Route du VinAlkoholiséierte Foussgänger vun Auto ugestouss

Géint 3.15 Auer an der Nuecht op e Sonndeg gouf zu Stadbriedemes e Mann ugestouss.

© Police

En Automobilist war op der Wäistrooss ënnerwee, wéi vun engem Ament op den aneren e Foussgänger iwwert d'Strooss gaangen ass. Obwuel de Chauffer deng Vollbremsung gemaach huet, krut hien de Passant nach ze paken. E Rettungsdokter, deen op der Plaz war, huet sech direkt ëm de Mann gekëmmert, deen, éischten Indicen no, e puer Schnëttblessuren hat. Awer koum de Mann mat der Ambulanz vu Réimech an d'Spidol. Bei béide Implizéierte gouf en Alkoholtest gemaach, woubäi deem beim Foussgänger positiv ausgefall ass an de Chauffeur an de vum Gesetz erlaabte Limitte louch.

Zu Angelduerf du goufen zu ongeféier der selwechter Zäit véier Persoune liicht blesséiert, wéi en Automobilist op déi falsch Spur geroden ass a frontal mam Gefier, dat entgéint koum, kollidéiert ass. Kee vun den zwee Chaufferen hat ze vill gedronk.

Da mellt den 112 nach en Tëschefall: Géint 2.30 Auer huet et op der A4 an Direktioun Stad tëscht dem Zéissenger Kräiz a Märel gerabbelt. Hei war ee Wonn an d'Leitplanke gerannt, de Chauffer koum mat liichte Blessuren an d'Spidol. De Mann hat awer ze vill gedronk an huet säi Permis missten ofginn.

Nach 7 Permisen huet d'Police ofgeholl, dat zu Wecker, op der N7, zu Mäertert, op der A4, zu Esch an an der Stad, well Automobiliste duerch hire Fuerstil opgefall sinn. Ganz extrem war de Fall zu Mäertert, wou de Chauffer däitlech ze séier ënnerwee war an ënner Alkoholafloss stoung.

Zu Lauterbur gouf e Mann gepëtzt, deen de Permis schonn virdrun ofgeholl krut a bei deem déi technesch Kontroll vum Gefier schonn ofgelaf war. An déi selwecht Kontroll war e Chauffer vun enger Camionnette geroden, deen seng Fuererlaabnes schonn ageschränkt war, deen awer donieft och nach ënner Alkohol- an Drogenafloss stoung nach nach Cannabis, Extasy a Speed bei sech hat. Säi Fuerverbuet gouf ausgebaut.

Da gouf et nach verschidden Tëschefäll um e-Lake-Festival an um Piccadilly, ma d'Police konnt an all de Fäll d'Situatioun entschäerfen an d'Leit berouegen.