Déidlech Course-PoursuiteAffekot vum Beschëllegte stellt behaapte Kausalitéit vum Accident a Fro

Ëmmer méi Detailer vum Virfall gi publik: De beschëllegte Mann war net eleng am Fluchtauto an déi blesséiert Polizistin schwieft weider a Liewensgefor.

Dem Procureur adjoint vun Dikrech no kritt dee Chauffeur, deen an der Nuecht op e Samschdeg virun der Police-Kontroll op der N7 fortgerannt ass, jo ë.a. Homicide involontaire virgeworf, vu dass d'Police huet missen eng Course-Poursuite maachen, well de Mann bei enger Kontroll, bei där hien Haltenzeeche gemaach krut, gedréint a fortgefuer war.

A genee doranner gesäit den Affekot vum Beschëllegten nach ganz vill Klärungsbedarf.

RTL huet en Dënschdeg de Moie mam Maître Daniel Baulisch geschwat, deen d'Kausalitéits-Verhältnis ferm a Fro stellt.

De Maître Baulisch am Interview


Säi Client wier sech senger Schold bewosst an et géif him onendlech Leed doen, esou den Affekot, mä d'Fro vun der Responsabilitéit vum Accident an dem Fortfuere vun der Kontroll stellt sech dem Maître Baulisch no awer trotzdeem.

Fir ze soen, dass et net zu där fataler Course-Poursuite komm wier, wann de Beschëllegte stoe bliwwe wär, dat wier eng extrem vereinfacht Duerstellung vun de Faiten a rechtlech géif dat och d'Strooss net halen.

Et misst een ëmmer kucken, vun deem, dee flücht, ob et previsibel war, dass et zu engem Accident ka kommen, an dat wier hei definitiv net de Fall, dofir wier d'Inculpatioun och net richteg.

De Maître Daniel Baulisch



De Maître Baulisch freet sech ënnert anerem, firwat deen zweete Policeauto net doriwwer informéiert war, datt d'Poursuite am Fong ofgebrach war, well deen éischten Auto hätt jo d'Kéier gemaach. Den Affekot freet sech iwwregens och, firwat net nach aner Leit inculpéiert goufen - et géif esou ausgesinn, wéi wa villes op dem Bockel vu sengem Client misst gemaach ginn ...

Weder hien nach säi Client wéilten eppes erofspillen, si kéinten d'Leed vun de Leit an de Famille ganz gutt novollzéien, trotzdeem kéint hien als Affekot net acceptéieren, datt säi Client elo alles sollt ugehaft kréien.

De Beschëllegten géif den Ament an der Untersuchungshaft iwwregens och psychiatresch betreit ginn.

Fir den Ament wéilt de Maître Baulisch awer nach keng Demande stellen, dass säi Mandant aus der Untersuchungshaft entlooss gëtt.

Weider Aussoen

De Maître Daniel Baulisch stellt jo d'Kausalitéits-Verhältnis ferm a Fro ...

Wat seet de Maître Baulisch? Rep. Joël Detaille (1/2)



... Fakt schéngt awer ze sinn, dass de beschëllegte Chauffeur alkoholiséiert war, d’Kéier gemeet huet virun der Kontroll a sech verstoppt huet, oder?

Wat seet de Maître Baulisch? Rep. Joël Detaille (2/2)



Reaktioun vum Affekot vum Beschëllegten (17.04.2018)
Ëmmer méi Detailer vum Virfall gi publik: De beschëllegte Mann war net eleng am Fluchtauto an déi blesséiert Polizistin schwieft weider a Liewensgefor.


Wéi koum et zu där fataler Kollisioun?
No der Course-Poursuite an der Nuecht vun e Freideg op e Samschdeg ginn et um Dënschdeg wieder Präzisiounen, wéi et zu deem Ongléck koum.

Déidlech Course-Poursuite: Info-Update
Vum Annick Goerens um Dënschdeg de Mëtteg 12h30.



De beschëllegte Chauffeur koum aus engem Restaurant an huet d'Kéier gemaach, wéi hien déi gréisser Police-Kontroll op der Wämperhaart gesinn hat an ass Richtung Wäisswampech fortgefuer. Doropshin huet sech de 37 Joer ale Mann mat sengem donkelbloen Audi S5 op engem Parking vun enger Tankstatioun zu Wäisswampech selwer verstoppt. 2 Beamte waren dem Mann direkt mat engem Auto hannendru gefuer, kuerz drop huet och eng Police-Camionnette d’Poursuite opgeholl. D’Police-Gefierer sinn duerch Wäisswampech gefuer, ouni ze bemierken, dass de gesichte Chauffeur sech verstoppt hat.

Hanner Wampech, op der Héicht vu Lausduer, huet de Police-Auto e bloe Skoda ugehalen, fir nozefroen, ob dee vum gesichten, donkelbloen Audi iwwerholl gouf. Doropshin huet de Police-Auto d’Kéier gemaach, während där dunn den trageschen Accident geschitt ass. D’Beamte waren zum Deel net ugestréckt, wat bei enger Course-Poursuite, wou ee séier aus dem Auto eraus muss, net ongewéinlech wär.

