No Fuerderung vun SPFPEtienne Schneider huet Versteesdemech, ma eng Léisung ass net evident

D'Gewerkschaft vun der Force Publique, SPFP, hat sech beklot, datt de reforméierte Staatsexamen d'Beruffer a Police an Arméi méi onattraktiv géing maachen.

SPFP fuerdert eege Schoulfilière fir Beruffer an Uniform (03.07.2018)
De reforméierte Staatsexamen mécht d'Beruffer a Police an Arméi méi onattraktiv, beklot d'Gewerkschaft vun der Force Publique SPFP.

Hien géing d'Demande ganz gutt verstoen an och gesinn, dass et eng Necessitéit gëtt, fir d'Attraktivitéit vun der Arméi nees méi grouss ze maachen, mee dat wär mëttlerweil net méi sou evident. Dat sot de Wirtschafts- a Verdeedegungsminister Etienne Schneider e Mëttwoch de Moien als Reaktioun op d'SPFP. D'Gewerkschaft vun der Force Publique hat jo gefuerdert, dass ee wéi fréier, nees eng Aussiicht op eng Staatsplaz sollt kréien, wann een an der Arméi ass, ebe fir d'Beruffer vu Police an Arméi nees méi attraktiv ze maachen.

Etienne Schneider: De Problem ass allerdéngs deen, dass an der Zäit haten d'Leit aus der Arméi d'Virrecht fir zum Beispill Bréifdréier ze ginn, haut ass et awer sou, datt d'Post eng privat Firma ass, déi muss probéieren, am internationale Konkurrenzdrock eenz ze ginn. Doduerch ass et esou, datt keng Bréifdréiere méi am fonctionnaire Statut agestallt ginn, well et zanter der Liberaliséierung vun deem Secteur net méi denkbar ass. D'Gemengen hunn een anere Problem. D'Gemenge wëlle ganz dacks Leit aus der Gemeng astellen an hunn natierlech net ganz vill Freed drun, wa se gesinn, datt dann een aus enger komplett anerer Gemeng d'Virrecht muss kréien, just well en an der Arméi war. Dat sinn alles Problemer mat deene mir eis musse klappen a wou ech d'Gemengen och verstinn.          

Extrait Etienne Schneider



Et wär also net sou einfach, erkläert den Etienne Schneider, mee et géing ee mat de Gewerkschaften zesummen dorunner schaffen, fir d'Arméi nees méi attraktiv ze maachen. Et géif och scho konkret Iddien, déi de Verdeedegungsminister e Mëttwoch awer nach net verrode wollt.


Rekrutementsproblemer: SPFP fuerdert eege Schoulfilière fir Beruffer an Uniform
SPFP fuerdert eege Schoulfilière fir Beruffer an Uniform (03.07.2018)
De reforméierte Staatsexamen mécht d'Beruffer a Police an Arméi méi onattraktiv, beklot d'Gewerkschaft vun der Force Publique SPFP.


De Staatsexame wier eemol am Mount, dee fir Police an Arméi awer nëmmen eemol am Joer. Och déi ofgefrot Matière misst ugepasst ginn. Fir d'Arméi nees méi attraktiv ze maache, sollt ee wéi fréier no senger Zäit bei der Arméi nees besser Chancen op eng Staatsplaz an Uniform kréien. Och den nei reforméierte Staatsexame géif d'Attraktivitéit vun Arméi a Police méi kleng maache, seet den fréiere President vum SPFP Christian Schleck.

Extrait Christian Schleck



Et ass scho vill méi attraktiv, wann een ee Mol de Mount de Staatsexame ka maachen, wéi dat aktuell de Fall ass. Dofir muss och elo gekuckt ginn, fir bei Police oder Arméi méi Examen unzebidden, wou een och d'Matière eng Kéier misst iwwerdenken, well am neie Staatsexamen d'Matière op d'Kopp gehäit gouf a ganz aner Saache gefrot ginn. Bei Police an Arméi misst et ugepasst ginn, fir kompetitiv an interessant ze ginn, well a béide Beräicher feelen am Moment d'Leit.

An der Arméi misst een d'Méiglechkeet hunn, d'Première ze maachen, en plus sollt an de Schoulen eng nei Filière agefouert ginn an där konkret op e spéideren Job an Uniform higeschafft gëtt. An der Regierung wier ee mat de Propose bis elo op daf Ouere gestouss, esou de Pascal Riquier, zanter em Dënschdeg neie President vum SPFP.

SPFP / Reportage Ben Frin



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.