Mir haten iech gefrot, eis unzeginn, wat geschéie misst, fir dass Dir Ären Auto stoe loosst a mat engem aneren Transportmëttel op d’Aarbecht kommt.

Alternativ Verkéiersmëttel (28.02.2018)
Wéi eng Alternaive kéint et nach ginn, fir op d'Schaff an dono nees Heem ze kommen?

250.000 eidel Sëtzplaze sinn all Mueren op eise Stroossen ënnerwee. Déi Zuel huet de Verkéiersministère ausgerechent, fir ze weisen, wou op d'mannst en Deel vun eisem Verkéiersproblem hierkënnt. 7 vun 10 Leit gräifen op den Auto zréck fir op d’Aarbecht ze kommen an di meescht dovu sëtzen eleng am Auto.

Den Ament gëtt a vill Richtungen iwwerluet, wéi een dorun eppes ännere kann. De StartUp "Kussbus" zum Beispill gesäit d’Zukunft an engem flexibele Shuttlservice, deen d’Leit quasi doheem ofhëlt a bis op d’Aarbecht féiert. De Groupe Guy Rollinger huet d’Visioun vun engem Monorail fir Lëtzebuerg. D’CFL setzt op eng flexibel Kombinatioun vum Zuch an engem Carsharing System an de Ministère plangt, de Covoiturage mat enger Plattform, spezifesche Virdeeler a finanziellen Ureizer ze fërderen.

Mir haten Iech gefrot, eis unzeginn, wat geschéie misst, fir dass Dir Ären Auto stoe loosst a mat engem aneren Transportmëttel op d’Aarbecht kommt.

Fir déi meescht Leit missten d’Bus- an d'Zuchstrecken ausgebaut ginn, esou, dass si besser ugebonne sinn (23,3%). 16,5% géingen hiren Auto stoe loossen, wa se sech op d’Pénktlechkeet vum ëffentlechen Transport verloosse kéinten an 13,6% wa se eng Alternativ gebuede kréichen, déi sech zäitlech rentéiere géif.

Hei d’Iwwersiicht vun den Äntwerten, déi soss nach erakomm sinn: 

Net mussen ëmzeklammen: 7,4%
Mech kritt näischt dozou, mäin Auto stoen ze loossen: 5,7%
Komme scho mam Zuch/Bus/Vëlo: 5,7%
Gratis ëffentlechen Transport: 5%
P&R/Tax fir Frontalieren: 5%
Dezentraliséierung vun den Aarbechtsplazen: 4%
Nei Offeren am ëffentleche Verkéier (Monorail, Seelbunn, lokal Shuttle-Service): 4%
Méi P&R: 2,3%
City-Tax: 2,3%
Méi Vëlospisten: 2,3%
Bus- a Covoiturage-Spueren op der Autobunn: 1,7%
Totalverbuet fir den Individualverkéier: 1,2%

Am Ganzen hunn 135 Persoune bei der Ëmfro matgemaach.



Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.