CePTHandy vergiess? Bei verschidde Leit féiert dat zu Angschtzoustänn

Anerer weise souguer depressiv Reaktiounen, wa se hiren Handy net derbäi hunn. Suchtpreventioun spillt dofir ëmmer méi eng grouss Roll.

© Anne-Sophie Heck

D'Gesellschaft an d'Gewunnechte vun de Leit verännere sech mat der Zäit, an domadder och d'Suchtverhalen an d'Addictiounen. Sensibiliséierung a Suchtpräventioun spillen do eng wichteg Roll, an dofir ass de Centre de Prévention des Toxicomanies, kuerz CePT, zoustänneg. Beim Stéchwuert „Sucht“ géif een direkt un haart Drogen oder Alkohol denken, se kann awer och ganz anescht optrieden.

CePT Suchtpräventioun - Reportage Anne-Sophie Heck

Am Zäitalter vun Internet, mobillen Telefonen a Compagnie kéimen nei Dependancen dobäi. Den Direkter vum CePT, de Michel Ledoux, schwätzt vun enger Zort Smartphone-Sucht. Et hätt ee bemierkt, datt verschidde Leit Angscht oder souguer depressiv Reaktioune krite, wa se hiren Telefon net hunn. Déi nei Technologien hätten ëmmer méi eng grouss Wichtegkeet an eiser Gesellschaft, an do misst ee sech drun upassen.

Donieft hätt een ëmmer méi Substanzen déi ofhängeg maachen an d'Attitüde vun de Leit a Punkto Dependance géife mat der Zäit änneren. D'Suchtpräventioun misst sech upassen an zejoert goufen eng Rei Pilotprojete lancéiert. Dorënner eng kannergerecht Sensibiliséierung fir Jonker tëscht 6 an 12 Joer. Dee Projet leeft bis elo an 2 Schoulen. Et hëlt een hei Beispiller déi an d'Welt vun de Kanner passen, z.B. naschelen, Tëlee kucken, Smartphone oder Tablet. All déi Saachen, déi si kënnen oder betreffen, ginn da mat der Joffer oder dem Schoulmeeschter behandelt.

Déi nei Technologie kéinte problematesch ginn, ma si kéinten och als Hëllefsmëttel d'Suchtpräventioun ënnerstëtzen. Eng Applikatioun fir de Smartphone ass an der Maach. Do kënnen d'Leit sech informéieren an déi Betraffe kënnen Hëllef froen.

Informatioune kritt een an Zukunft nach ëmmer iwwer Telefon, iwwer Email oder op der Plaz. Zejoert gouf dëse Service ronn 250 mol kontaktéiert. Virop huet sech d'Famill vun de Betraffene gemellt, oder Spezialisten... meeschtens fir Renseignementer iwwer Alkohol a Cannabis.

An ee Bléck an d'Zukunft? Sucht an Droge systematesch a Coursen thematiséieren, an de Schoulen an och an all de Jugendhaiser, dat wier d'Zil vum CePT.

© Anne-Sophie Heck


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.