Doud vum Camille GiraGedenkminutt am Staatsministère an Trauerzeremonie e Samschdeg

De Staatssekretär fir Ëmwelt am MDDI ass e Mëttwoch den Owend am Alter vun 59 Joer un de Suitte vun engem Häerzinfarkt verscheet.

Camille Gira (2. Juni 1958 - 16. Mee 2018): Seng politesch Carrière huet en an der Ëmweltbeweegung ugefaangen. Dono koum d'Gemengepolitik. An der Gemeng Biekerech war hie fir d'éischt vun 82 bis 90 Schäffen, fir du Buergermeeschter ze ginn - e Posten, op deem en 23 Joer laang bliwwen ass, bis en an d'Regierung gewiesselt ass.

E Mëttwoch de Mëtteg stoung dat neit Naturschutzgesetz um Ordre du jour vun der Chamber, ma ganz stënterlech ass d'Politik an den Hannergrond geréckelt.

De Camille Gira war nämlech grad um Riednerpult, wéi hien op eemol zesummegaangen ass.

D'Chambersessioun gouf natierlech direkt ënnerbrach an de Staatssekretär krut direkt medezinesch Hëllef.

Trotzdeem koum méi spéit e Mëttwoch den Owend déi traureg Nouvelle, datt de Camille Gira gestuerwen ass.

De grénge Politiker ass 59 Joer al ginn. Hie war bestuet a Papp vun zwee Bouwen.

Der Famill vum Camille Gira drécke mir eist häerzlechst Bäileed aus.

Kuerzbiographie

E Réckbléck op d'Liewe vum Camille Gira (17.05.2018)
E Mëttwoch den Owend war de Camille Gira ganz plëtzlech am Alter vun 59 Joer gestuerwen.


De Camille Gira ass den 2. Juni 1958 an der Stad op d'Welt komm. Hie war am Athenée an am Robert Schumann am Lycée.

Hie wollt Geschichtsproff ginn, huet awer aus familiäre Grënn missen ophalen. Vun 1977 bis 1994 huet de Camille Gira als Fluchlotse geschafft. 1993 ass hie Member vun Déi Gréng ginn a séier och zu engem vun hire prominentste Vertrieder.

Bei de Chamberwale vum 12. Juni 1994 gouf hien an d'Chamber gewielt an zënterhier allkéiers erëmgewielt. Vun 1990 bis 2013 war hie Buergermeeschter vun der Gemeng Biekerech, wou hie vun 1982 bis 1990 Schäffe war.

Am Dezember 2013 huet de Camille Gira op déi zwee Mandater verzicht, fir Staatssekretär fir Ëmwelt am Ministère du développement durable et des infrastructures (MDDI) an der Regierung Bettel-Schneider ze ginn.

Biergerbedeelegung, Klimaschutz - dat ware seng Prioritéiten. Zu Biekerech war hien e Pionéier an der Eko-Energie.

Vun 2008 bis 2013 war de Camille Gira President vun der Lëtzebuerger Handballsfederatioun.

Vun 2010 bis 2013 och President vum Syndikat Réidener Kanton.

Am Summerinterview de leschte Summer sot de Camille Gira hei um Radio, hie wéilt d'Leit net aus den Ae verléieren an och mol gären an déi lokal Bistroen Beim Schluppert Beim Zapert zu Biekerech goen, fir net an enger Bulle am 15. Stack am Héichhaus um Kierchbierg ze sëtzen. Den Interêt vun de Leit a vun der Natur war him wichteg.

De Camille Gira war bestuet a Papp vun zwee Bouwen.

E Portrait vum Camille Gira



Reaktioun: Grouss Trauer no onerwaartem Doud
D'Regierung huet um Mëttwoch den Owend an engem Schreiwes déi immens Trauregkeet ausgedréckt wéinst dem Doud vun engem Regierungsmember. Den Doud wier onerwaart am Laf vum Owend komm.

