PalaisDe Claude Turmes gouf als neie Regierungsmember vereedegt

De grénge Politiker gouf am Palais vum Grand-Duc Henri als neie Staatssekretär am Nohaltegkeetsministère vereedegt, dëst a Präsens vum Premierminister.

Bis 5 Auer e Mëttwoch de Moien huet de Claude Turmes nach zu Bréissel un enger Direktive fir d'Europaparlament geschafft a war dowéinst bei senger Vereedegung am Groussherzogleche Palais nach midd, wéi en eis gezielt huet. Zanter dësem Mëttwoch de Moien un ass en elo Member vun der Regierung an ersetzt als Staatssekretär am Ëmweltministère de Camille Gira, dee jo viru kuerzem ganz onerwaart gestuerwen ass.

De Premierminister Xavier Bettel setzt elo um Claude Turmes säin Teamgeescht. De Premier wënscht dem Här Turmes Bonne Chance an och am Gedanke vum Camille Gira weiderzeschaffen. De Xavier Bettel huet zouginn den Här Turmes net ganz ganz gutt ze kennen, mä de Camille Gira wier en Ekippemënsch gewiescht an de Premier ass iwwerzeegt, dass den Här Turmes och an deem Ekippegeescht wäert weiderschaffen.

De Xavier Bettel

De Claude Turmes iwwerhëlt d'Dossiere vum Camille Gira. En hëlt sech elo mol 2 Wochen fir an de Ministère kucken ze goen, u wéi engen Dossieren de Camille Gira geschafft huet. Zwee vun deenen hie scho weess ass d'Nordstad an d'Economie circulaire. D'Nordstad géif him als Dikrecher besonnesch um Häerz leien. Bei der Economie circulaire géif et drëm goe manner ewechzegeheien an d'Saache scho sou ze bauen, dass se laang halen. Dat wier iwwregens och en Dossier dee fir Wolz intressant wier, sou de Claude Turmes, well zu Wolz eng ganz Industriezon an deem Beräich géif gemaach ginn. Dat wieren elo 2 Dossiere vun deenen hie scho weess, ma do kéimen der elo nach eng ganz Partie derbäi.

De Claude Turmes iwwert seng zukünfteg Aarbecht



De Claude Turmes geet och als Spëtzekandidat am Norde mat an d'Chamberwahlen. Am Europaparlament réckelt d'Tilly Metz fir de grénge Politiker no. Bal 20 Joer war de Claude Turmes Europadeputéierten.

© RTL Télé Lëtzebuerg / Luc Rollmann





Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.