SNHBM300 Logementer sollen dëst Joer an d'Chantiersphas goen

272 sozial Wunnenge goufen am Joer 2017 ugefaange mat bauen, dat op 7 verschiddene Sitten uechter d'Land.

© Frank Elsen

"Eis Objektiven hu mer erfëllt!", sou huet et en Donneschdeg bei der Société nationale des habitations à bon marché (SNHBM) geheescht.

300 nei Logementer op 9 verschiddene Sitte wëll d'Société nationale des habitations à bon marché dëst Joer bauen. Ënnert anerem am Réimerwee um Kierchbierg, zu Käerjeng, zu Lamadeleine an zu Ollem. Nieft dem Fonds du Logement, ass d’SNHBM eng zweet Gesellschaft hei am Land, déi sech fir de Bau vu soziale Wunnengen asetzt. D’Zil vun der SNHBM ass et een innovativen an nohaltegen Urbanismus ze schafen. Nach virum Kollektivcongé sollen d’Aarbechte vun engem gréissere Projet zu Ollem ufänken. Eng 750 Logementer op 27 Hektar sollen do entstoen.              

SNHBN Bilan - Frank Elsen

                  

2021 sollen déi éischt 100 Wunnengen, eng Schoul an e Supermarché fäerdeg sinn. Et wier een innovative Projet, ënnersträicht den Direkter vun der SNHBM, Guy Entringer. Autoen dierfen am Quartier just zu verschiddenen Zäite fueren. Dowéinst ginn 8 zentraliséiert Parkhaiser vun all Kéier 200 Plaze gebaut. Ronn 400 Wunnengen a 400 Appartementer sollen insgesamt am Quartier Elmen entstoen. D'Haiser sollen am Holz gebaut ginn, d'Appartementer traditionell. Et well een de Leit emol eng Kéier en neien, aneren Urbanismus weisen, dat zu abordabele Präisser. Eventuell kommen dann och Promoteuren op de Goût vun dësem alternative Bauen.              

Der SNHBM no, brauch en innovative Quartier Mixitéit. Nieft Wunnengen an enger Schoul, wäerten am Quartier Elmen och eng Maison Relais an eng Maison pour tous, eben eng multifunktionell Hal, gebaut ginn. Eng 2.000 Leit sollen an Zukunft do liewen. Zejoert huet d’SNHBM genee 154 Wunnenge gebaut.          

Eng 90 Leit schaffen den Ament fir d’SNHBM. Strategesch berode gëtt de Betrib vun der KPMG. Et hätt een an den 3 leschte Joren d'Aktivitéite konnte verdräifachen, sou dass d'Organisatioun hannendrun eng Kéier misst op de Leescht geholl ginn.                 

Well viru Jore spekulativ Gewënner mat de Wunnenge gemaach goufen, huet de Verwaltungsrot vun der SNHBM am Februar decidéiert d’Virverkafsrecht op 99 Joer eropzesetze, fir der finanzieller Spekulatioun entgéint ze kommen, esou de Guy Entringer. Eng 52 Milliounen Euro huet SNHBM zejoert an d’Chantieren investéiert.     

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.