A senge politesche Mandater, ob op kommunalem oder nationalem Niveau, hätt hien sech ëmmer exemplaresch erageknéit. A senger ganzer politescher Carrière hätt hie sech fir d'Wäerter vun der Toleranz, der Solidaritéit an dem Respekt engagéiert. Weider war hien e passionéierte Porte-Parole vu sengen ekologeschen Iwwerzeegungen, speziell fir d'Ressourcen an d'Ëmwelt ze schützen, sou de Premier Xavier Bettel an deem offizielle Regierung-Communiqué.

De Xavier Bettel reagéiert op den Doud vum Camille Gira
Zum Schluss hunn dem Staatsminister d'Wierder gefeelt, hie war emouvéiert iwwer den Doud net nëmme vun engem Regierungskolleg, ma och vun engem Frënd.



Éischt Reaktioun vum Premier op Doud vum Camille Gira (17.05.2018)
De Lëtzebuerger Premier krut déi traureg Noriicht iwwer dem inoffiziellen Dîner virum EU-Westbalkan-Sommet.


De Lëtzebuerger Premier krut déi traureg Noriicht iwwer dem inoffiziellen Dîner virum EU-Westbalkan-Sommet. Hie gouf du vu sengem belschen Homolog Charles Michel vertrueden, fir sech mat senge Regierungskollegen a Verbindung ze setzen. De Xavier Bettel wäert och en Donneschdeg um EU-Westbalkan-Sommet present sinn.

D'Chamber huet och reagéiert: "D'Chamber ass déif getraff. Nodeem de Staatssekretär Camille Gira an der Plenière zesummegaangen an duerno verscheet ass, ass d'ëffentlech Sëtzung vun Donneschdeg ofgesot. Dat huet de Chamberpresident Mars Di Bartolomeo zesumme mat de Fraktiounscheffen decidéiert, aus Respekt virun de Gefiller vun der Famille, vun de Frënn an all senge Kollegen."

Déi nächst Seancen an der Chamber sinn an der Woch vum 12. Juni. De Fändel op der Chamber hänkt zanter en Donneschdeg de Moien op Hallefmast.

D'Regierung huet dann och d'ëffentlech Gebailechkeeten invitéiert, virun hire Gebaier d'Fändelen op Hallefmast ze hänken, dat nach bis e Samschdeg.

Desweidere läit vun en Donneschdeg de Mëtteg 14 Auer e Kondolenzbuch am Staatsministère aus (4, rue de la Congrégation an der Stad). Hei kréien d'Leit d'Méiglechkeet, hir Sympathie an hire Respekt géintiwwer dem verstuerwene Politiker auszedrécken, dëst um Donneschdeg tëscht 14 an 18 Auer, e Freideg tëscht 8 an 18 Auer, an e Samschdeg tëscht 10 a 16 Auer.

E Freideg um 12 Auer kënnt d'Regierung beieneen als Hommage un de Camille Gira. De geplangte Ministerrot gouf ofgesot. D'Trauerzeremonie fir de Verstuerwenen ass iwwerdeems e Samschdeg de Mëtteg zu Biekerech am Centre Nic Bosseler.

Trauerzeremonie



De Mars Di Bartolomeo huet sech en Donneschdeg de Moien am RTL Interview an enger éischter Reaktioun schockéiert gewisen iwwert den Doud vum grénge Politiker. D'Trauer um Krautmaart wier extrem, sou den éischte Bierger vum Land.

De Mars Di Bartolomeo



Et ass dem Mars Di Bartolomeo um Donneschdeg de Moie schwéier gefall, déi richteg Wierder ze fannen. Ma och hien huet de Camille Gira als e gudde Frënd an engagéierte Politiker honoréiert.

De Mars Di Bartolomeo

D'DP-Parteipresidentin Corinne Cahen kennt de Camille Gira zanter laange Joren. En Donneschdeg de Moien an enger Reaktioun huet si sech ganz schockéiert gewisen.

