Invité vun der Redaktioun (9. Mäerz) - Michel WurthUS-Stroftaxen: "En décken Hond" fir Lëtzebuerg

Invité vun der Redaktioun e Freideg de Moie war de Member vum Verwaltungsrot vum Stolris.

Invité vun der Redaktioun: Michel Wurth (09.03.2018)
Den Invité vun der Redaktioun vu méindes bis donneschdes moies géint 8h10 am Studio vun RTL Radio Lëtzebuerg.

En internationalen Handelskrich wier net nëmme fir d'Stolbranche ma fir déi ganz Wirtschaft eng Katastroph, dat sot de Member vum Verwaltungsrot vun ArcelorMittal Michel Wurth um Freideg de Moien als Reaktioun op dem US-President Donald Trump seng Annonce fir Stroftaxen op de Stol- an Aluminiumsimporter an den USA anzeféieren. De Michel Wurth nennt dem Republikaner seng Entscheedung immens politesch a wirtschaftlech gesinn dee falsche Wee. D'Maartwirtschaft géif gebrach a laangfristeg géif de Stol an Amerika méi deier. Op Dauer also eng kontraproduktiv Decisioun.

De Michel Wurth war eisen Invité/Rep. Claudia Kollwelter



Den Impakt vun der Decisioun op ArcelorMittal selwer fält gemëscht aus. Fir d'Lëtzebuerger Geschäft sinn d'Stroftaxen, dem Michel Wurth no, all Zäit ganz negativ.

10% vun der Lëtzebuerger Produktioun gëtt nämlech an d'USA exportéiert, héichwäerteg Produkter wéi Palplanchen a sougenannten Greyträger, déi an amerikaneschen Héichhaiser wéi dem One World Trade Center verbaut sinn. De Vertrieder vum Verwaltungsrot schwätzt hei och vun enger grousser Symbolik. Dat géif wéi doen.

Alles an allem mécht de Stol bei den Exporter aus dem Grand-Duché iwwregens d'Halschent aus. De weltgréisste Stolproduzent mat Sëtz zu Lëtzebuerg exportéiert donieft och vill Stol vu Brasilien aus an d'USA an och déi Exporter riskéieren elo also méi deier ze ginn.

Ënnert dem Stréch awer fält den Impakt op de ganze Grupp awer méi gemëscht aus. ArcelorMittal gehéiert also net nëmmen zu de Verléierer. De Konzern ass nämlech deen zweetgréisste Stolproduzent an den USA, an de gréisste Stolproduzent am sougenannten Nafta, also dem nordatlantesche Fräihandelsaccord tëscht Amerika, Kanada a Mexiko fir déi jo Exceptioune gëlle sollen. Dem Michel Wurth no, hätt déi amerikanesch Wirtschaft guer net méi funktionéiere kënnen, wa kee Stol méi aus Kanada a Mexiko fléisse géif.

Chiffréiert Previsioune fir dat eegent Geschäft hat de Verwaltungsrotmember net.

Laangfristeg, do war sech eisen Invité vun der Redaktioun awer sécher verstéisst dem Donald Trump seng Haltung géint d'Maartwirtschaft. An dat wier net gutt.

Kënnt et also elo zu engem internationalen Handelskrich? Dat misst, dem Michel Wurth no, op alle Fall evitéiert ginn. Déi éischt Kugel wier geschoss. Elo géif et vun der Reaktioun vun den Europäer an der Welthandelsorganisatioun ofhänken wéi et weider geet.

Invité vun der Redaktioun: Michel Wurth



Rendez-vous fir den Interview mam Invité vun der Redaktioun all Dag vu méindes bis freides no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.

US-Stoltaxen: De Michel Wurth am Studio vun Télé Lëtzebuerg (09.03.2018)
Wéi gesäit de Member vum Verwaltungsrot vun ArcelorMittal déi nei Decisioun vum US-President Donald Trump.





Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.