Petitioun - Fëmmverbuet op TerrassenFeu Vert fir Debat Public vun der zoustänneger Chamberkommissioun

D'Petitioun fir e Fëmmverbuet op Terrasse krut an der zoustänneger Chamberkommissioun Gréng Luucht an et gëtt also en Debat public an der Chamber.

© afp
Déi elektronesch a schrëftlech Ënnerschrëfte goufen alleguer kontrolléiert, 228 waren der net valabel. Um Enn bleiwen der 4.668, 168 méi ewéi déi 4.500, déi néideg sinn.

Den Debat an der Chamber wäert awer eréischt no de Wale sinn, dat aus méi Grënn, heescht et vum President vun der Petitiounskommissioun Marco Schank.

Et wier wéinst de Konklusiounen ubruecht, datt déi nei Chamber sech mat der Thematik befaasse soll, derbäi kënnt, datt de Plenièressall grad renovéiert gëtt an et wëll een och d'Resultat vun der Géigepetitioun 1080 ofwaarden, déi verlaangt, datt de bloen Damp op den Terrasse soll erlaabt bleiwen. Sollt déi duerchkommen, géif et een Debat public fir déi zwou Petitioune ginn.

22 Petitioune gouf op hir Recevabilitéit gepréift, ma just 5 dovunner goufen ugeholl. Do wier eben d'Géigepetitioun zum Fëmmverbuet op Terrassen. Da gëtt an enger anerer Petitioun gefrot, datt et et bei Temperaturen iwwer 30 Grad e Spezial-Congé soll ginn. D'Nummer 1087 verlaangt e Verbuet vu Plastikstuten.

En anere Petitionär freet en Déierenasyl fir den Norde vum Land. Um Enn gouf nach d'Petitioun 1097 fir recevabel erkläert. Hei gëtt verlaangt, datt fir all Lycées-Schüler eng Visitt am Konzentratiouns-camp Hinzert soll obligatoresch ginn.

Dës Petitioune wäert ee geschwënn um Site vun der Chamber fannen.

D'Petitiounskommissioun gesäit sech virun der éischter Seance vun der neier Chamber nach zwee Mol, well een anerwäerts den Aarbechtspensum net géing packen, heescht et vun de Responsabelen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.