D'Corinne Cahen vun der DP (17.05.2018)
De Camille Gira war fir d'Familljeministesch eng Persoun, déi einfach zu der Lëtzebuerger Politik dozou gehéiert huet.

D'Corinne Cahen

Am spéiden Donneschdeg de Moien huet den Nohaltegkeetsminister François Bausch op den Doud vum Camille Gira reagéiert. Fir hie war de Camille Gira net just en Aarbechtskolleg, e Parteikolleg, mä virun allem e gudde Frënd.

De François Bausch an d'Carole Dieschbourg vun déi Gréng (17.05.2018)
Den Doud vum Camille Gira hannerléisst e ganz déift Lach.


De Nohaltegkeetsminister François Bausch

D'Ministeren Carole Dieschbourg a François Bausch hunn déi lescht Jore ganz enk mam Camille Gira zesummegeschafft a sinn - genee wéi vill aner Leit am Nohaltegkeetsministère - déif getraff.

D'Ekipp am MDDI wäert weider fir dem Camille Gira seng Iwwerzeegunge kämpfen a sech engagéieren. Dat huet d'Carole Dieschbourg en Donneschdeg de Moien an enger éischter Reaktioun ënnerstrach an där si och betount huet, datt de Camille Gira e ganz wichtege Mënsch fir si perséinlech war:

D'Carole Dieschbourg


De François Bausch huet iwwer 30 Joer zesumme mam Camille Gira Politik gemaach. Perséinlech waren déi zwee Männer immens gutt Frënn, wéi de François Bausch betount huet.
D'Carole Dieschbourg



De Camille Gira war e Mënsch, dee ganz vill Leit touchéiert huet, sot de Buergermeeschter vu Biekerech Thierry Lagoda an enger éischter Reaktioun.

De Buergermeeschter vu Biekerech Thierry Lagoda



De verstuerwene Politiker hat fir säi Successeur un der Spëtzt vun der Biekerecher Gemeng kloer eng Virbildfunktioun. De Camille Gira hätt seng Iddie gehat, mä en hätt ëmmer mat sech schwätze gelooss. Net säin Ego mä d‘Saach an de Virdergrond gestallt.

Zesumme mam Lucien Bertemes ass de Camille Gira 1982 eng éischte Kéier an de Schäfferot gewielt ginn. Ënnert dem Jos Seyler wiere si deemools de jéngste Schäfferot am Land gewiescht, erënnert sech de Lucien Bertemes. D'Leit hätte vun der „Spillschoul“ geschwat ma si hir Iddien ëmgesat.

Op Demande vum Biekerecher Gemengepapp goufen d'Fändelen an der Gemeng an dem ganze Réidener Kanton aus Respekt fir de Verstuerwenen op Hallefmast gehaangen.

De Buergermeeschter vu Biekerech Thierry Lagoda



Den LSAP-Deputéierten Alex Bodry schwätzt an enger éischter Reaktioun vun tragesche Momenter. Och hien hätt zu engem vun deene gehéiert, déi puer Mol an der Nuecht op en Donneschdeg opgestane wieren a Schwieregkeeten hätten, sech domat ofzefannen.

Den Alex Bodry



Den Alex Bodry (17.05.2018)
De Camille Gira war keen Politiker fir e Posten ze besetzen, mee fir Projeten ëmzesetzen.


Den CSV-Deputéierten Claude Wiseler ass och nach ëmmer schockéiert iwwert dat, wat um Mëttwoch geschitt ass, an ass an déiwer Trauer.

De Claude Wiseler



De Claude Wiseler (17.05.2018)
Och een Dag nom Dout vum Camille Gira, weist de Claude Wiseler sech nach ëmmer schockéiert an traureg.


De Camille Gira war e formidabele Mënsch, onwahrscheinlech korrekt, fair an et war virun allem en immense Kolleg vun eis. Mat deene Wierder huet den ADR Deputéierte Gast Gibéryen op den Doud vum Camille Gira reagéiert.

