VIDEO: Deklaratioun vum Jean AsselbornRefugiéen: Solidaritéit vun der EU ass weiderhi gefuerdert

Europa muss eng Terre d'asile bleiwen, fir Leit, déi Schutz viru Verfolgung sichen.

Aussepolitesch Deklaratioun: Brexit, Flüchtlingen an USA (13.03.2018)
Um Denschdeg huet den Ausseminister Jean Asselborn virun der Chamber geschwat.

D'Migratioun an d'Flüchtlingskris sinn déi zentral Erausfuerderunge vun eiser Zäit, dat huet den Ausseminister Jean Asselborn a senger Deklaratioun iwwert d'Aussepolitik um Krautmaart ënnerstrach. D’Kris vun de Réfugiéë ass op der aner Säit vum Mëttelmier ass nach laang net geléist. D'EU misst weider hëllefen, dat huet de Jean Asselborn den Dënschdeg an der Chamber erkläert.  

"Deene Persounen, déi besonnesch Schutz brauchen, solle mer d’Méiglechkeet ginn, am Kader vun enger legaler Migratioun, wéi der Réinstallatioun, an engem europäesche Land en neit Liewe kënnen unzefänken. D’EU ass bereet, an de kommenden zwee Joer 50.000 Migrante legal opzehuelen. Dës Leit sollen iwwert de Niger an d’EU kommen. Lëtzebuerg plangt dobäi, 200 Leit bis Enn 2019 opzehuelen”, esou den Lëtzebuerger Diplomatiechef.

De Jean Asselborn huet nach emol un eng solidaresch Approche tëscht den EU-Länner appeléiert: “D’Léisung ass net, dass mer eng Course an Europa hunn, wéi ee Land am mannsten attraktiv gëtt. Europa ass a muss “Terre d’asile” bleiwen, fir déi Leit, déi Schutz viru Verfolgung sichen.

D'Zukunft vun der Europäischer Union u sech kéint da mat neie Staate geschriwwe ginn: Mat Serbien a Montenegro lafen Gespréicher an am Abrëll soll d’Kommissioun soen, wéi et mat enger Erweiderung Richtung Mazedonien an Albanien ass.

Den Ausseminister huet an zwou Stonnen den Tour rondrëm d'Welt gemaach an dobäi eben och op déi grouss Defisen higewisen.

Eng vun de groussen Erausfuerderungen virun deenen d'Europäesch Unioun steet, sinn, esou de Jean Asselborn, d'Verhandlungen iwwert e Finanzkader no 2020. Wéinst dem Brexit geet de Bäitrag vum Vereenegte Kinnekräich verluer - 2016 waren dat 12 Milliarden Euro. Vill Suen, déi feelen an enger Zäit, wou d'Europäesch Unioun viru groussen Aufgabe steet:

Extrait Jean Asselborn



Jean Asselborn: Digitaliséierung, Migratioun, Verdeedegung, Sécherheet... fir just e puer Beräicher ze nennen. Ouni déi néideg Mëttel kann d'Europäesch Unioun hir Ziler net erreechen. Dofir musse mer eis ëm en zukünftegen an effiziente Finanzkader beméien. All Memberstaat muss do seng Responsabilitéiten eescht huelen an eng Hand mat upacken. Dat heescht, datt och d'Lëtzebuerger Regierung bereet ass, fir méi an d'Dëppen anzebezuelen, wa mer iwwerzeegt sinn, datt déi Erhéijung vum europäesche Budget dem europäeschen Interêt och déngt.

Wéi e roude Fuedem huet sech och eng gewësse Kritik un den USA an um President Trump duerch d'Ried vum Jean Asselborn gezunn.

Aussepolitesch Deklaratioun / Reportage Dany Rasqué



Ugefaangen, mat der Decisioun, fir déi amerikanesch Ambassad zu Jerusalem de 14. Mee anzeweien, wat och de 70. Anniversaire vun Israel ass. Alleng de Choix vum Datum ass eng iwwerflësseg Provokatioun, ënnersträicht de Jean Asselborn a betount, datt déi amerikanesch Decisioun, fir Jerusalem als Haaptstad vun Israel unzeerkennen, d'Ëmsetzung vun enger zwee Staate Léisung däitlech méi schwéier mécht.

Et wier eng Decisioun, déi Waasser op d'Mille vun de Radikale géife schëdden an Amerika als neutrale Vermëttler am Friddensprozess géif diskreditéieren. Amerika kann net méi an huet och net méi de Monopol vun der Mediatioun. Et ass awer och kloer, datt eng Léisung net ouni Amerika ka fonnt ginn. De Jean Asselborn hofft op den Dag, wou d'USA nees den Appui op eng zwou Staateléisung wäerte ginn.

Eng weider Kritik un den Amerikaner betrëfft den nuklearen Accord mam Iran, deen 2016 a Kraaft getrueden ass a bis elo à la lettre ëmgesat gi wier. Ma deen Accord geréit duerch d'USA ënner Drock, well de President Trump domadder dréit, fir aus dem Accord erauszeklammen, wann e bis de Mee net grondleeënd verännert a verschäerft géif ginn.

Kritik un den USA och wat den Handel betrëfft. De Welthandel misst onbedéngt an engem multilaterale Kader reguléiert ginn. D'Alternativ wier Chaos an d'Recht vum Staarken, an dat ouni Dialog mat laangjärege Partner an Alliéierten.

Et dierft ee sech elo net provozéieren an an en Handelskrich dreiwe loossen, esou de Jean Asselborn, mä et misst een déi europäesch Intressen awer verdeedegen.

Den Ausseminister huet a senger Deklaratioun och Moskau kritiséiert a gesot, et géif ëm Suerge maachen, datt mat den USA a Russland zwee decisiv Länner fir de Fridden op der Welt, sech iwwer all méiglech Reegelen ewechsetzen an och nach ëmmer méi auserneen driften.

PDF: D'Deklaratioun iwwert d'Aussepolitik 2018

Et bleift nach vill ze maachen, fir dass d'Welt esou dréint wéi se muss, mä mat där richteger Astellung ass villes méiglech. Zu där Konklusioun koum den Ausseminister Jean Asselborn um Enn vu senger Deklaratioun iwwert d'Aussepolitik an der Chamber.

© MAEE


Weidere Programm


E Mëttwoch de Mëtteg hunn d'Deputéiert d'Geleeënheet fir um Jean Asselborn seng Deklaratioun vun en Dënschdeg ze reagéieren.

Dono presentéiert déi gréng Deputéiert Josée Lorsché de Gesetzprojet iwwert d'Reform vun den ëffentlechen Ausschreiwungen. Ënnert anerem soll d'Relatioun Qualité-Prix verbessert ginn an et solle sozial- souwéi Ëmweltaspekter mat afléissen. Ee weidert Zil ass, dass d'Ausschreiwungen an Zukunft manner bürokratesch sinn.

Um Programm en Donneschdeg steet op Demande vun der CSV eng Aktualitéitsstonn iwwert d'Zukunft vun der Finanzplaz am Kontext vun de sougenannten Kryptowärungen.

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.