SEWEnseignante solle Vertrauen an de Minister verluer hunn

E puer Deeg virun der Rentrée huet den SEW de Mëttwoch de Moien en negatiivt Bild vun der Situatioun an der Schoul gezeechent.

© Pierre-Marie Koch / RTL Télé Lëtzebuerg

SEW-Schoulrentrée / Reportage Eric Ewald



Ferm Kritik gouf et e Mëttwoch de Moien, e puer Deeg virun der Schoulrentrée also, vu Säite vum SEW um Educatiounsminister. Ween eng Liberaliséierung vun der Schoul wollt, fir deen huet de Claude Meisch eng effikass Aarbecht gemaach, wien dogéint eng Bildung fir all d'Kanner wollt, fir dee war dës Legislaturperiod zimlech katastrophal, huet de Patrick Arendt a Saache Grondschoul gemengt.

Am Fondamental wär et zum Beispill bal zu enger Revolutioun a relativ kuerzer Zäit komm, d'Enseignanten hätten d'Vertrauen an de Minister verluer an duerch d'Quereinsteiger géif de Claude Meisch riskéieren, de Corps enseignant ze splécken.

Am Secondaire da géif een zanter Joren en "nivellement vers le bas" feststellen, a fir d'Zukunft géif d'Gefor vun enger Zwou-Klassen-Educatioun bestoen, woubäi méi an d'Allgemengbildung misst investéiert ginn.

De Syndikat Erzéiung a Wëssenschaft vum OGBL wär net bereet, dës Politik z'ënnerstëtzen, ma et géif een dem Claude Meisch keng Zensur ausstellen: Soss géif et hei banne goen, wéi bei den Elteregespréicher an der Schoul. No laangen Erklärunge géing dir eis d'Fro stellen, wéi huet hien dann elo geschafft. Ech denken, dass hie selwer en Donneschdeg a senger Pressekonferenz op seng gewinnt Aart a Weis sech eng excellent Zensur wäert ausstellen, mä den SEW ass do enger ganz anerer Meenung. Fakt ass awer, datt et kaum een Educatiounsminister gouf, deen esou radikal Ännerungen an den Ausriichtunge vun den Objektiver vun der ëffentlecher Schoul gemaach huet. Fir eis muss den Educatiounspolitik a Fro gestallt ginn. Mir verlaange ganz kloer een ëmdenken. Mir däerfen op alle Fall net einfach mat dëser geféierlecher Politik weidermaachen. Mir brauchen e groussen Debat, wou eis Schoul soll histeieren. Op d'Roll vun der Schoul wierklech soll sinn: Just eng Ausbildung um Déngscht vun der Employabilitéit oder éischter eng Erzéiung zu engem kritesche Bierger.                

Extrait Patrick Arendt



De Syndikat Erzéiung a Wëssenschaft vum OGBL hofft dofir op den nächste Minister, dee virun allem nees d'Vertrauen an d'Schoul misst hierstellen.

© Pierre-Marie Koch / RTL Télé Lëtzebuerg


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.