De Gast Gibéryen



De Gast Gibéryen vun der ADR (17.05.2018)
De Camille Gira war net nëmmen e Pilier vun der Grénger Beweegung, mä souguer vun der Lëtzebuerger Politik.

De grénge Parteipresident Christian Kmiotek huet op Twitter geschriwwen: E Mann, e Gréngen, esou grouss a gradlinneg bannen dra wéi baussen. Ëmgefall wéi eng Eech am Stuerm." "Énorme tristesse...." sou d'Reaktioun vum Nohaltegkeetsminister François Bausch och op Twitter.

De Christian Kmiotek an d'Françoise Folmer (Déi Gréng) (17.05.2018)
Béid Politiker schwätzen iwwert de Camille Gira a wéi wichteg hie fir vill Leit an och d'Partei war.

Den Europadeputéierte Charles Goerens war entsat wéi en d'Noriicht krut. De fréieren Ëmweltminister hätt dem Camille Gira ëmmer seng Gewëssenhaftegkeet déif ugerechent, an d'Manéier wéi hien u senge Prinzipie festgehalen huet.

Den Europadeputéierte Charles Goerens

Och d'Geschäftsfra a fréier gréng Deputéiert, d'Christiane Wickler huet op den Doud vum Camille Gira reagéiert. D'Grënnerin vum Pall Center zu Uewerpallen an der Gemeng Biekerech stoung dem Camille Gira no. Si war ënner anerem bei de leschte Chamberwalen zesumme mam Verstuerwene Spëtzekandidatin bei deene Gréngen am Norden.

D'Christiane Wickler reagéiert ganz emotional

Gradlinneg, esou huet de grénge Parteipresident Christian Kmiotek de Camille Gira op de soziale Medie beschriwwen. Dat ass och eng Qualitéit déi d'Christiane Wickler dem Camille Gira héich ugerechent huet. An der Politik, wéi bei de Projeten an der Gemeng.

"Äddi Camille", schreiwen déi Gréng um Donneschdeg de Moien op Facebook. "Mam Camille huet eis gëschter Owend een onersetzleche Kolleg a Frënd verlooss. Mir traueren em ee Mënsch dee mer all immens gären haten, deen Inspiratioun a Virbild war an op deen déi gréng politesch a mënschlech ëmmer konnten zielen. Hien huet eis Partei vum éischten Dag un wou hien dobäi war mat beweegt a mat gepräägt, an ni domadder opgehalen."


An enger éischter Reaktioun weist sech och d'CSV um Donneschdeg de Moie betraff vum Doud vum Camille Gira. Mat him huet d'Land en engagéierten, kompetenten a konsequente Politiker verluer. Als Politiker huet de Camille Gira e groussen Deel vu sengem Liewen an den Déngscht vun eiser Gesellschaft gestallt. Säi Markenzeechen wiere kloer Wieder an eng éierlech Iwwerzeegung gewiescht, zu där hien ëmmer stoung. Weider schreift d'CSV an hirem Communiqué, dass dem Camille Gira säin Asaz onvergiess bleift, seng Perséinlechkeet wäert ee vermëssen.

PDF: Pressecommuniqué vun der CSV

D'LSAP weist sech consternéiert an déif betraff vum onerwaarten Doud vum Camille Gira. Während senger ganzer politescher Karriär hätt een de Camille Gira als kompetent, engagéiert, jovial an no un de Leit kennegeléiert. Hie wier ëmmer en agreabelen Interlocuteur gewiescht. Och wann e seng Iddien ëmmer mat vill Iwwerzeegung verdeedegt huet, wier en ëmmer oppe fir Kompromësser gewiescht. Den trageschen Doud géif een nees drun erënneren, wéi zerbriechlech d'Liewen ass.

PDF: Condoléance-Schreiwes vun der LSAP

Och d'DP huet iwwer Twitter hiert Bäileed ausgedréckt.



Wéi d'ADR an hirem Communiqué betount, géif den Doud vum Camille Gira Villes an eng aner Perspektiv setzen an drécken natierlech der Famill a Frënn hiert Matgefill aus.

