Zu WäiswampechVill Kritik un Tourismus-Projet

Weder ekologesch, nach nohalteg, dat ass d’Haaptkritik um geplangten Tourist-Zenter ronderëm d’Séien zu Wäiswampech.

Op 20 Hektar sollen hei 100 Vakanzen-Haiser, en Hotel mat 70 Zëmmer, Restauranten an e Fun-Park hikommen. E Projet, deen zwar gutt klengt, an der Gemeng awer fir eng gewëssen Opreegung suergt.

50 Millioune sollen an dëse Projet investéiert ginn. Den Terrain soll dann op 99 Joer fir 25.000 Euro d'Joer un d'belsch Firma LAMY verpacht ginn. Net genuch, wéi vill Leit fannen an och soss ass net jiddweree mat deem Projet averstanen. Dës Woch war dofir eng Reunioun, bei där éischt Demarchë fir d'Grënnung vun enger Biergerinitiativ an d'Weeër geluecht goufen. D'Karin Meyer vun déi Lénk Norden war ënnert anerem dobäi. Et wiere ganz vill Leit géint de geplangte Projet an et géing ee sech mat alle Mëttel wieren, dass d'Natur net zerstéiert gëtt.

Tourismus-Projet zu Wäisswampech/Reportage Danielle Goergen





Vill Leit ginn an d'Natur, fir sech ze erhuelen, an dat dierft een net ignoréieren. Dofir géing een dann och eng Alternativ bidden. Esou kéint een zum Beispill e Jugendhaus bauen a Butteker, fir déi lokal Produiten ze ënnerstëtzen. Datt eppes dohi komme soll, géing een agesinn, mee ebe just net an deem Ausmooss. Et hätt een näischt géint een Tourismus-Projet, ma dee misst am Aklang mat der Natur sinn, esou d'Karin Meyer.

Déi kënschtlech ugeluechte Séien hätte sech an deene leschte Joerzéngten zu richtege Biotopen entwéckelt, déi elo misste geschützt ginn, esou nach d'Karin Meyer.

Wäiswampech géing den Trafic och net packen. Wéinst dem Naturschutzgebitt wier et net méiglech, fir e Contournement ze bauen, esou datt d'Stroossen nach méi iwwerlaascht wieren, wéi se et schonn an de Spëtzestonne sinn.

Zesumme mam belsche Group LAMY an der Staatssekretärin Francine Closener setzt de Buergermeeschter sech fir de Projet an. Am September kéint een theoretesch mam Bau ufänken, wann alles gutt leeft. 

Kritik un Tourismus-Projet/Reportage Danielle Goergen

Och am Gemengerot selwer ass sech net jiddwereen eens. De Vincent Geiben, Gemengeconseiller, schwätzt sech géint de geplangten Zenter aus. Et wier eng natierlech Plaz, och wann déi Weiere kënschtlech ugeluecht gi wieren. Hie wier sech bewosst, dass eppes misst gemaach ginn, ma op esou ee risegen Areal misst sinn, wier bedenklech.

De Buergermeeschter Henri Rinnen betount hei awer, datt et de Camping-Tourismus vu virun 30 Joer net méi gëtt. Verschidde Punkten an der Konventioun präziséieren, datt am Fall vun enger Faillite vum belsche Gerant LAMY, den Terrain zeréck un d'Gemeng geet. E grousse Kritikpunkt ass hei, datt d'Gemeng an deem Fall op engem Hotel sëtze géing, deen net leeft. Dat gesäit den Henri Rinnen net sou. Hien ass der Meenung, dass ee gewëssene Risiko ëmmer dobäi wier, ma wann et Schrott wier, da géing dat an deenen 99 Joer kommen an da missten déi Verantwortlech intervenéieren.

Eng Partie Leit kritiséieren och, datt ee mam Projet nëmmen eng bestëmmten Zort vun Touriste wéilt ulackelen. Et wéilt een op jiddwer Fall mat alle Mëttele géint de Projet virgoen. Ob am Hierscht mam Bau vum Zenter ugefaange ka ginn, bleift dofir elo mol nach ofzewaarden. 2021 soll de Park seng Dieren opmaachen, esou war et mam Tourismusministère ofgemaach a gouf et de 15. Juni virgestallt.

Brochure Corporate groupe LAMY

Presentation SUNEO PARK

© Service Information Presse


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.