BartrengNieft enger Crèche war beim Auslueden e Camion gekippt

An der Mamer Strooss ass en Dënschdeg um 10.17 Auer e Camion gekippt, wéi e mat engem Kran Bëtongsplacken ausgelueden huet. 1 Persoun gouf blesséiert.

De Camionschauffer war nieft enger Crèche am Gaangen, Bëtongsplacken ofzelueden, wéi d'Stäipe vum Camion ënnert der Laascht noginn hunn. De Kran war 28 Meter erausgefuer an hat 300 Kilo gelueden. Déi Charge war wuel ze schwéier.

© Christophe Hochard / RTL Télé Lëtzebuerg


Am 112-Bulletin ass ze liesen, dass bei deem Tëschefall 1 Persoun blesséiert ginn ass. Et handelt sech heibäi RTL-Informatiounen no ëm een Aarbechter, dee vun de Bëtongsplacke liicht um Been blesséiert gouf.

Zum Zäitpunkt vum Accident waren d'Kanner aus der Crèche dobaussen, et ass awer zum Gléck kengem eppes geschitt.

De Samu aus der Stad, d'Ambulanze vu Mamer an aus der Stad waren op der Plaz, grad wéi den Asazzenter vu Mamer an aus der Stad.

D'Rue de Mamer war nom Tëschefall gespaart, si ass kuerz virun 13 Auer nees fir den Trafic opgaangen.

Gléck am Ongléck haten d'Leit an der Mamer Strooss zu Bartreng. De Moien, kuerz no véierel op 10 huet et op engem klenge Chantier direkt nieft enger Crèche geknuppt. Ee Camion mat engem Kran war ëmgefall, wéi en am Gaang war Bëtongsplacken hannert engem Haus ofzelueden, déi waren 300 Kilo schwéier. D'Stäipen hunn um mëlle Buedem beim Chantier noginn, an de Camion ass ëmgekippt. Den 28 Meter laangen Aarm ass mat der schwéierer Ladung hannert dem Haus mol kee Meter nieft dem Gaart vun der Crèche erofgaangen. D'Educatrice Maud Detiège war deen Ament mat enger Grupp Kanner am Gaart.

D'Educatrice Maud Detiège

De Leit aus der Crèche ass zum Gléck näischt geschitt. Et gouf awer een Aarbechter blesséiert, präziséiert de Policespriecher Tom Brücher.

De Policespriecher Tom Brücher

D'Inspection du Travail war och op der Plaz, fir ze kucken ob ee Feeler bei der Manipulatioun vum Camion a vum Kran geschitt ass. Um hallwer eng stoung de Camion erëm, eng Depanneuse hat en opgeriicht kritt an d'Strooss konnt erëm opgemaach ginn.