StäreschnäizenVill Leit op der Observatioun tëscht Beidler an Eeschler

D'Perseiden hunn d'Leit e Samschdeg den Owend an den Himmel kucke gelooss. Och um Sonndeg waren d'Stäreschnäizen um Rendez-vous sinn - dat nach bis de 15.

© lm
Esou vill Trafic ass seelen op der klenger Strooss, déi vun Eeschler op Beidler féiert. An och bei der Donatus-Kapell op enger Kopp tëscht den Dierfer ass nëmmen an Ausnamefäll esou vill lass wéi um Samschdeg den Owend: Zwee Stécker ware voller geparkter Autoen an an der Géigend vun der Kapell gouf "gecampt" an an den Himmel gestuerkst ...

Esou Versammlungen an der Gewan si seelen an awer reegelméisseg, nämlech ëmmer dann, wann den Himmel e Spektakel zerwéiert - esou wéi dëse Weekend, wou ee besonnesch vill Stäreschnäize beobachte kann. Dann ass d'Donatus-Kapell en Hotspot!

Ëmmer nees huet een e Samschdeg den Owend an der Däischtert e kollektiven "O" oder "A" héieren, wann nees en helle Stréch um Himmel gesi gouf. "Lo kann ech mir eppes wënschen", hu sech déi eng gefreet, anerer hu se gezielt: "Elo hunn ech der schonn zwou gesinn." Nach anerer si ganz rational opgetrueden: "Dee Punkt do, dat ass de Saturn. De roudelzegen do, dat ass de Mars, dee mer grad ganz gutt gesinn. An do gesitt Dir d'Bild vum Herkules, mat an der Mëtt engem Trapez."



Komm waren d'Leit awer fir d'Stäreschnäizen a wann ee sech esou ëmhéieren huet, d'Leit hunn effektiv vun "Schnäizen" geschwat an net vun "Schnuppen" ...

D'Amateur-Astronome vu Lëtzebuerg an den "natur musée" haten op déi ëffentlech Observatioun an der Gemeng Jonglënster invitéiert. Mam néidege Material goufen awer och d'Stären an déi siichtbar Planéite gekuckt.

An den Himmel war kloer, kaum Wolleken hu gehënnert. Esou konnt ee bei der Donatuskapell op der Kopp nieft dem Waassertuerm (N49.72284 E6.30441) den Himmel esou entdecken, wéi en am Fong ëmmer ass, wéi een en awer allze dacks ignoréiert - mat iwwerraschend ville Fligeren, déi blenken, voller klenger heller Pinktelcher, de Stären, mat de bekannte Stärebiller wéi dem grousse Won, mat der Mëllechstrooss, déi gutt ze erkenne war, mat Satellitten, déi schëtzeg hir poulriicht Bunne gezunn hunn, an ebe mat Stäreschnäizen, déi wierklech um Rendez-vous waren.

© Archivbild


Där gëtt et nämlech aktuell grad besonnesch vill ze gesinn, wat den "natur musée" esou erkläert:

Tëscht dem 10. an dem 15. August 2018 si se nämlech erëm ze gesinn: Stäreschnäizen, Koméitestëbs, deen an der Äerdatmosphär vergléit an dobäi kuerzzäiteg opliicht. Si schéngen aus dem Stärebild Perseus ze kommen an heeschen duerfir Perseiden. Si hunn awer näischt mat de Stären ze dinn. De Stëbs kënnt vum Koméit 109P Swift-Tuttle, eng grouss Äisklatz mat vill Stëbs a Gas. Op sengem Wee bei d'Sonn gëtt en erwiermt a fänkt u mat schmëlzen. Dobäi verléiert hie niewent Waasser a Gas och Stëbs, deen dann um Orbit erhale bleift. All Joer, am August, kräizt eis Äerd dem Koméit seng Bunn, de Stëbs geréit mat 70 km/s an eis Atmosphär a vergléit duerch d'Reiwung. Ass emol e gréissere Stëbskär derbäi, da gesi mir e Feierball, e sougenannte Bolid am Himmel.

Well sou en Naturspektakel eng Zäitchen dauere kann a well ee schonn e bësse Gedold brauch a méi laang an den Himmel kucke muss, fir der ze beobachten, gouf geroden, waarm Kleedung, Gedrénks a Klapp- oder Ligestill matzebréngen. Deem Opruff waren dann och en etlech Leit nokomm, déi esou bequem an d'Luucht tëscht den RTL-Maste vu Beidler a Lënster kucke konnten.

Zwou Wochen no der totaler Mounddäischtert also scho rëm e Spektakel um Himmel um Programm. Bis zu 100 Stäreschnäizen an der Stonn wiere méiglech, esou Experten an dee beschten Dag soll de Sonndegowend sinn ... E realisteschen Duerchschnëtt léich bei ronn 60 Stéck, wat zu enger Stäreschnäiz pro Minutt féiere géif ... am Idealfall!

Observatioun war e Sonndeg awer keng méi virgesinn.

Nach um 23 Auer sinn e Samschdeg den Owend Interessenten ukomm, anerer hu sech do schonn op den Heemwee gemaach. A wéi eng Famill hir Still grad zesummegeklappt hat a Richtung Auto getrëppelt ass, huet ee ronderëm héieren: "O, do war rëm eng." Äntwert vum Papp: "'t ass jo ëmmer esou, ech mengen, déi mierken, wa mir hinnen de Réck dréinen."

Perseiden: D'Stäreschnäitze waren och e Sujet um Radio



Weider Informatiounen um Site vum "natur musée".



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.