LiewensqualitéitDéi Gréng: Ländleche Raum soll dem urbane Raum an näischt nostoen

Déi Gréng hunn e Mëttwoch de Moien eng Rei konkret Mesurë virgestallt, fir dat ze garantéieren.

© Claude Zeimetz / RTL Télé Lëtzebuerg

Si wëllen de ländleche Raum weider attraktiv halen. Am Numm vun déi Gréng hunn e Mëttwoch de Moien dräi Deputéierten aus de méi ländleche Bezierker Norden an Osten der Partei hir konkret Propose virgestallt. Iwwer Land gëtt et eng héich Liewensqualitéit, seet d'Spëtzekandidatin am Norden Stéphanie Empain, mä och Erausfuerderungen, fir d'Leit do ze halen. Déi misst een op villen Niveauen ugoen. Hei misst een un d'Mobilitéit, u méi Aarbechtsplazen op allen Niveauen, d'Grondversuergung am medezinesche Beräich an d'Kannerbetreiung denken, sou d'Stéphanie Empain.  

D'Partei setzt sech dofir an, datt Basis-Servicer, wéi d'Dokteschpraxissen a Betreiungsstrukturen, och iwwer Land de Leit via kuerz Weeër zougänglech sinn. Et misste besonnesch méi ëffentlech Crèchë gebaut a Gemeinschaftspraxissen, respektiv Maisons-médicalen am Norden an Osten bäikommen, huet et e Mëttwoch de Moien op enger Pressekonferenz geheescht. D'Gemenge kéinten den Dokteren zum Beispill Raimlechkeeten zur Verfügung stellen, fir déi unzezéien. Dat selwecht gëllt am Commerce an de méi klengen Uertschaften iwwer Land.

D'Distanz mat engem kranke Kand vun Ëlwen erof an d'Stad ass sou net tragbar, sou den Norddeputéierten a grénge Kandidat Gerard Anzia. Viru Joren ass de Choix gemaach ginn, fir d'Maison médicale aus dem Norden zu Ettelbréck z'etabléieren. Dobäi misst et awer net bleiwen.

Extrait Gérard Anzia



E Mëttwoch de Moie gouf och kritiséiert et géif u Maisons médicales pédiatriques feelen. Där gëtt et den Ament just eng nieft der Kannerklinik. Wéi dee Manko konkret soll opgeschafft ginn, dat hunn d'Kandidaten awer net verroden.

Ländlech Entwécklung, dat heescht fir déi Gréng och lokal Aarbechtsplazen. D'Partei wëll e Fong fir wirtschaftlech Entwécklung a setzt op Qualitéitslabele fir landwirtschaftlech Produkter, Agro- an Naturtourismus. A Punkto Mobilitéit, soll d'Offer tëscht den Uertschaften duerch d'Reform vum RGTR vum anere Joer un an den Ausbau vun neie Konzepter, wéi dem Ruffbus verbessert ginn.

Allgemeng missten d'Gemengen am Logement och vill méi aktiv ginn a virun allem d'Offer vu Locatiounswunnengen ausbauen.

PDF: Pressedossier "déi Gréng" - Gutt Liewen am ländleche Raum

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.