VIDEO: CSV fir Wiessel a Wiseler"Premier mat klorem Kapp, roueger Hand an engem Kompass"

D'Chrëschtlech-sozial Vollekspartei hat e Samschdeg de Moien zu Dummeldeng hiren ausseruerdentlechen Nationalkongress.

D'CSV wëll de Wiessel an huet e Samschdeg de Moien op engem ausseruerdentleche Kongress zu Dummeldeng virun iwwer 500 Leit hire Plang fir Lëtzebuerg presentéiert. D'CSV wëll zréck an d'Regierung, mam Claude Wiseler zréck an de Staatsministère. Et géif elo duer goe mat enger Politik, déi de Leit villes géif virschreiwen a villes schleefe léisst, sot den CSV-Spëtzekandidat.

CSV fir Wiessel a Wiseler (15.09.2018)
"Premier mat klorem Kapp, roueger Hand an engem Kompass"


E Premier mat klorem Kapp, roueger Hand an engem Kompass, dee weess, wat e wëll, géif gebraucht ginn, hat virdrun et den CSV-Generalsekretär Laurent Zeimet ausgedréckt.
Nationalkongress vun der CSV - Reportage Carine Lemmer


D'Land bräicht Reformen, zum Beispill eng Pensiounsreform, huet de Claude Wiseler gemengt. Et géif haut eppes versprach ginn, wat een net kéint halen. D'Rente sollen ofgeséchert ginn, ouni awer gekierzt ze ginn, sou d'CSV.

Déi aktuell Vitess vum Wuesstem packe mer net, huet et zu Dummeldeng geheescht. Den Ament kënnt jo all 7 Joer eng Stad Lëtzebuerg bäi, respektiv zwee "Walferen" oder 4 "Sandweileren" d'Joer. Dat kéint een net esou weider lafe loossen, fënnt de Claude Wiseler.

Mat enger Steierpolitik oder zum Beispill geziilter Standuertpolitik kéint een agräifen. Wann eng CSV nees de Staatsministère géif kréien, géif och nees Uerdnung an d'Regierung kommen. Da géifen net zwee Ministere wéi am Dossier Steewollfabrik sech op der Place publique zerstreiden.

D'CSV wär déi eenzeg Vollekspartei zu Lëtzebuerg, matten an der Gesellschaft. Keng Partei wär esou mat dësem Land verbonne wéi déi Chrëschtlech-Sozial an dowéinst misst och de Wiessel kommen, huet et weider geheescht.



Déi nei CDU-Generalsekretärin Annegret Kramp-Karrenbauer (aus Däitschland) war och op den ausseruerdentleche Kongress komm. Och si ënnerstëtzt eng besser Politik fir Lëtzebuerg, wéi si sot. De Jean-Claude Juncker war iwwregens net zu Dummeldeng derbäi.

Wann d'CSV nees d'Vertraue géif kréien, géif en alles maache fir d'Leit net z'enttäuschen, sot en emotionelle Claude Wiseler, dee mat Standing ovations d'Ënnerstëtzung vum Sall krut.

Den CSV-Parteipresident Marc Spautz huet um Schluss vum Kongress massiv derzou opgeruff, datt all Stëmm op der CSV-Lëscht misst landen. Haaptzil wär et nämlech, net nëmmen d'CSV ze stäerken, mä derfir ze suergen, datt Blo, Rout a Gréng zesummen ënner 30 Sëtz géife kommen, soss géife si nees weider fueren – ouni d'CSV.

Weider Auszich aus dem CSV-Wahlprogramm
Mat hirem Plang fir Lëtzebuerg wëll d'CSV de Famillen nees de Choix ginn. De Congé parental wëlle si vu 6 op 8 Méint an d'Luucht setzen a méi flexibel maachen. Eng Allocation d'éducation no soziale Critèrë soll nees agefouert ginn an och erëm méi Kannergeld vun 3 Kanner un. Déi gratis Kannerbetreiung soll vun 3 Joer u spillen.

Am Schoulberäich wëll d'CSV sech nees méi op d'Schoul Hale konzentréieren, net op strukturell Reformen. Eng gratis Hausaufgabenhëllef soll garantéiert ginn.

A punkto Mobilitéit soll ënnert anerem den Tram och bis op Konter an Nidderaanwe fueren. D'CSV setzt op Héichleeschtungs-Kapassitéitsbusser an och op den Ausbau vu Stroossen.

Am Gesondheetsberäich sollen d'Waardezäiten an den Urgencen an op en IRM erofgoen. Eng besser medezinesch Betreiung och am ländleche Raum ass d'Zil, d'Reform vun der Fleegeversécherung soll iwwerkuckt ginn an et soll méi op Preventioun gesat ginn.

D'CSV setzt sech och derfir an, datt de Staatsbudget nees an den Equiliber kënnt a Reserve fir d'Zukunft opgebaut ginn.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.