Op de Pneue gelantAuto Héicht Kockelscheier vu Bréck op d'Areler A6 gefall

Wéi en 112 matdeelt, hat et en Donneschdegowend an an der Nuecht 2 Mol gerabbelt, een Accident Héicht Kockelscheier war besonnesch spektakulär.

© RTL / Domingos Oliveira

Géint 3.20 Auer ass en Automobilist op der Escher Strooss Direktioun Kockelscheier-Leideleng gefuer. Kuerz virun der Autobunnsbréck iwwert der Areler A6, Héicht Cloche d'Or, ass den Auto un d'Schleidere komm a krut d'Gelänner vun der Bréck ze paken.

Den Auto gouf duerch d'Loft katapultéiert, huet do nach e Potto vun der Bréck gesträift an ass um Gelänner vun der Bréck gelant. Duerch d'Gewiicht vum Won ass dat dunn ëmgeknéckt an d'Gefier ass no vir, 5 Meter an d'Déift gefall, op d'Areler Autobunn a Richtung Däitschland.

E puer Stécker vum Gelänner a vum Auto sinn op d'Fuerbunne vun der A6 Direktioun Belsch gefall, wouduerch en Auto därmoosse beschiedegt gouf, dass deen Automobilist net méi weiderfuere konnt.

De Chauffer an de Bäifuerer am accidentéierten Auto haten nawell e gudde Schutzengel. Den Auto ass op de Pneue gelant a béid Passagéier hu just misse fir eng Kontroll an d'Spidol. De Chauffer hat allerdéngs ze vill gedronk a krut e provisoresche Fuerverbuet an de Führerschäin ewech geholl.



Ee Blesséierte gouf et do virdrun an engem Accident géint 17.30 Auer 6 op der Diddelenger Autobunn Direktioun franséisch Grenz. En Auto an e Camion hate sech ze pake krut.

Zu Schëtter an der Rue de Prunelles hat et en Donneschdeg en Owend um 18.24 Auer an engem Haus gebrannt. D'Pompjeeë vun Nidderaanwen-Schëtter an d'Beruffspompjeeën waren op der Plaz.

Zu Béiwen hat et kuerz no 20 Auer an enger Kiche gebrannt. Hei waren d'Pompjeeë vun Esch-Sauer am Asaz. Et ass kengem eppes geschitt.

Do virdrun hat et nach zu Nidderpallen um Ditzebierg gedämpt. Dat war géint 18.10 Auer.