ELO MAT VIDEO - Al AvenueNet u Code de la Route gehalen: Cyclisten a Foussgänger verbaliséiert

Um Mëttwoch de Moien hunn e puer Cyclisten net schlecht gestaunt, wéi d'Beamte vun der Police si ugehalen hunn.

Mam Vëlo um Trëttoir: Protokoller fir Cyclisten (15.06.2018)
Verschiddener hunn net schlecht gestaunt, wéi se de leschte Mëttwoch de Moien an der aler Avenue op der Gare vun der Police ugehal gouffen an hu misse bezuelen.

Cyclisten, déi um Trëttoir ënnerwee waren, dat ass wuel verbueden, mä d'Leit um Vëlo wäichen natierlech och aus Sécherheetsgrënn op den Trëttoir aus, well eng Vëlospist gëtt et do net an op der Stross gëtt et op dëser - wéi op villen anere Plazen - enk ...

Nodeem sech verschidden Awunner, déi an der Aler Avenue an der Stad wunnen, bei der Police beschwéiert hunn, well do verschidde Cyclisten ouni opzepassen a Rücksicht ze huelen iwwert den Trottoir fueren, huet d'Police decidéiert, fir um Mëttwoch de Moien op dëser Plaz eng Kontroll ze maachen.

Vun 8.15 Auer bis 9 waren d'Beamten op der Plaz, fir ze kontrolléieren, ob sech d'Vëlosfuerer un de Code de la Route halen. Dobäi ware si selwer iwwerrascht, datt si 35 Cyclisten an där kuerzer Zäit hu misste mat engem Avertissement taxé strofen. Ee weidere Cyclist huet esouguer misste protokolléiert ginn. Och 2 Foussgänger kruten en Avertissement taxé, wahrscheinlech well si bei Rout iwwert d'Strooss gaange sinn.




D'Police erënnert dann drun, datt et verbueden ass, fir mam Vëlo iwwert den Trottoir ze fueren. Wann een den Trottoir als Cyclist wëll benotzten, muss een dofir vum Vëlo klammen an de Vëlo drécken. Am anere Fall muss ee mat engem Avertissement vu 74 Euro rechnen. Och ass et net erlaabt, fir Kopfhörer während dem Fueren ze notzen, respektiv ze telefonéieren.

Vum 15. Mee bis den 31. Juli rifft de Ministère an de Verkéiersbond d'Leit op, fir mat hirem Vëlo op d'Schaff ze fueren. Als Parrain vun dëser Aktioun fungéiert den Andy Schleck, deen och an der Publicitéit fir dës Campagne ze gesinn ass. Leider ass an deem Fall awer net op all Detail opgepasst ginn, well een de fréiere Profi-Cyclist eben um Vëlo gesäit, wéi hie selwer Kopfhörer unhuet, wéi hien "mam Vëlo op d'Schaff" fiert.



Dat hien duerch d'Foussgängerzon fiert, wier awer net verbueden. Wéi den MDDI präziséiert, dierf een a ville Foussgängerzonen de ganzen Dag mam Vëlo fueren, an anere wier dat limitéiert, esou datt een meeschtens vun owes 18 Auer bis moies um 10 hei dierf fueren.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.