VIDEO - Reportage an InterviewGlyphosat an nationalen Aktiounsplang fir d'Reduzéierung vu Pestiziden

Mesuren net nëmme fir d'Baueren, mä och fir d'Privatleit. De Reportage iwwer Pestiziden an den Interview mam Landwirtschaftsminister Etgen am Replay.

Den Asaz vum ëmstriddenen Onkrautvernichter Glyphosat gouf vun der EU d'lescht Joer fir 5 Joer verlängert. 18 Länner hate fir eng Verlängerung gestëmmt. Portugal hat sech enthal. D'Belsch, Frankräich, Griichenland, Italien, Kroatien, Malta, Éisträich an Zypern hu mat Lëtzebuerg dogéint gestëmmt.

Zënter Dezember huet Lëtzebuerg en nationalen Aktiounsplang fir d'Reduktioun vu Pestiziden. Bei de Pestizide gëtt et verschidde Gruppen: Herbizider géint Onkraut, Insektizide géint Insekten, Fungizide géint Schimmelpilz a Microorganismen, Akaizide géint Milben, Rodentizider géint Nagedéieren a Molluskizide géint Schlécken.

Bis 2030 soll de Pestizidasaz ëm 50% reduzéiert ginn. Fir verschidde Substanzen wéi de Glyphosat ass en "Phase-out", dat heescht, en Ausstig ass virgesinn, spéitstens a 5 Joer, wann d'Verlängerung vun der EU ausleeft. De Glyphosat ass mat engem Undeel vun 30% deen am meeschte benotzten Herbizid hei am Land.

Eng 520 "Planzeschutzmëttel" sinn zu Lëtzebuerg erlaabt, wat eng 233 Wierkstoffer representéiert, déi ënnert verschiddenen Nimm kommerzialiséiert ginn. Hire Gebrauch ass mat Risike verbonnen, well déi meescht Pestiziden Niewewierkungen hunn, déi bei net korrektem Asaz, d'Gesondheet an d'Ëmwelt schiedegen, esou EU-Kommissioun. D'Gesondheet vu Mënsch an Déier kann negativ beaflosst ginn, entweder wann een hinnen direkt ausgesat ass oder iwwer Réckstänn a landwirtschaftleche Produiten oder am Drénkwaasser.

Pestiziden: Interview mam Landwirtschaftsminister (13.06.2018)
Mesuren net nëmme fir d'Baueren, mä och fir d'Privatleit.


Invité an eiser politescher Mëttwochsemissioun beim Nathalie Reuter war de Landwirtschaftsminister Fernand Etgen.

Zu Wuert koum och den Dr. Helmut Burtscher-Schaden, Biocheminker a Buchauteur vun "Die Akte Glyphosat".

Thematiséiert gëtt, wéi een an Zukunft esou Skandaler, wéi dee ronderëm Zouloossung vu Glyphosat, ka verhënneren. Wärend d'Weltgesondheetsorganisatioun WHO Glyphosat jo opgrond vu Studien als "wahrscheinlech kriibserreegend fir d'Mënschen" agestuuft hat, hat d'EU-Liewensmëttelagence EFSA de Pestizid fir "wahrscheinlech net kriibserreegend" erkläert - an déi Aschätzung mat geheimen Industriestudie begrënnt. Eng Iwwerpréiwung vun onofhängeger Säit vun der Gefor vun der Substanz war doduerch net méiglech. Dat wëll d'EU-Kommissioun an Zukunft änneren.



Den nationalen Aktiounsplang fir d'Reduzéierung vu Pestiziden adresséiert sech awer net nëmmen un déi Professionell, mä och un d'Privatleit. Déi kënnen an Zukunft kee Glyphosat an och keng aner toxesch Substanzen méi fräi am Rayon kafen.

RTL-NEWS: Bis de 16. Juni leeft an der Belle Etoile nach eng Fotoausstellung iwwer de Glyphosat. Mat Biller vum argentinesche Fotograf Pablo Piovano, déi erféieren dinn.

Glyphosat: Expo vun "natur&ëmwelt" an der Belle Etoile (06.06.2018)
Interview mam Buch-Auteur Helmut Burtscher-Schaden iwwer säi Buch "Die Akte Glyphosat".


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.