No Kontroll an Aler AvenueVëlosspure geplangt, Chantier awer vum Tram ofhängeg

Eng Vëlosspuer ass op der Aler Avenue geplangt, ma ëmgesat gouf se bis elo nach net. Au Contraire ass hei e gréissere Chantier geplangt.

D'Beamte vun der Police hunn hir Aarbecht gemaach, déi doranner besteet, ze kontrolléieren, datt d'Leit sech un d'Gesetzer halen, esou huet et aus dem Transportministère op eis Nofro geheescht.

Drop ugeschwat, ob een an enger Strooss, wou an esou kuerzer Zäit esou vill Cyclisten ugehale ginn, wéi datt bei enger Kontroll vun der Police um Mëttwoch de Fall war, e Vëloswee geplangt wier, huet et geheescht, datt se beim Ministère wuel doriwwer informéiert wieren, ma dat Ganzt awer bei der Ville de Luxembourg géif leien, well si op där Plaz dofir zoustänneg sinn.

Aus dem Ministère koum dann nach d'Informatiounen, datt an nächster Zäit, wann d'Passerelle op der neier Bréck nees op ass, een op der aler Bréck mat engem Chantier géif ufänken, deen dann och do de Vëloswee beaflosst. Fir d'Zukunft muss d'Bréck méi breet ginn, fir datt eben d'Bussen a béid Richtunge kënne circuléieren, mä och weiderhin de Vëloswee op där Plaz soll bleiwen. Eng Deviatioun muss vun der Gemeng ageriicht ginn.

Al Avenue: Net u Code de la Route gehalen: Cyclisten a Foussgänger verbaliséiert

Och bei der Ville de Luxembourg si se sech dem Problem bewosst an si confirméieren, och, datt et Pläng ginn, fir an der Aler Avenue e Vëloswee a béid Richtungen anzeriichten. Dëse Projet hänkt awer ganz vill mam Projet vum Tram zesummen, well een déi Al Avenue an deem Kader fir d'Busser, déi och a béid Richtungen do solle fueren, muss fit maachen. D'Gemeng präziséiert, datt et awer wuel nach zwee Joer kann daueren, bis datt déi al Bréck amenagéiert ass an an der Aler Avenue d'Vëlospisten existéieren.

Police-Cyclisten / Reportage Claudia Kollwelter



Weider Detailer vun der VDL:

-          Déi aktuell Konfiguratioun vun der avenue de la Gare erlaabt et net, eng Vëlospist hei ze amenagéieren, am Respekt vun den Direktiven déi anzehale sinn. De Vëlo um Trottoir ze reglementéieren ass och aktuell net méiglech, sou wéi et aus der leschter “étude concept piétons” ervirgeet, dëst well d’Breet vum Trottoir ageschränkt ass duerch Mobilier urbain an Terrassen notamment, an déi effektiv notzbar Breet vum Trottoir integral genotzt muss ginn fir d’Evakuatioun vum héije Flux vu Foussgänger – der schwächster Kategorie vun den usagers de la route – sécher ze garantéieren. 

-          Fir d’Vëlositinerairen tëscht der Gare an dem centre-ville ze optimiséieren, gouf am Mäerz 2013 am Kader vum “Radverkehrskonzept” d’voie cyclable à contresens an der rue du Fort Neipperg realiséiert, fir datt de Vëlo sécher vun der Gare iwwert d’rue du Fort Neipperg an de boulevard d’Avranches bis an den Zentrum ka fueren.

-          Et gëtt momentan awer och e Projet ausgeschafft fir de Reaménagement vun der avenue de la Gare :
o   Doduerch datt den Tram wäert duerch d’avenue de la Liberté fueren, wäerten d’Busser vun der avenue de la Liberté op d’avenue de la Gare verluecht ginn (Busverkéier an 2 Richtungen). Wann de Viaduc da bis verbreet ginn ass, wäert eng duerchgehend Velospiste an 2 Richtungen  vum Viaduc bis op d’place de la Gare an doriwwer eraus realiséiert ginn, wou de Vëlo en site propre wäert kënne fueren.
o   Dës Reaménagementsaarbechten wäerten op d’Aarbechte vum Tram ofgestëmmt ginn an et wäert e Gesamtprojet Infrastruktur / Superstruktur ausgeschafft ginn fir d’avenue de la Gare an d’Säitestroossen.



Temoignage vun engem Betraffenen
© Franz Fayot Facebook


Den Dragos Buzea huet sech bei eise Kollege vun RTL Today gemellt a sech als dee Cyclist identifizéiert, deen den Avertissement taxé net bezuelt huet. Hie betount, datt de Polizist, deen hien ugehalen huet, ganz frëndlech gewiescht wier an dem Dragos Buzea erkläert hätt, datt  hien elo e rapport misst schreiwen, wou och dem Dragos Buzea seng Siicht géif erklären, ma de Bierger misst sech awer dono virun engem Riichter veräntweren, dee misst decidéieren, ob hien dës Amende muss bezuelen oder net.

Als Erklärung hat den Dragos Buzea uginn, datt et "komplett onsécher wier, als Cyclist op der Strooss ze fueren". Weider geet seng Kritik un d'Kommunikatioun vun den Autoritéiten, déi wuel d'Leit dozou opfuerdert, fir op de Vëlo zeréckzegräifen, am selwechten Ament awer verpasst, fir de Leit, dorënner vill Auslänner a Frontalieren, déi genau Paragraphe vum Code de la Route fir d'Cyclisten matzeliwweren. Als Beispill hëlt hien, datt Kopfhörer verbuede wieren, e Punkt, deen him net bekannt gewiescht wier.

De ganzen Interview kënnt der bei de Kollege vun RTL Today noliesen.

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.