Bekämpfung vum TerrorismusGesetzestext mat 58 Jo-Stëmmen an 2 Nee-Stëmmen ugeholl

Bei der Lutte géint den Terror kréien d'Police an d'Justiz duerch de Gesetzestext an Zukunft nach méi Moyenen.

Mat grousser Majoritéit goufen en Donneschdeg um Krautmaart anti-terroristesch Mesuren ugeholl. All d'Parteien, ausser déi Lénk hunn dofir gestëmmt. An Zukunft soll et ënnert anerem fir Enquêteure restriktiv méiglech sinn un Donnéeën ze kommen, déi haaptsächlech mat der elektronescher Kommunikatioun ze dinn hunn, fir virun allem terroristeschen Menacë besser a méi effikass entgéint ze wierken. Sou kënnen an Zukunft och Whatsapp oder och Skype iwwerwaacht ginn.

Am Gesetzesprojet ass och virgesinn, datt während enger Enquête d'Beamten op Pseudonymmen um Internet duerfen zeréckgräifen. Awer och privat Plaze kënnen ofgelauschtert oder mat Kameraen iwwerwaacht ginn.

Virgesinn ass och, dass quasi zu all Dageszäit an och Nuets Perquisitioune kënnen duerchgefouert ginn. Weider kënnen Telekommunikatiounsoperateuren forcéiert ginn d'Donnéeë vu suspekte Persounen erauszeginn.

Den DP-Deputéierten Eugène Berger huet betount, datt och Lëtzebuerg a Punkto Terrorismus keng Insel wier an een dofir optimal op Preventioun misst sëtzen. D’Lëtzebuerger Regierung hätt relativ séier reagéiert an hir Responsabilitéit iwwerholl. Et misst och méiglech si mat den neie Mesuren méi onkomplizéiert kënnen anzegräifen, huet den Eugène Berger erkläert. An engems dierften d’Grondrechter vun de Leit net mëssbraucht ginn.

Den Eugène Berger: Een effiziente Kampf géint den Terrorismus zeechent sech an éischter Linn duerch gutt equipéiert Autoritéiten aus, déi séier an onkomplizéiert agräifen, wann et absolut noutwenneg ass, gläichermoosse wichteg ass et awer och, datt d'Grondrechter vu jidderengem respektéiert ginn an et net zu Mëssbrauch kënnt. Ech brauch iech net ze soen, datt dat fir eis Liberal ganz wichteg ass. Et geet also drëm, een Equiliber ze fannen, tëschent Preventioun vun terroristeschen Akten an de Respekt vu fundamentale Rechter a Fräiheete vun all Eenzelen.       

Extrait Eugène Berger

De Projet de Loi géing deenen 2 Aspekter Rechnung droen, huet den Eugène Berger nach ënnerstrach.

D'Rapportrice an d'Deputéiert vun déi Gréng, Viviane Loschetter, huet betount, datt de Projet de Loi komplett konform mam neien Dateschutzgesetz wäert sinn, dat a puer Wochen an der Chamber gestëmmt gëtt.

Fir den CSV-Deputéierten Gilles Roth ass dem Text wéi en elo virläit, equilibréiert, och wann d'Gesetz a verschiddene Punkten wäit an d'Privatsphär vun de Leit era geet. Den LSAP Fraktiounschef Alex Bodry sot an dem Kontext, dass et dem Staat seng Aufgab ass d'Bierger ze protegéiere an sech dofir och déi néideg Moyenen gëtt. Déi Lénk iwwerdeems hunn der Regierung virgeheit, am Numm vun der Sécherheet d'Biergerrechter anzeschränken. Dem Justizminister Felix Braz war et wichteg drop hinzeweisen, dass d'Gesetz just bei Leit applizéiert gëtt, déi eng Strofdot gemaach hunn oder verdächtegt ginn eng ze maachen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.