ChamberAusbau vu Stater Gare guttgeheescht - 2 nei Quaien

En Dënschdeg gouf an der Chamber de Gesetzprojet eestëmmeg guttgeheescht, fir den Ausbau vun der Stater Gare.

Di finanziell Enveloppe chiffréiert sech op 171 Milliounen Euro. Ënnert anerem kritt d'Gare 2 Quaie bäi, sou dass an Zukunft d'Zich op am ganzen 6 Quaien ukommen a fortfueren. Et ginn och weider Gleiser gebaut. D'Aarbechte fänken am Hierscht un a sollen 2022 fäerdeg sinn. Den éischte neie Quai soll Enn nächst Joer a Betrib geholl ginn.

© CFL


© CFL




Um Mëttwoch steet eng Consultatiounsdebatt iwwert d'Landesplanung um Ordre du Jour. Uganks war des Debatt den 28. Februar virgesinn. Elo ass et un den Deputéierten dem zoustännege Minister François Bausch hir Virstellungen ze presentéieren, wéi d'Landesplanung an Zukunft soll ausgesinn.

Et dierft e laange Mëtteg um Krautmaart ginn. Well och um Mëttwoch diskutéieren d'Deputéiert während enger Aktualitéitsstonn, op Demande vun der CSV, iwwert d'Stroftaxen op Aluminium a Stol, déi den amerikanesche President Donald Trump decidéiert huet an den Impakt dovun op de Welthandel.

En Donneschdeg dréit sech an der Chamber dann ee groussen Deel vun den Diskussiounen ëm d'Mobilitéit. D'Deputéiert presentéieren dem Minister François Bausch an dem Kontext hir Iddien a Suggestiounen, dat am Kader vun der globaler Strategie fir eng nohalteg Mobilitéit, de MoDu 2.0. Den Nohaltegkeetsminister ass am Gaangen eng nei Strategie fir den Zäitraum 2023-2033 auszeschaffen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.