Meteo1. Frascht vum Summer

D'Nuecht op e Sonndeg war eng vun de keelsten Augustnuechten, déi mer zanter laangem zu Lëtzebuerg haten.

Wou d'Sonn um Samschdeg lues a lues ënnergaangen ass, sinn d'Temperaturen zu Lëtzebuerg gefall.© RTL Mobile Reporter Mitrovic

An der Nuecht vun e Samschdeg op e Sonndeg gouf et den éischte Frascht zu Lëtzebuerg fir dëse Summer. D’Wiederstatioun vun der ASTA zu Schëmpech huet an de fréie Moiesstonnen e Minimum vun -0,7 Grad gemooss. Dat ass aussergewéinlech an zënter 2000, wou dës Statioun ugefaangen huet mat Moossen, nach ni do virkomm. Den Augustminimum vu bis ewell war den 30.8.2011 mat +0,3 Grad gemooss ginn.

Och d’RTL-Wiederstatioun zu Béiwen huet en neie Rekord a puncto Minimaltemperature fir de Mount August an der leschter Nuecht opgestallt. Hei goufe minimal +0,6 Grad gemooss, mä a 5 Zentimeter iwwert dem Bueden waren et -1,3 Grad. Et gouf hei also Buedemfrascht, eppes, wat zu Béiwen zënter 1996, wou dës Statioun a Betrib geholl gouf, nach ni an engem August de Fall war.

Och am Süde vum Land war et eng vun de keelsten Augustnuechten zënter laangem. Zu Trënteng ass d’Temperatur op +2,3 Grad gefall an zu Recken op der Mess esouguer op +0,6 Grad. Béid ASTA-Statioune moossen awer net direkt iwwert dem Buedem, mä plazeweis gouf et sécher och am Guttland liichte Buedemfrascht.

METEO: Wieder-Warnunge fir Lëtzebuerg.

METEO: Livecam - de Bléck vum Héichhaus.

METEO: Wiederwelt, de Blog vum Yann Logelin.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.