Mouveco iwwer DéiereschutzgesetzEt gi gutt Neierungen, mä och grouss Defiziter

D'Gesetz géif wäit hannert den Erwaardungen zréck bleiwen an och hannert deem, wat géif gebraucht ginn, sou de Mouvement Ecologique.

D'Déiereschutzgesetz steet en Donneschdeg zum Vott an der Chamber. Hei gëtt en Donneschdeg de Mëtteg iwwert dat neit Déiereschutzgesetz ofgestëmmt. Am neie Gesetz sollen d'Strofen fir Déierequäler erop gesat, an de Status vun Déieren däitlech opgewäert ginn.

De Begrëff vun der Dignitéit vum Déier wär am Text net genuch an eendeiteg definéiert. D'Berodung an déi finanziell Ënnerstëtzung vun de Bauere wär net genuch gereegelt a virun allem géife Mindestkritäre feelen, wéi verschidden Notzdéiere misste gehale ginn.
Zum Beispill misst et Mindestgréisste fir Boxe ginn, Gefligel dierft net an Zort Käfeger gehale ginn oder Déiere wéi Päerd an Iesele ganz eleng. Fir d'Ranner an d'Schwäin géif et och keng richteg Standarde ginn, wéi déi ze hale wären. D'EU-Norm géif kengem modernen Déiereschutzgesetz gerecht ginn.

Lëtzebuerg hätt och vill méi couragéis kënne sinn, wat d'Reegele fir laang Transportweeër vu liewegen Déieren ugeet, fënnt de Mouveco. Lëtzebuerg hätt primär d'Mindestkritäre vun der EU iwwerholl a verpasst e richtegt modernt Déiereschutzgesetz ze maachen. Nach wär et awer net ze spéit, sou de Mouvement Ecologique. Iwwer groussherzoglech Reglementer kéint nach nogebessert ginn.

PDF: Pressecommuniqué vum Mouvement Ecologique

Als net zäitgeméiss gëllt dat aktuellt Déiereschutzgesetz vun 1983. Eng ganz Partie Punkte sollen deemno changéieren. Virop ass et déi éischte Kéier datt iwwert d'Dignitéit vun den Déiere geschwat gëtt, déi net méi als eng Saach, mä als e Wiese mat Gefiller betruecht solle ginn.

D'Sécherheet an d'Wuelbefanne vun den Déiere sollen am Zentrum stoen.

Eng grondleeënd Ännerung betrëfft also d'Definitioun vun Deieren als Liewewiesen. Bis ewell goufen se zivil- a strofrechtlech als Objeten ugesinn. Am Fall wou een en Deier ëmbruecht oder blesséiert huet, gouf dëst dowéinst bis ewell als Saachbeschiedegung ugesinn, an net als Strofdot, déi sech géint e Liewewiese riicht.
Déierequälerei soll an Zukunft méi streng bestrooft ginn an dat mat Geldstrofe vu bis zu 200 Dausend Euro respektiv 3 Joer Prisong. Am Fall wou eng Persoun esou eng Dot widderhëlt kënnen déi Strofe verduebelt ginn - heescht 400 Dausend Euro a 6 Joer Prisong.

Déiereschutzgesetz/Reportage Claudia Kollwelter

Par Rapport zum Gesetz vun 1983 sinn dann och en Partie nei Praktiken opgeféiert, déi an Zukunft net méi erlaabt sinn, wéi zum Beispill Déieren ze ziichten oder ze schluechte fir hiert d'Fëll d'Haut d'Fiederen oder d'Woll ze benotzen, oder Jippelcher aus réng ekonomesche Grënn ëmzebréngen.

An Zukunft soll et dann och net méi erlaabt sinn, Déiere bei Spiller beispillsweis kënnen ze gewannen, genee wéi et verbuede wäert sinn Hënn a Katzen a Supermarchéen ze verkafen oder ze verschenken.

Vir de breede Publik iwwert déi nei Punkten am Gesetz ze informéieren, soll eng Sensibiliséierungscampagne lancéiert ginn, nodeems d'Gesetz a Kraaft trëtt.




Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.
 

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.