Am Auto ass de Chauffer nach op der Plaz gestuerwen, d'Bäifuererin, och eng Polizistin, schwieft och 4 Deeg nom Accident nach a Liewensgefor.

Dossier Lausduer: Wat ass um Samschdeg geschitt? (16.04.2018)
Am Kontext vum déidlechen Accident zu Lausduer, bei deem e Polizist gestuerwen ass, huet RTL iwwerdeems mam Procureur adjoint vun Dikrech geschwat.


Mann net eleng am Fluchtauto

RTL-Informatiounen no war de Chauffeur och net eleng a sengem Auto ënnerwee. Hie gouf och eréischt den Dag drop iwwer d’Medie vum Accident gewuer, huet sech doropshin awer net gestallt.

Nodeems sech de 37 alen Entrepreneur aus dem Norde vum Land op engem Parking bei enger Tankstell mat sengem Bäifuerer verstoppt hat, sinn allebéid zesumme virugefuer.

Fir d'éischt falsche Mann verhaft

D’Enquête vun der Police huet direkt ugefaangen a scho samschdes mëttes haten d’Ermëttler ee bloen Audi S5 lokaliséiert a sinn op ee Supermarché op der Wämperhaart gefuer, fir e Metzler ze verhaften. Dee Mann krut gesot, hie wär festgeholl, well hie sech duerch d’Bascht gemaach hätt. D’Poliziste goungen doropshi mat him duerch de Buttek an hunn him baussen um Parking viru Mataarbechter a Clienten Handschellen ugedoen an Alkohol an Drogentester gemaach. Vum Mann senger Aarbechtsplaz goung et du bei hien heem, zu engem Zäitpunkt, wéi an der Noperschaft jidderee virun der Dier war.

Am RTL-Interview mam Annick Goerens


Wéi de Mann aus der Police-Camionnette geklommen ass, mat Handschellen um Réck, hätten d’Leit hie gesinn an zwee Polizisten an Zivil virum Haus gewaart. Zu 4 wäre si mat him eragaangen an hätten hien zwou Stonne gehéiert. Nodeems hien op en Neits gesot krut, hie wär fortgefuer, hätt hie geäntwert: Ech war et net!

"Wéi e Schwéierverbriecher"

Eréischt Zeie vum Mann hätten de Mëssel aus der Welt schafe kënnen, ma hie wär sech virkomm wéi e Schwéierverbriecher, sot de Mann um Méindeg de Mëtten.

D’Police wollt sech iwwregens nach um Méindeg dofir bei him entschëllegen.

Detail um Auto féiert zur Opklärung
Parallel ass d’Enquête natierlech virugelaf an opgrond vun Kameraopzeechnunge vun der Tankstell vu Wäisswampech huet sech erausgestallt, dass den Audi S5 vum Metzler, deen am Supermarché verhaft gouf, net identesch war mam Fluchtauto.

Doropshi konnt dunn dee gesichten Auto mam Chauffer ermëttelt ginn.

RTL NEWS: Doud vu Polizist no Course-Poursuite - Parquet: Fuite an Alkohol zouginn, Mann ugeklot an am Prisong

Wat seet de Procureur adjoint vun Dikrech?
Dem Procureur adjoint vun Dikrech no kritt de richtege Chauffeur ë.a. Homicide involontaire virgeworf, vu dass d’Police huet missen eng Course-Poursuite maachen, well de Mann bei enger Kontroll, bei där hien Haltezeeche gemaach krut, gedréint hat an ugaange war.

Accident net provozéiert, mä "élément pertubateur primaire"

D’Poliziste waren dem Chauffeur dunn nogefuer, haten hien awer net méi fonnt, wouropshin et zum déidlechen Accident koum.

De Pascal Probst um Mikro vun de Kollege vun RTL Télé Lëtzebuerg: Hien huet den Accident net provozéiert, mä hie war den "élément pertubateur primaire". Wann hie stoebliwwe wier, hätt d'Police net missen nofueren an da wier et net zu deem Accident komm.

© De Procureur adjoint Pascal Probst


Den Dikrecher Procureur adjoint huet an engems drun erënnert, dass am Fall, wou en Accident geschitt, well de Chauffeur ze séier oder alkoholiséiert gefuer ass, an et stierft doropshin eng Persoun, d’Strofe kënne verschäerft ginn. Dat heescht, datt een eng Prisongsstrof vu bis zu 3 Joer riskéiert, wann ee sech blesséiert; vu 5 Joer, wann eng Persoun stierft.

Den Affekot vum Beschëllegten, de Maître Baulisch, stellt dës Kausalitéit, wéi geschriwwen, awer a Fro.

RTL NEWS: Police an Trauer: Vill Reaktiounen no déidlecher Course-Poursuite