Frontalieren iwwert d'Adem geréierenNicolas Schmit bleift haart géint d'EU-Propos

"Eisen Objektiv gouf erreecht, sou dass ech zu engem groussen Deel kann zefridde sinn", sot um Freideg de Moien den Aarbechtsminister Nicolas Schmit.

Dëst am Kader vun enger EU-Propos am europäesche Sozial- a Aarbechtsrecht. Konkret geet et drëms, dass Lëtzebuerg géif dozou obligéiert ginn, Frontalieren, déi op d'mannst 3 Méint hei am Land geschafft hunn an an de Chômage falen, misst iwwerhuelen, souwuel wat d'Bezuele vun der Chômageindemnitéit wéi och de Suivi vun de Chômeure betrëfft.

Den Nicolas Schmit ass alles anescht wéi d'Accord mat dësem Reglement an hofft et nach kënnen ze blockéieren. En Donneschdeg beim Vott um EU-Ministerconseil hei zu Lëtzebuerg huet hie sech jiddwerfalls enthalen an alles dru gesat fir gewësse Garantien ze kréien, wat déi sougenannten Transitiounsphase ugeet. Während fir all EU Land eng Transitiounsphase vun 2 Joer virgesinn ass, huet den Aarbechtsminister areecht, dass Lëtzebuerg 7 Joer accordéiert géif kréien. Während där Periode hätt een Zäit sech op dëse fundamentalen Changement ze preparéieren, well sech eng grouss Zuel un neie Leit géif bei der Adem registréieren, huet den Aarbechtsminister um Freideg de Moien am RTL Interview betount.

D'Adem misst u sech nei erfonnt an ëmgebaut ginn. Dat dierft net op d'Käschte vun de Servicer goen, mä et missten nei Methoden ausgeschafft ginn an d'Adem misst nach méi digitaliséieren.

E reng finanzielle Raisonnement hätt Lëtzebuerg zimlech isoléiert, huet den Nicolas Schmit ze bedenke ginn. All Länner hätten de Grand-Duché nämlech ënnerstëtzt, ausser eent. An dat war Frankräich. Ma och do wier ee Konzessiounen agaangen, sou den Nicolas Schmit an huet Frankräich proposéiert, dass Lëtzebuerg de Remboursement vun der Chômageindemnitéit vun aktuell 3 op 5 Méint géif erhéijen. Um finanzielle Plang géif dat fir Lëtzebuerg an enger éischter Phase e Surplus vu 15 bis 20 Milliounen Euro bedeiten. Wann dat Reglement richteg a Kraaft ass a mir ginn traitéiert wéi all di aner Länner, dann géif de finanziellen Impakt natierlech vill méi substantiell an et géif een net wäit vun 80 bis 100 Milliounen ewech leien.

Weider huet den Nicolas Schmit nach betount, dass hien nach dacks wäert zeréck op Stroossbuerg an d'EU-Parlament goen, dat och iwwert dat neit Reglement muss ofstëmmen. Hie wéilt sech weider asetze fir substantiell Amendementer an hofft d'Reglement nach kënnen ze blockéieren.

Kompletten Interview mam Nicolas Schmit um Freideg de Moien



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.