Communiqué ADR

Ze vill fréi ass de Grénge-Politiker gestuerwen, esou d'Piraten en Donneschdeg de Mëtteg an engem Communiqué.

PRESSEMATDEELUNG Piraten: Undenken un de Camille Gira

Och deene Lénke feelen d'Wierder nom onerwaarten Doud vum Camille Gira an hirem Schreiwes: Nous restons émus et consternés suite à la nouvelle du décès inattendu de Monsieur le Secrétaire d’État Camille Gira. Nous garderons de lui le souvenir d’un homme politique compétent et honnête et d’un militant passionné pour la cause écologique. Nous tenons à exprimer à sa famille et à tous ses proches nos sincères condoléances.

Den David Wagner vun déi Lénk (17.05.2018)
De Politiker vun déi Lénk schwätzt vun engem Verloscht, dee vill Leit elo mierken.


Ma net nëmmen di national Politik ass am Trauer, och de Lëtzebuerger Handball. Wéi d'Lëtzebuerger Handballfederatioun op Facebook schreift, hätt si d'Nouvelle vum Doud vun hirem fréiere President, dem Camille Gira getraff.
"De Camille huet zu eiser Handballfamill gehéiert an huet mat ganz vill Engagement versicht an de Jore vu senger Presidence den Handball ze promouvéieren. Hie war bis zum Schluss der Federatioun an dem Handball déif verbonnen, a seng Ënnerstëtzung fir eis Nationalequipe war ëmmer grouss", sou d'Federatioun an hirem Message op Facebook.
Hie géif elo als Gespréichspartner a kompetenten Handballenthusiast feelen.

Och de Mouvement Ecologique schwätzt vun engem onersetzleche Verloscht. De Camille Gira wier vun den 80er Joren un aktiv Member am Mouveco gewiescht. Mat senger Iwwerzeegung, senger Leidenschaft, senger Mënschlechkeet, mä awer och mat sengem Humor, hätt hien d'Iddie vun der ekologescher Gemengepolitik, der Regionalentwécklung an dem Natur- a Klimaschutz staark geprägt. De Nico Graf huet mat der Presidentin Blanche Weber geschwat.
Reaktioun Blanche Weber/Reportage Nico Graf


PDF: Reaktioun vum Mouvement Ecologique

"De Camille huet ganz vill dozou bäigedroen, datt d’ONGen am Natur- a Klimaschutzberäich an hirer Roll gestäerkt gi sinn, haut gehéiert ginn a ganz aktiv an d’Ausschaffe vu wichtegen Theme mat agebonne sinn", esou d'Ëmweltberodung Lëtzebuerg a.s.b.l. an hirem Communiqué.

D'Asbl Natur&ëmwelt ass och déif getraff vum Doud vum Camille Gira.

Staatssekretär im Nachhaltigkeitsministerium Camille Gira ist am Abend des 16. Mai 2018 unerwartet verstorben. Sein viel zu früher Tod hat alle tief getroffen.

Camille Gira war nicht nur ein engagierter Politiker, sondern auch ein entschlossener Verfechter des Naturschutzes. In seiner gesamten politischen Karriere und besonders in seiner Funktion als Staatssekretär hat er sich für den Erhalt der Biodiversität und den Schutz unserer Umwelt eingesetzt. In Beckerich hat Camille Gira als Bürgermeister entscheidende Impulse für die Nachhaltigkeit gegeben. Auch als langjähriger Abgeordneter hat er sich nicht gescheut die herausforderndsten Dossiers in Angriff zu nehmen und seine Herzensangelegenheiten hartnäckig voranzutreiben. Sein unerwarteter Tod ist nicht nur für den Naturschutz ein großer Verlust.

natur&ëmwelt möchte sich für sein jahrelanges und unermüdliches Engagement bedanken und der Familie sein aufrichtiges Beileid zum Ausdruck bringen.

