StaatsrotDéi Gréng ginn net a Recours!

Déi Gréng ginn awer net a Recours, wat d'Net-Nominatioun vun hirer Kandidatin Joëlle Christen an de Staatsrot ugeet. Déi sollt jo d'Sam Tanson ersetzen.

Nodeems jo d'Affekotin Martine Lamesch d'lescht Woch géint all Erwaardunge vum Staatsrot an der Plenière gestëmmt gi war, hate sech déi Gréng indignéiert a rose gewisen, datt hir Kandidatin beim Vott desavouéiert gi war - et hat een an éischte Reaktioune vu méigleche Recourse virum Verwaltungsgeriicht geschwat.

RTL-Informatiounen, déi och elo um Dënschdeg den Owend vun der Partei confirméiert goufen, kënnt et awer net dozou.

Dem grénge Parteipresident Christian Kmiotek no sollt eng politesch Léisung fonnt ginn, fir Blockagë wéi dësen an Zukunft z'evitéieren - duerch d'Proposition de loi, déi d'CSV en Dënschdeg an der Chamber deposéiert huet, géif ee mierken, datt ee mat der CSV a mat déi lénk an där Fro op enger Linn läit. Déi Gréng hoffen, dass 60 Deputéiert fonnt ginn, fir dës Proposition de loi matzestëmmen.

PDF: D'Proposition de loi deposéiert vu Wiseler, Meyers a Gloden.

Hannergrondartikel mat ganz ville Liesercommentairen: Causa Lamesch - Schreiwes online: Staatsrot äntwert an argumentéiert schrëftlech op Bréif vun déi Gréng.

D'Reform vum Staatsrot vun zejoert hätt wuel net alles kloer gemaach, et misst legislativ nogebessert ginn - der Meenung vun de Gréngen no misst et deemno d'Chamber eleng sinn, déi demokratesch legitiméiert wier, fir Kandidate fir de Staatsrot an Zukunft ze proposéieren - den Ament ass dat jo nieft der Chamber, och d'Regierung resp. de Staatsrot selwer.

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.