VIDEO: Diplom an Owescourse maachenNët méi laang fir déi nei Ecole de la 2ième Chance zu Mamer?

Iwwerdeems déi Responsabel vun der Schoul gär wéissten, wéini se e neit Gebai kréien, seet den Infrastrukturministère, et géing net méi laang daueren.

VIDEO: École de la 2ième Chance (12.06.2018)
D'École de la 2ième Chance soll op Mamer plënneren, zu Hollerech géif et dem Ament ganz enk ginn.
E neit Gebai fir d'École de la 2ième Chance

Déi Responsabel vun der École de la Deuxième Chance ginn eegenen Aussoen no "esou lues nervös". Den Direkter vun der Schoul sot en Dënschdeg de Moien um Bord vun enger Pressekonferenz, et géing „enk“ ginn zu Hollerech. Si wéissten net, wéi et mam Bail mat Paul Würth no 2019 eraus weidergeet a vum Projet zu Mamer hätt een iwwerdeems laang näischt méi héieren, sou de Carlo Welfring.

De Carlo Welfring, Direkter vun der École de la 2ième Chance
De Carlo Welfring géif sech wënschen, datt dat elo mol alles viru geet.

De Buergermeeschter vu Mamer Gilles Roth (CSV) sot ons op Nofro hin, hien hätt och zanter de Gemengewahlen näischt méi héieren. Den Infrastrukturministère schwätzt par konter vu Verhandlungen, bei deenen et ënnert anerem ëm den Impakt op de Verkéier an d’Optioune géing goen. Et géing awer elo "séier goen".

Dat neit Gebai fir d’École de la deuxième Chance soll op deem Terrain entstoen, wou d’lescht Joer e Containerduerf fir Asyldemandeure geplangt war. Dëse war allerdéngs vum Verwaltungsgeriicht annuléiert ginn, nodeems 36 Bierger geklot haten.

Nei Première fir Erwuessener

D’Ecole de la deuxième Chance hat d’Press agelueden, fir eng nei Première fir Erwuessener ze presentéieren, déi se an Zesummenaarbecht mam Kolléisch vu nächster Rentrée un ubitt.

Den „Diplome d’accès aux études supérieures (DAES)" gesäit 6 Modulle vir: Sproochen, Wëssenschaft, Sozial Wëssenschaft a Mathé. Donieft kënnt, jee nodeem wat de Projet vum Schüler ass, nach ee Module dobäi a se mussen eng perséinlech Aarbecht ofginn, bei där se awer encadréiert sinn.

Dës nei Offer riicht sech u "méi Erwuesse Leit", déi beispillsweis eng Aarbecht hunn oder am Congé parental sinn an den Diplom gëtt engem en Zougang zur Universitéit an zum Concours beim Staat.

Opgrond vu Prejugéen hätt d’Ecole de la deuxième Chance net ëmmer déi Unerkennung, wéi klassesch Lycéeën, mä mam neie Gesetz soll se an d’Ecole nationale pour adultes ëmbenannt ginn.

De Staatsrot huet iwwregens haut a sengem kuerzen Avis e prinzipiellen Accord fir d’Reform vun der Ecole de la deuxième Chance ginn. D’héich Kierperschaft betount awer, datt „d’Relatioun tëscht de Besoine vum Aarbechtsmaart an déi méi cibléiert Formatiounen“ d’Spezifizitéit vun dëser Schoul war. An datt dat och esou soll bleiwen.

All Joer briechen eng 1.600 Schüler hire Lycée of. Wann ee sech méi spéit am Liewen decidéiert, säin Diplom awer ze maachen, da kann een dat zum Beispill an der École de la 2ième Chance. Den Diplôme d'accès aux études konnt ee bis elo den Dag iwwer maachen, ma vu September u kann een deen awer och an Owescourse maachen.

D'École de la 2ième Chance an de Stater Kolléisch, déi scho méi laang zesummeschaffen, hunn en Dënschdeg eng nei Offer presentéiert. D'Zilgrupp si Leit, déi am Dag keng Zäit hunn, well se schaffen. De Carlo Welfring, Direkter vun der École de la 2ième Chance, rappeléiert, dass dës och Leit betrëfft, déi am Congé parental sinn, bei der Adem ageschriwwe sinn, respektiv eng Formatioun maachen.

An där Modulle muss ee 6 Stéck maachen, aus 4 verschiddene Beräicher. Dat heescht Sproochen, Mathematik, Sciences naturelles a Sciences humaines.

Et ass also en Diplom, dee breet gefächert ass an dee genee sou vill Wäert ass, wéi den Ofschlossdiplom, deen een am Lycée mécht. D'Course sinn tëschent 17 an 21 Auer. Méi Informatioune kritt um Internetsite vun der École de la 2ième Chance. Méi Detailer iwwert den DAES ginn et hei.




Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.