FOTOEN a VIDEO: De Parc Heintz van LandewyckDe leschte grousse private Park, deen et nach an der Stad gëtt

Déi mannst hunn bis ewell de Parc Heintz van Landewyck gesinn, ma, duerch e groussen Immobiliëprojet soll sech dat geschwënn änneren.

Den Ament geet de Park awer nëmmen eemol d'Joer fir de Public op. Dat am Kader vun enger Visite guidée.

De Parc Heintz van Landewyck (23.09.2018)
En Abléck an de leschte grousse private Park, deen et nach an der Stad gëtt.

Matzen an der Stad verstoppt sech hanner enger Mauer an enger verraschtener Paart en klenge Bijou. De private Parc vun Heintz van Landewyck an der Hollerecher Strooss ass ëm 19 Honnert entstanen, wéi d'Tubaksfabrik aus der Uewerstad op d'Gare geplënnert ass. De Park mat senger Piscine war geduecht datt d'Mataarbechter vun der Tubaksentreprise sech erhuele kënnen.

An dësem Park fënnt een och en historescht Gebai aus der Festungszäit. D'Haaptwuecht stoung fréier mol op der Plëss, op där Plaz wou haut de Cercle steet. Hei war di zentral Garde vun der Festungsstad doheem. D'Garnisoun ass deemools op der Plëss opmarschéiert an doduerch huet d'Place d'armes och hiren Numm.

© Ryck Thill (RTL)

1902 gouf d'Gebai Stee fir Steen ofgerappt an am Parc vun Heintz van Landewyck nees nei opgeriicht.

Vun der Haaptwuecht sinn awer just d'Arkaden an de Parvis nees nei am Parc opgebaut ginn, D'Gebai selwer wou d'Zaldoten an d'spéider d'Gendaarmen dra souzen ass net erhale bliwwen. Op dësem Site ass e grousse Wunnengsbau Projet geplangt. Am PAG deen d'Gemeng zréckbehalen huet, ginn de Park, d'Haaptwuecht an aner historesch Gebaier an de Projet integréiert.

© Ryck Thill (RTL)

Haut jiddefalls war eng vun de rare Geleeënheete fir de Park ze ginn. Just ee mol d'Joer gëtt de Site am Kader vun enger Visitt guidée fir de Public opgemaach.


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.