 
Duerch den Asaz vum Camille Gira, hätten d'Déieren a virun allem de Fuuss zu Lëtzebuerg eng Chance op e würdegt Liewe kritt, esou d'ALPA an engem Noruff op de Politiker.

Noruff op de Camille Gira vun der ALPA asbl

LINK: Nom Doud vum Camille Gira - Changementer am Programm a bei Manifestatiounen.

LINK: In memoriam - Gedanken un de Camille Gira. De Chefredakter vu Radio Lëtzebuerg erënnert un en engagéierte Politiker.

LINK: Camille Gira - E perséinlechen Noruff vum Eric Ewald.

RTL-NEWS: VIDEO: Nom onerwaarten Doud: Biekerech trauert ëm "säi Camille"

Telegramm vun der groussherzoglecher Koppel

Och d'groussherzoglech Koppel weist sech an engem perséinleche Schreiwes un d'Witfra an d'Kanner vum Camille Gira déif getraff iwwert den onerwaarten Doud vum Staatssekretär am Nohaltegkeetsministère.

Wéi et am Bréif un d'Madamm Gira heescht géifen de Grand-Duc an d'Grande-Duchesse dem Camille Gira dee gréissten Hommage entgéint bréngen - et wier e geruede Mënsch vun den Iwwerzeegungen an dem Engagement gewiescht.

D'groussherzoglech Koppel seet de Famillje vum Camille Gira hiert déifst Bäileed, dat de Grand-Duc an d'Grande-Duchesse an dëse schwéiere Stonne mat deelen.

Cour grand-ducale: Télégramme de condoléances

Communiqué vum Staatsministère
Le gouvernement a le triste devoir d'annoncer le décès du secrétaire d'état au développement durable et aux infrastructures, Camille Gira (16.05.2018)

Le gouvernement a l'immense tristesse de faire part du décès de l'un de ses membres, le secrétaire d'état au développement durable et aux infrastructures, Camille Gira. Le décès soudain et inattendu est intervenu dans la soirée du 16 mai 2018.

« Dans ses mandats politiques, que ce soit au niveau communal ou au niveau national, Monsieur Gira a toujours fait preuve d'un dévouement exemplaire. Il s'est également engagé tout au long de sa carrière politique pour les valeurs fondamentales de tolérance, de solidarité et de respect. Outre cet engagement, il a été un porte-parole passionné par ses convictions écologiques, notamment la protection des ressources naturelles et l'environnement » a déclaré le Premier ministre, ministre d'État, Xavier Bettel.

Anéantis par cette nouvelle, le Premier ministre présente au nom du gouvernement, ses sincères condoléances à son épouse et ses deux fils ainsi qu'à toute sa famille et ses proches.

Message vun der Chamber
Le message de condoléances du Président de la Chambre des Députés, Mars Di Bartoloemo, ainsi que des chefs et représentants des groupes et des sensibilités politiques, suite au décès du Secrétaire d'Etat au Développement durable et aux infrastructures, Camille Gira:

"D'Chamber ass déif getraff. Nodeem de Staatssekretär Camille Gira an der Plenière zesummegaangen an duerno verscheet ass, ass d'ëffentlech Sëtzung vun Donneschdeg ofgesot. Dat huet de Chamberpresident Mars Di Bartolomeo zesumme mat de Fraktiounscheffen decidéiert, aus Respekt virun de Gefiller vun der Famille, vun de Frënn an all senge Kollegen.
D'Chamber dréckt der Famille vum Camille Gira hiert éierlecht an déifste Matgefill mat."

La séance publique de jeudi après-midi est reportée.















OGBL


Léif User, d'Daumen no ënne bei RIP-Commentairë gi ganz kritesch gekuckt, dat kann ee verstoen an novollzéien; ma bedenkt w.e.g., villäicht hunn eenzel Leit versicht auszedrécken, datt se traureg sinn, an hunn dowéinst net op den Daum no uewe gedréckt ...

Är Condoleancen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.